KAWLTUCHAWI HLA SAWI FIAHNA

KAWLTUCHAWI HLA SAWI FIAHNA

Kawltu chu tuthlawh tihna a ni a. Kawltuchawi chu tuthlawh kenga hlo thlo thin te tihna a ni ber ang chu. 

1. A hla changkhatnaah chuan an thenrual, lawmte nena hlo an thlawh dan a tarlang a. 

An lo, an buh hmun chu ramngaw tha tak ang maiin buh chuan a ti hring mawi em em mai a. Chu hmunah chuan lawmte nen hlim takin hlo an thlo thin a. Rihmim thing rah sava vahui ten hlim taka an tlan ang maiin a inchan a. An hlo thlo tang ri te chu thiam takin an rum nghiai e tiin, an hmabak, an thlawh bak chu thlo zel turin tan an khawh zel a. A changin a sir lamah an han tawlha, hlo thlawh dana an chet vel dan te chu tarlang zelin. Nausen nu leh paten an lawm loh chung pawha hlim taka an nui hak hak mai te inchan zelin, hlo thlawh pah chuan a then an lo zai a. Hlim taka lawmte nena hlo an thlawh thin dan chu changkhatnaah hian min hrilh a ni. 

2. A hla chang hnihnaah chuan lawmte nena an hlim thin dan. Tu dang an ngaih lohzia min tarlansak leh thung a. 

Khuantevik, hma taka hlo thlo thin ten mi dang an ngaih lohzia. Lal nun leh nihna hial pawh an awh bik lohzia uar takin a rawn sawi a. Vanlaizawla muvanlai nuam ti taka a thlawk delh delh ang maiin, lungkham reng an neih loh dan, an hlima an zalen dan a sawi zel a. Chutiang taka thawkrim an nih avang chuan pi pute ro hlu, dar leh thi, pawisa {Rothangpui tih hi pawisa sawina a ni} te chu an inah a rawn lut ngei ang a ti a. Hmanlai angin Sap hoin min awp hnu khan indo leh inrun te a awm tawh loh avangin, hlo te pawh chu ral hlau miah loa an thlawh theih dan te a sawi zel a. Lal nun thlenga an awh lohzia thu min hrilh leh a ni. 

3. Changthumnaah chuan lal khua leh tuite tana an tangkaina leh an khua pawh chu a tinuamtu an nih dan a rawn tarlang a. 

An khaw hausaknate, an lal hausaknate chu hmanlai chuan a khua leh tuite taimak leh thawhrimnaah a innghat thin a. An khua a lo hausaka a nawm phei chuan khawdang atang ten an lo pem thin a. An lal pawn khua a neih len phah theiin, khua leh tuite an ngah phah thin dan a sawi a. Hmun hrang hranga awm te tan pawh mi dang awt loa an lawma an hlim dan sawi zelin. 

Ruahsur hnuaiah pawh nuam ti taka hna an thawh thinzia te a rawn tarlang a. An hmabak, an thawlh bak thlo fai zelin, an hmabak an zawha in lama an haw leh thin dante min hrilh a ni.