Siamkima Kimna - Rohmingthanga Ralte

Siamkima Kimna 

- Rohmingthanga Ralte

Asst.Professor, GANC.

Tunlai kan thil tawnte nen pawh ngaihtuah zawm thiam tan chuan kan hnam ze phûng leh ṭawng chungchang, Siamkima kamchhuak aṭang hian a lo fiah thin mang e!

MIZONA LEH CULTURE

''Liandala avang hian, ''Pi pu Chhuahtlang'' hi Mizo te rilru leh ngaihtuahnaah hian hlui thei lovin a thar reng dawn a ni''.

 

''Mizo rilruah a thar reng dawn a ni kan tih hian Liandala 'Pi pu Chhuahtlang hlui' hi kan din thar leh dawn tihna erawh chu a ni lo. Din thar leh a hnekin kan Mizo khawsak dan leh nunphung inthlak danglam zel hian 'Pi pu Chhuahtlang hlui' hi kan hlat tial tial zawk dawn niin a lang a. Amaherawhchu kan nun changkang zel hian a hlat deuh deuh emaw kan tih hian a lang fiah tawlh tawlh dawn si a ni. A chhan chu hnam dang finna leh literature-te kan zira kan hriat hnu hian kan hmabak leh tihmakmawh chu mahni inhriat chian leh inen chian hi a nih avang a ni.''

 

Changkangin han inla hawi pir kual vel pawh ni ila. Keimahni-a keimahni chu a bo tak tak thei lo a ni. A theory ang zawng chuan Archetypal Principle Carl. G.Junga te lo sawi tawh kha a ni mai awm e.

 

ṬAWNG LEH SIAMKIMA

''. . . Pu R.Vanlawma nen zan rei tak thlengin Mizo ṭawng chungchang hi kan sawi dun ṭhinin ani chuan, ''Ziah'' tih hi a dik lo a ni, 'Ziak' tih tur a ni,'' tiin tan a khawh ṭhin a; mahse titi danga kan pakai hnu chuan a inveng seng lo a ni ber awm e, a hriat loh hlanah ziah tih hi vawi hnih emaw vawi thum emaw lai a han hmang ṭan kau mai a. A pianpui ṭawng dik tak ni zawk awm chu ziah a lo ni reng mai a; mahse lehkhabua hman atan chuan a pianpui ṭawng chu tidanglam leh siam remin ziak tih hi a hmang lui leh hram ṭhin zawk niin a lang.''

''. . . Grammar in a tum ber chu ṭawng hman dan tur mi zirtir leh kawhhmuh ni lovin, a hmangtuten an hun laia an hman tualleng ber kalhmang sawifiahna (description) a ni zawk tih hi tun lai mi thiamte ngaih dan a ni. Chuvangin ṭawng dik ber, mawi ber, ṭha ber leh lar ber pawh thil awm theiah an ngai lo va.''

 

''Awmna hmun a inthuhmun loh avangin thil thuhmun sawi nan thu mal hrang hman chungchang thuah hian inhmuh hniamna leh innuihzatburna a lo awm chhan hi eng dang vang mah ni lovin, induh tawk leh chapo vang a ni ber. Grammar dan ṭanchhana hman dan dik sawifiah tumtute hian grammatical rules aiin hman dan (usage) hi a upa zawk tih an hre ṭhin lo a ni. Grammar hian ṭawng hman dan (rules) sawifiah a tum eltiang ṭhin a, mahse grammatical rules-a leng ve lo leh khung tel ve theih hauh loh, hman dan chi dangdai tak tak (exceptional cases) a lo tam si avang leh mihring nunphung te, lei te, rilrute hi a thunun theih si loh avangin a sawifiah theih loh a lo tam ta mai a ni.Chuvangin mi thiam thil hre tak takte pawh an lo tawng fimkhur phah ta ṭhin a. ''Chu chu a dik lo,'' ti dawt lovin, ''Chutiang chu kan hman dan tlanglawn deuh zawk a ni em aw?'' ti tein thu zawhna an siam thin a ni.

#ZalennaRam
(Tui hnih lo mai ang, ni hnih vel thimfate nih hi a ninawm ta hle)

 

ZO TUNGCHAW