Bawrhsap Pisa Pui leh Hman lai thil

𝐁𝐀𝐖𝐑𝐇𝐒𝐀𝐏 𝐏𝐈𝐒𝐀 𝐏𝐔𝐈 𝐋𝐄𝐇 𝐌𝐈 𝐏𝐀𝐇𝐍𝐈𝐇

Tukina, Aizawl DC Pisa kan ka hriat ruala ka rilrua lo lang, Pasalṭha Hranghleia chungchang Bawrhsapin a rel leh R.L Kamlala mi â ang maia a awm laia a hla phuah ‘Suanglung Run’ a mi te kha an ni a.  An thu leh hla chu ral tawh dawn lo mah se an hun laia Bawrhsap Pisa erawh, hman ang a ni ngai dawn ta lo.

R.L Kamlala khan nasa taka rau sang tak a chan avang khan, mi â ang maiin a awm a. An man phah ta hial a, kâwl te an bun tir kha a ni a. Mahse, a rilru kha zawng a lo fim na meuh mai si a. A hla hril Suanglung runah chuan, Bawrsap Pisa pui te pawh a chham chhuak ta hial a nih kha. 

𝙃𝙢𝙖𝙣𝙖𝙝 𝙠𝙝𝙖𝙬𝙯𝙤 𝙨𝙞𝙖𝙝𝙩𝙝𝙞𝙣𝙜 𝙠𝙖𝙣 𝙗𝙪𝙣,

𝙏𝙪𝙣𝙖𝙝 𝙩𝙝𝙞𝙖𝙢𝙩𝙝𝙖𝙣𝙜 𝙣𝙜𝙪𝙣𝙠𝙪𝙖𝙡 𝙝𝙞;

𝙇𝙖𝙡 𝘽𝙖𝙬𝙧𝙝𝙨𝙖𝙥-𝙥𝙖 𝙥𝙞𝙨𝙖 𝙩𝙪𝙖𝙡𝙖,

𝙇𝙚𝙣𝙥𝙪𝙞𝙖𝙣 𝙠𝙖 𝙘𝙝𝙝𝙪𝙖𝙣𝙜 𝙗𝙚𝙧 𝙢𝙖𝙞,

𝙇𝙚𝙣𝙥𝙪𝙞𝙖𝙣 𝙠𝙖 𝙘𝙝𝙝𝙪𝙖𝙣𝙜 𝙗𝙚𝙧 𝙢𝙖𝙞,

Chhak nawrtu Nikuala pasalṭha huaisen zet kha, a kum te a lo tam hnu khan a phun te pawh a lo chiar ve ta deuh a ni ang. Nupa karah thubuai an nei ve ta fo a. An nu Pi Khuangi nen thuchhia an neih ṭumin, ngawi tura a tih hnuah pawh a ngawih duh tak loh avangin a vel ta a.

Pi Khuangi chhungten a thlavang an lo hauh ve si a. Bawrhsap AG Mc Call, ICS hmaah an inkhing ta a. Bawrhsap hmaa a lan dawn chuan Chawngtlai aṭangin thangchhuah diarṭial a khim a, vakul leh vapual chang a tawn bawk a. Thangchhuah puan batin feipui nen Aizawl lam a pan ta vang vang a. Amah mi hmingthang a lo ni bawk a, khawtinah amah en turin ṭhahnem tak an lo awm ziah a ni, an ti. 

Bawrhsap kawtah chuan a lawn chho boh boh a, tualzawlah chuan hlado pahnih a chham zawh hnu chuan Bawrhsap hmaah chuan a ding ta a. He Bawrhsap AG Mc Call-a hian pasalṭha hmingthang, Pawi ral laka Zoram chhantu, khawtlang thlamuan ṭhintu, mi zah kai tak ṭhinin thubuai a nei ta chhen chu upate zah lo, hnam rilru pu lovah amah khingtute chu a ngai a.

 “E, pasalṭha, mihrang, sahrang laka khawtlang leh nunaute chhan ṭhintu in lo ti thinrim zu nia le” tiin a lo ngaidam hmiah mai a ni.

He mi hma pawh hian a nupui Pi Khuangi Pasal hmasa unauten an khing a. Bawrhsap J.Shakespeare-a hmaah an appeal ve leh a. C.I Pu Leta’n a sawipui bawk a. Bawrsap hmaah chuan thiam an chang ta mai a. Hranghleia chuan lawmmanah Sesih lui bula a Tumpang kah ki mawi tak chu a pe a, Aizawl Pisa Pui (DC office) ah an tar nghe nghe. (Mizo Pasalṭhate)