CAFFEINE ANHYDROUS – DAN PHAL LOH DAMDAWI SIAMNAA AN HMAN ṬANGKAI DAN

CAFFEINE ANHYDROUS – DAN PHAL LOH DAMDAWI SIAMNAA AN HMAN ṬANGKAI DAN

DISCLAIMER: Discussing this for informational purposes is not intended to promote or encourage illegal activities.

ZO Tungchaw ( https://www.facebook.com/ZOTungchaw2RH )

Ni 23.03.2025 khan mi nawlpuiten kan la hriat ngai miah loh thil - Caffein (caffeine anhydrous?) ni ngeia hriat chu Champhaiah tam tham tak an man a. Champhaia hman turin hetiang zat zat demand hi a awm theiin a rinawm loh a. Burma lama kal chho zel tur pawh a nih a rinawm. Smuggling-a kan thil tawlh chhoh te hian min rawn run let mek chu a nih hi a!

(Mizoram Police News-ah chuan heti hian kan hmu : Ni 23.03.2025 khan Champhai Police, Chalbawiha Junction, Khankawn Police Check Gate-a duty te chuan Caffeine ni ngeia hriat barrel 40, pakhat rih zawng kg 25 vel zela rit an man. A vaiin an thil man hi Kg 3,000 niin, Rs. 45,00,000/- (Nuai 45) man hu vel nia chhut a ni . . .)

Caffeine Anhydrous hrim hrim hi chu khap beh thil (prohibited/illegal) a ni lo a, lei mai theih a ni a. A tam thamah erawh chuan, hmanna tur azirin phalna a awm ve a ngai niin a lang? He thil hi dan phal loh damdawi siamnaah hman tlanglawn em em leh an hmanna chhan hrang hrang te chu:

1. A HAU PAWLH DALNA (Cutting Agent) : Caffeine Anhydrous hi cocaine, heroin leh methamphetamine te nena an chawhpawlh fo ṭhin chhan chu, a tihpun nan leh an hlep ṭhat nan a ni a. No.4-ah phei chuan a rawng a tihvar zual bakah, an thil pawlh sawp (damdawi chemical bik) kha tih dalin, an siam chhuah a lo pun/tam nana hman ṭhin a ni.

Caffeine hrim hrim hian kan central nervous system a khawihin, mihringte tha thona a siam ṭhin a. Damdawi (chemical) nena chawlhpawlh a nih khan, damdawi quality chhe deuh pawh kha, a maha mi tiphur thei (stimulant) awm khan lo pui vein, a hmangtute kha phur leh tha tho takin a siam theih phah ta ṭhin (a damdawi lawng ngawt aiin) a ni.

2. A HNATHAWH TIHDANGLAM NAN (Enhanced Effects): Caffeine hrim hrim hian min chawk harhin, min ti harh vang thei (coffee in ṭhin chuan in hria ang). Chutiang a nih avang chuan Amphetamines leh cocaine-a an pawlh chuan ruih a awlsam phah bakah, ruih chhung a tirei thei a ni.

Caffeine hrim hrim hian addict theih thil a nei ve sa bawk a. Chuvang chuan damdawi te nena an inchawhpawlh hnu phei kha chuan ngaihna (addictive) a siam nasa zual ṭhin.

3. A FIR TAWK LOH HLIAH KHUHNA (Masking Impurities): Heng damdawi dan phal loha siam ruih theih chiho hi, dan phal loha siam a nih miau avangin quality a control theih loh. A quality ṭha reng leh duhthusam anga siam chhuah vek theih a ni ṭhin lo. Chuvang chuan an siam chhuah ṭhat loh ho chu a hmel tihṭhat nan, quality ṭha anga a lan theih nana an pawlh a, a hmel a lo ṭhat chuan a leitute leh a hmangtute pawn damdawi quality ṭha tak leiah an inngaih phah ṭhin.

Inchiu nana hman chi damdawiho - heroin leh methamphetamine-ah hian caffeine anhydrous pawlh a nih hian tuia chiah zawp a awlsam phah ṭhin.

4. DAMDAWI A MUMNA MANKHAWMTU (Binding Agent in Pills) – Dan phal loh damdawi siamnaah hian a phut mai bakah, a mum pawh siam ve ṭhin a ni a. Chung damdawi mumte chu a mum anga a awm reng theih nan (a dip/keh darh loh nan) caffeine hi a man khawmtu berah hman a ni bawk ṭhin.

Caffeine hrim hrim hi a man a tlawmin, hmuh pawh a awlsam em em a. Chuvang chuan dan loa damdawi tawlh rutu te hian, an pawlh dal hnuin an damdawi man tih tlawm nan an hmang ṭhin a ni.

5. DAMDAWI LEM SIAMNA (Used in Fake Prescription Pills): Min tiharh vang thei damdawi (stimulant drugs) ṭhen khat - Adderall and Ritalin ang chi te hi, a lem siam nan an lo hmang ṭhin. Mahse, heng damdawi lemte hian caffeine bakah thil hlauhawm methamphetamine or fentanyl te a pai tel thung ṭhin.

Duhtawk phawt mai ang. Sap ṭawng satliah ni lo, medical/science term ang chi hi Mizo ṭawnga dah hram kan tum ṭhin a. Mahse a harsa ṭhin hle a. Chuvang chuan lehlin fuh loh pawh a awm ṭhin ang. Mahse, kan sawi tum erawh a bo phah vek chuang lo (lost in translation) ah kan ngai. Mi tin tan, a fiah thei ang tur berin kan thiam ang tawkin kan ziak ṭhin a ni.

*Posted in ZO Tungchaw Facebook Page*
( https://www.facebook.com/ZOTungchaw2RH )

ZO TUNGCHAW