KHAWCHHAK LAM SMUGGLING-A LEI ṬHA, LEI CHI AN TAWLH LUH ṬHIN CHHAN KHA!

KHAWCHHAK LAM SMUGGLING-A LEI ṬHA, LEI CHI AN TAWLH LUH ṬHIN CHHAN KHA!
(Kan rin dan (assumption) kan rawn tar lang e! A ni ngei ti turin finfiahna erawh kan nei lo thung)

ZO Tungchaw
https://www.facebook.com/ZOTungchaw2RH

DISCLAIMER: Discussing this for informational purposes is not intended to promote or encourage illegal activities.

Tunlai kan ram thil thleng, damdawiin min run nasat dân te ngaihtuah hian. Kan ṭhalaite hmakhua leh kan ram hma hun thlirin, ngawih mai mai hi a har ta a nih hi. Lehlamah chuan kan zinga miten dân loa thil tih an hreh lo (smuggler) rah kan tuar ṭan ve mek pawh a tih theih ang.

Smuggling nawi te te hi chu Kum 2000 hma lam aṭang pawhin khawchhak lamah a kal reng tawh awm e. Hausak thut duhna smuggling lian tham hi engtik kum aṭanga inṭan nge tih chu sawi fak a har. Mi nawlpuiin kan hriat ve hma khan thil hrang hrang hi dan lovin khawchhak lamah, Burma lamah hralh a tam em em mai a. Thingrai (sandalwood) te, lei ṭha, lei chi (Urea nge DAP fertilizer) te pawh Mizoram lama a hmang ve duh te chan tur awm lo khawpin a zuartuten khawchhak lamah an phur chhoa, an han hralh ṭhin a nih kha. Khangte kha a tawlh rutu leh mipuite ngei pawn Burma ram lama an leilet tih ṭhatna turah kan ngai mai ṭhin awm e. Mahse, a lo ni chiah em, kan sawi zel ang?

Thawkkhat lai khan mi nawlpuiin CHAWK-E (AWK-E) kha hralh theih tak tak emaw tiin kan buaipui luih luih a, chutih lai chuan KHEHPUAM hoin KHEHPUAM an lo han tawlh lut hem hem thung a. Chawk-e kha an smuggling hliah khuhna mai mai tih hi tun tlai khawhnu hian kan chiang ve ta chauh a nih hi.

Mizo mipuite smuggling lamah hian kan hriatna a zauh loh avangin, mi nawlpui chuan ‘damdawi’ hi kan haw fawr nalh a. Thil dang lei ṭha, rangkachak, khehpuam, a tir lamah phei kha chuan huat na chang pawh kan hre lo a nih kha. Mahse heng thil hi tuna Meth leh No.4 te nen hian a lo inkungkaih kual vek dân a rawn lang chiang ta tawlh tawlh mai si. Dan phal loha thil tawlh hrim hrim hi i haw vek tawh ang u (kan post hmasa lama khawvel huapa smuggling items nasa zual top 10 kan dah tawh kha). A vuaklet kan tawrh mek dân hi inhrilh fiah leh chuan kan ngai tawh lo.

Kan smuggler ten Burma lama an thil tawlh luh zo zai rah kha, a vawtuin ek a cheh tih ang maiin kan tuar ta mek a nih hi maw. Khua a la tlai lo, kan ṭan tlan chuan kan la hneh thei a ni. Kan zinga hausak chak thut, kut tling loa hausak duh hi mi tlem zawk an ni.

Tun hmaa lei ṭha, lei chi Burma lama an tawlh luhah khan Urea nge DAP fertilizer tam zawk kan hre ve pha lo. Hmuh pawh kan hmu ve pha hek lo. Mahse, UREA fertilizer ang kha an lo tawlh nasa a nih chuan. He urea fertilizer hi No.4 siamna lamah nasa taka hman ṭangkai a ni daih tih hi mi nawlpui chuan kan hre lo ang. (Keini pawh tlai khawhnuah tun hnai thil thleng te nen internet lam aṭanga inzir leh inchhiar var chawpin he thil hi kan rawn ziak a ni).

Tun hnaiah pawh CAFFEINE ANHYDROUS tawlh an man leh tawh kha. He thil hi Meth leh Cocaine an siam chhuah te tihpunna hmanraw ṭangkai tak pakhat a ni (Used in Illicit Drug Synthesis - Some underground labs may use caffeine anhydrous in the production of "bath salts" (synthetic cathinones) or designer stimulants to amplify effects)

Dan phal loh damdawi siam chhuah (illicit drug manufacturing) na hmunah hian Urea fertilizer hi a mah ngau ngau (direct) chuan hman ni lo mah se eng emaw chang chuan amaha awm nitrogen leh chemical awm te chu la chhuakin No. 4 siam nana hman a ni ṭhin.

Urea fertilizer, Heroin No. 4 siamna kawnga an hman sual ṭhin dân chu (scientific term ho hi Mizo ṭawnga sawi a har khawp mai, tin science background kan nei lo bawk a, sawi fuh loh, fiah tawk lo a awm pawn, kan tar lan tum a chian chuan inhriatthiamah tih mai a ngai):

1. Acid-Base Extraction (Acid lak chhuah nan):
Urea hi an chemical sawngbawlna kawnga hydrogen lo adjust nan (acidic & alkine) a hman a ni a. Dan phal loha Heroin No.4 siamnaah hian, heroin hau (crude heroin) lo thlitfim nan, No.4 lo chhuah theih nana hman a ni. Chemical lo pawlh dalh nan leh lo tihdanglam nana hman ṭhin a nia sawi a ni.

2. Adulteration (Pawlh dala tih pun nan): An heroin No.4 siam chhuah kha, eng emaw chang chuan Urea emaw nitrogen telna chemical hmangin an hralh chhuah tur a tam theih nan, tihpun nan an hmang bawk ṭhin.

3. Chemical Processing (Bawlhlo sawngbawl nan): Urea hi no.4 siamna hmanraw pui ber ni lo mahse, amah hmang hian chemical dang no.4 siamna atana pawimawh chu siam chhuah nana hman ṭhin a ni.

No.4 siam chhuah hi dân phal loh leh thil hlauhawm tak a ni a, tur hlauhawm (chemical toxic) acetic anhydride, hydrochloric acid leh organic solvents te chu a sawngbawl nana hman ṭhin a ni.

Urea hi agriculture lama lei tihṭhatna hmanraw tha tak a ni a. Damdawi siam chhuah nana hman sual hi sual (crime) a ni bawk.

Heng thil hi eng vanga rawn ziak vak vak nge kan nih?

1. Kan hmelma (damdawi leh dan loa sumdawnna) te do hneh tur chuan kan hriat chian ve a ngai tak zet.

2. Thil nihna tak kan hriat chian loh ṭhin avangin, dan loa sumdawnna ṭhenkhat chu kan en liam a, sualah pawh kan ngai lo ṭhin hi a dik lo.

3. Damdawi leh dan loa sumdawnna hian kan ram hi a tichhe vek thei tih i hre chiang tlang ang u. Kuhva rah dan loa tawlh te hi mi ṭhenkhat a tawlhtu leh inhnamhnawihte chuan ‘itsikna vang’ ti ten an sawi ngam. Mahse, an sum vir vel lian turu buru hi bank-ah an dah ngam loh avangin kan ramah ngei inflation nasa tak a awm phah mek a. Inhmun nuai 10-15 man te kha nuai 40-50 te a kai phah tak daih hi.

4. Kan ram hi kan hmangaih a nih chuan dan loa thil tih leh a kaihnawih hi kan za vaia kan do a ngai, sawrkar leh pawl anga do hneh mai mai hi thil awlai a ni lo. Keini aia ram changkang lutuk USA te pawn vawiin thlengin Mexico lam aṭanga cocaine lut an la do hneh theih miah loh hi. Mipui kan ṭanrual a ngai tak zet.

*Posted in ZO Tungchaw Facebook Page*

ZO TUNGCHAW