𝐖𝐈𝐍𝐃 𝐎𝐅 𝐂𝐇𝐀𝐍𝐆𝐄 𝐋𝐄𝐇 𝐁𝐄𝐑𝐋𝐈𝐍 𝐅𝐀𝐋𝐋- Rohmingthanga Ralte

𝐖𝐈𝐍𝐃 𝐎𝐅 𝐂𝐇𝐀𝐍𝐆𝐄 𝐋𝐄𝐇 𝐁𝐄𝐑𝐋𝐈𝐍 𝐅𝐀𝐋𝐋

-𝐑𝐨𝐡𝐦𝐢𝐧𝐠𝐚 𝐑𝐚𝐥𝐭𝐞

 Scorpian hla lar chuai thei lo, ‘Wind of Change’ leh ‘The Berlin Fall’ hi a sap ṭawng takin, officiala inzawmna nei miah lo a nih rualin, unofficially-a thuk tak inzawm a ni daih thung a. Berlin fall avanga he hla hi lo piang a ni lo a, he hla pian hnuah Berlin fall an tih, West Germany leh East Germany indaidanna bangpui, ‘Iron Curtain’ an tih ṭhin bawk kha chhut chhiat chauh a ni. 

He hla lo pian dan hi a bulṭhut atanga chhui dawn chuan, Soviet (USSR) history, Bolshevik hun lai aṭanga kaw hreuh ṭan a ngai dawn a. Indopui pahnihna kan hrut chhoh a ngai dawn bawk a. Tin Communism, Democracy te mai bakah, Russia, Germany te hrut kual nual a ngai dawn bawk a ni. A pehhel thei ang bera sawi erawh kan tum ang chu. 

 He hla phuahtu an zaitupa Maine- hian, ‘Wind of Change’ tih hi metaphor (tehkhinna) mawi takin a hmang tih hi lo hre hmasa ila. A tehkhin leh tarlan a tum ber chu, a awlsam zawng bera sawi dawn chuan, “Dan theih loh thil lo thleng” a sawina ang a ni. Moskva, Gorky park, August Summer night a tih te hian awmzia a neih dan chu nakina sawi atan kan khek phawt ang.

𝙁𝙤𝙡𝙡𝙤𝙬 𝙩𝙝𝙚 𝙈𝙤𝙨𝙠𝙫𝙖

𝘿𝙤𝙬𝙣 𝙩𝙤 𝙂𝙤𝙧𝙠𝙮 𝙋𝙖𝙧𝙠

𝙇𝙞𝙨𝙩𝙚𝙣𝙞𝙣𝙜 𝙩𝙤 𝙩𝙝𝙚 𝙬𝙞𝙣𝙙 𝙤𝙛 𝙘𝙝𝙖𝙣𝙜𝙚

𝘼𝙣 𝘼𝙪𝙜𝙪𝙨𝙩 𝙨𝙪𝙢𝙢𝙚𝙧 𝙣𝙞𝙜𝙝𝙩

𝙎𝙤𝙡𝙙𝙞𝙚𝙧𝙨 𝙥𝙖𝙨𝙨𝙞𝙣𝙜 𝙗𝙮

𝙇𝙞𝙨𝙩𝙚𝙣𝙞𝙣𝙜 𝙩𝙤 𝙩𝙝𝙚 𝙬𝙞𝙣𝙙 𝙤𝙛 𝙘𝙝𝙖𝙣𝙜𝙚

𝐒𝐎𝐕𝐈𝐄𝐓 𝐓𝐇𝐀𝐖𝐍𝐓𝐇𝐔 𝐇𝐋𝐔𝐈 𝐂𝐇𝐔:

 Kum 1917 khan Bolshevika chuan an ram sawrkar chu a paih thla a, heta an hmalakna leh an chet dan hi, ‘October Revolution’ tiin an sawi nghe nghe a. Khata ṭang khan Soviet Russia chu a lo piang ta ni a. Kum 1922 khan ‘Soviet Russia’ tih chu ‘Soviet Union’ tiin a hming an thlak leh a, a chhan pawh Trancaucasia, Ukraine leh Buelorussian te nena an inzawmkhawm tak vang a ni.

 Bolshevik hun a tawp a, kum 1924 aṭangin Joseph Stalina’n Soviet ram rorelna fawng chu a rawn chelh ve leh ta thung a. Bolshevik hun laia rorelna aia khirhin ro a rel a, chemhrah lal takin a rawn lal chho ta a. Moscow aṭangin engkim chu a thu hnuaiah a dah a. Amah han khing thei a, han bei thei tur a hriat chu a nuai bo hmiah hmiah zel a. Ṭampui nasa ‘Holdomor (great famine)’ an tih tak pawh, kum 1931-1933 thleng khan an tawrh phah a nih kha. Thingtlang hmun ṭhenkhatah phei chuan mihring sa eina pawh a thleng nasa hle. He ṭampui chanchin hi documentary lamah pawh hmuh tur a awm nual mai. 

Ka film en pakhat a mi phei chu, ram dang British Journalist pakhat kha, Stalina hun laia ṭam lo thleng leh thingtlang lam te tawrhna zirchiang turin Soviet-ah a lut a. An phal lo chung kha, a rukin thingtlang lamah a kal ta a. Hmun pakhatah hian a va thleng a. Vur a sur nasa em em a, mihring hmuh tur pawh an awm lo a. In pakhatah a lut a, naupang ho lo awmin, mei an lo ai a. Eirawngbawl hunah chuan naupang upa ber chu an kawmcharah a chhuaka, a rawn lut leh a. Eirawng a bawl zui a, a bawl zawh chuan a thil siam chu a sem a. An mikhualpa chuan chung ang huna sa an la nei thei chu mak a ti a, a ei ve mai a. A mak tichuan zawhna a siama, an chhanna a hmuh hnuin, kawmchar lamah chuan a va chhuak ta a, naupang chuan an nu leh pa, rilṭama lo tlu hlum tawh te sa chu hlepin, a lo eipui hi a nia. Stalin-a khan an rama ṭam thleng kha a thup tlat nain, a thup zo ta lo a nih kha.

Kum 1939-ah indopui pahnihna a rawn alh chhuak ta a. German chuan Judate man khawm mai duh tawk lovin Europe chu khawmualpui chu laka rorelna hnuaia dah a tum a. Indopui tan tirh lam khan, a hun laia Europea ram lian em em Soviet kha chuan tel ve zai pawh rel lovin kuangkuahin a lo thlir mai mai a. Mahse, Hitlera duhamna avangin Indonaah hnuh luh an ni ve ta a. Hitlera khan ‘Operation Barbarossa’ a tih hmangin Russian lak tumin, a siruk lain a sipai te a thawh tir a. Mahse, Indopui II naa Hitlera tihsual ber anga an sawi ṭhin chu, Hitlera’n Soviet a run ve ringawt kha a ni ta thung. Soviet an run ve ngawta, an lo lian nasa mai si a. Red Army te chu a ngam leh ta si lo. Berlin thleng rawkin an nawr let a, an awp zui ta bawk a nih kha. A vawttuin ek a cheh a, Indopui II-na a lo tawp meuh kha chuan, Europe-a ram tihzau tum lo zawk Soviet chuan ram zau tak a luah phah ta zawk a ni. 

𝐆𝐄𝐑𝐌𝐀𝐍 𝐊𝐇𝐀𝐖𝐏𝐔𝐈 𝐁𝐄𝐑𝐋𝐈𝐍 𝐂𝐇𝐔 𝐇𝐀𝐖𝐋𝐇 𝐏𝐇𝐄𝐋 𝐀 𝐍𝐆𝐀𝐈 𝐓𝐀:

𝙏𝙝𝙚 𝙛𝙪𝙩𝙪𝙧𝙚'𝙨 𝙞𝙣 𝙩𝙝𝙚 𝙖𝙞𝙧

𝘾𝙖𝙣 𝙛𝙚𝙚𝙡 𝙞𝙩 𝙚𝙫𝙚𝙧𝙮𝙬𝙝𝙚𝙧𝙚

𝘽𝙡𝙤𝙬𝙞𝙣𝙜 𝙬𝙞𝙩𝙝 𝙩𝙝𝙚 𝙬𝙞𝙣𝙙 𝙤𝙛 𝙘𝙝𝙖𝙣𝙜𝙚

Indopui a lo zawh khan, German hamlam hun chu engtin nge ni ang tiin ro rel a lo ngai ta a. Yalta leh Potsdam peace conference-ah chuan, German hmalam hun tur chu rel a ni ta a. German chu hmun li-ah ṭhen darh a ni ta a. Khawchhak lam Soviet-in an rawn lak lam chu Soviet lamin an awp zui ta a, ṭangrual pawl ten an rawn lak lam chu USA, Great Briatain leh France ten an insem ve ta thung a. 

Hun a lo kal a, Soviet kha khang lai khan an lian turu em em a, khawthlang lamah lah USA a lo lian ve si, chungnung zawk nih duhna, ‘Super power’ nih inchuhin an inel chho ta a. Cold War a rawn inṭan a, kum 1952 khan East leh West German inkalpawhna tam tak chu khar a ni ṭan a. Berlin aṭanga inkalpawhna erawh hawn zui zel a la ni a. Mahse, kum 1961 a lo thlen chuan sawi neuh neuh a lo tam ṭan a. 

East German lama an hotu pakhat Walter Ulbricht-a chuan, “Indaidanna bangpui (Berlin bikah) hi tuman siam an tum lo” tia thu a sawi zawh hnu lawk chuan, August ni 12-13 zan chuan an inkalpawhna ṭhinah chuan sipai an lo pungkhawm a. Indaidanna bangpui chu thawk leh khatah an rawn siam leh ta rum rum mai si. Zan khat thil thuah ṭhenawmte an inṭhen ta thut a, chhungkua ngei pawh chhak leh thlanga awm turin pawh ṭhen a ni ta pawp pawp mai a. A tirin, thirhlingneiin pal angin an han siam a, a rei zel a cement concrete ngeiin indaidanna bangpui chu an siam phui zui ta a ni.

𝘼𝙣 𝘼𝙪𝙜𝙪𝙨𝙩 𝙨𝙪𝙢𝙢𝙚𝙧 𝙣𝙞𝙜𝙝𝙩

𝙎𝙤𝙡𝙙𝙞𝙚𝙧𝙨 𝙥𝙖𝙨𝙨𝙞𝙣𝙜 𝙗𝙮

𝙇𝙞𝙨𝙩𝙚𝙣𝙞𝙣𝙜 𝙩𝙤 𝙩𝙝𝙚 𝙬𝙞𝙣𝙙 𝙤𝙛 𝙘𝙝𝙖𝙣𝙜𝙚

Berlin bangpui (wall) an tih hi, bangpui pakhat kal tlang tawp ni lovin, pahnih a ni a. Km 155 a sei a ni a, feet 13 a sang niin, sipaiin rip takin an veng ṭhin a ni. Vengtu sipaiten East lam mi West lama kal tum chu uluk takin an vil reng a. A ruka bang lawn liam tum an hmuh fuh chuan an kap hlum mai ṭhin a ni. Kum 1989-ah phei chuan ralven buk 302 lai an siam ta a, kum 28 lai an indaidan lai khan West lam puh ruk tum mi 100 chuang laiin nunna an chan phah hman nghe nghe a ni. He lam chu duhtawk mai ila, sawi vek sen pawh a ni lo ang. A hranga ziah tham lawih a ni. Tichuan ‘Wind of Change’ hla nena a inzawm chho dan kan chhui ve tawh ang.

𝐏𝐎𝐖𝐄𝐑 𝐁𝐀𝐋𝐋𝐀𝐃 𝐇𝐋𝐀 𝐑𝐎𝐏𝐔𝐈 𝐖𝐈𝐍𝐃 𝐎𝐅 𝐂𝐇𝐀𝐍𝐆𝐄 Ṭ𝐎𝐁𝐔𝐋 𝐂𝐇𝐔:

A hmasain, Scorpion te hi West German lam Rock group an ni tih han hre hmasa ila, anni hi US rorelna zalen tak hnuai awm an ni a, an rilru leh ngaihtuahna pawh zalen taka hmang thei an ni. He hla hi Scorpion ten kum 1989-a Moscow an tlawh ṭuma an phuah a ni a. A hma kum hian concert-in Moscow hi an tlawh tawh a. Tichuan, Moscow music peace festivalah a kum leh chuan sawm an ni leh ta a. German mi nimahse, Russia mipuiin an lo lawm em em mai an hmuh chuan an rilru a hneh hle a. Songfact-in an Gutarist Rudolf Schenker a kawmnaah chuan, “Khawvela remna leh muanna thlenna tura thuchah ropui ber kengtu chu an music” a nih thu a sawi nghe nghe. 

An zaitupain Klause Mein-in NMe a hrilh dan chuan, “Kha concert kha, he hla lo pianchhuahna a ni a, Soviet sipai Red Army, chanchinbumi, rimawi tum thiam German, America leh Russia a mi te hi lawng pakhata chuang ho ang mai kan ni a. Mi tin mai chu ṭawng khat hmangin kan inbia a, kha mi zan kha Wind of change hla lo pianna chu a ni ta a ni” tiin.

He hla phuah a nih hian Berlin wall kha a la tlu lo a, he hla an phuah hnuah ṭhiah a nih thu hi ṭhenkhatin kan ngaihhai ṭhin mai thei a. Berlin Wall kum 1989, November ni 9-a ṭhiah a nih khan he hla hi, German inzawmkhawm lehna atana Unofficial songa hman a ni a. Officiala an inzawmkhawmna,  kum 1990, October ni 3 thleng khan hman zui a ni nghe nghe.

Scorpion band hi Hanover khawpui West Germana din a ni a, Berlin aṭanga Km 80 vela hlaa awm a ni. Member te hi Berlin wall hlimthla rapthlak hnuaia sei lian an ni bawk a. Soviet rorelna rawngra chu an mit ngeia hmutu niin, an rilru chhunga thi thei lo a ni. Russia rama concert tura sawmna an hmuh pawh khan, an la urhsun em em a. A vawi khat nan kum 1988-ah Leningrad-ah an album ‘Savage Amusement’ tour an nei a. Western Music (weater music act an ti kher) hmanga Soviet-a concert nei thei pahnihna an nih phah nghe nghe a, anni hma hian Uriah Heep in kum 1987 khan an lo nei tawh a ni.

Kum 1989-ah Moscow Music Peace Festival avangin Russia-ah kalna hun ṭha an hmu leh a. He mi ṭum hian Western band dang pawh an awm nual a, chungte chu Ozzy Osbourne, Motley Crue, Cinderella, Skid Row leh Jon Bon Jovi te an ni a. Mahse, anni ho hi he mi ṭum hian Russia mipui te thinlungah Scorpion angin an tla na zo tlat lo nia. An zaitupa Klause Meine-an kha lai thil thleng a hnua a sawi leh dan chuan, “Khua kha a vawtin, a hnim ruai mai a. Kha hun kha kan tan chuan, zaina hun satliah ni lovin thil dang zawng aia kan hun tawn pawimawh a ni tih kan hria a. A chhan pawh Soviet rorelna khirhzia hmua hretu, kan nuna bet tlat a ni a. Soviet ho awp lam, thir parda (Iron Curtain) hnung lamah khan kan ṭhiante pawh an awm ve ṭeuh si a”. “Khatah khan band zai satliah kan ni loa, kha thil thleng zinga pakhat ang kha kan ni zawk” tiin Rolling Stone kha a hrilh nghe nghe a ni.

Scorpion te hi he Music Peace festival ṭan hma karkhat hmalamah Soviet hi an thleng tawh a. Chanchinbumi-te festival ṭan a nih hmaa an hmachhawnna pakhatah, he hla lo pianchhuahna tura pawlna hi an zaitupa Meine-a hian a lo dawng tawh nia sawi a ni bawk.  

He hla bul inṭannaa ‘Moskva’ tih hi Moscow khawpui a luang tlang lui hming a ni a. He lui leh khawpui hian an hming an inṭawma, Moscow chu Russia ṭawngin Moskva tih a ni.

Ni khat chu an manager Doc McGhee a chuan BBQ nei pahin, chu luiah chuan band member te chu a len kualpui a. Khang hun lai khan Soviet kha a la zalen lo em em a, chutia lawnga han chuan kual vel pawh chu thil awlsam a ni hauh lo. Mahse, kha thil kha concert hriatrengna tura lungphum pawimawh a nihzia a hnuah a sawi leh a ni.

Tichuan, Moskva lui chunga lawnga an han tleng delh delh lai chuan, hun tam tak liam taa, Russian ho hnam nun phung leh an politic te chu mitthla chungin, Meine-a chu ‘Wind of change’ hla thluk hmang chuan an faifuk rat rat a, hla tur chu a thinlung chuan a fawm khawm zel a. 

Rolling Stone chanchinbu a hrilh leh dan chuan, “Kha tia Moskva luichunga kan kal lai khan, lawngah khan band member zawng zawng, MTV journalist leh Soviet sipai Red Army te nen kan chuang khawm vek kha a ni a. Chu chuan ka thinlungah thu rawn sawiin, khawvel mi zawng zawng hi chu lawngah chuan chuangin, ṭawng khat hmangin kan lo inbia a, chu ṭawng chu rimawi hi a ni a” tiin.

𝙏𝙝𝙚 𝙬𝙤𝙧𝙡𝙙 𝙞𝙨 𝙘𝙡𝙤𝙨𝙞𝙣𝙜 𝙞𝙣

𝘿𝙞𝙙 𝙮𝙤𝙪 𝙚𝙫𝙚𝙧 𝙩𝙝𝙞𝙣𝙠

𝙏𝙝𝙖𝙩 𝙬𝙚 𝙘𝙤𝙪𝙡𝙙 𝙗𝙚 𝙨𝙤 𝙘𝙡𝙤𝙨𝙚, 𝙡𝙞𝙠𝙚 𝙗𝙧𝙤𝙩𝙝𝙚𝙧𝙨

  A hla tlar hnihnaa Down to Gorky Park a tih hi kum 1928-a, Moscow-a Gorgy Park hawn a sawina a ni a. He park hi Moskva lui kama awm a ni nghe nghe. Tichuan, he hla tlar hmasa pahnih Moskva luia lawnga an chuan laia Meine-a a rem khawm a ni ta a ni. 

𝙁𝙤𝙡𝙡𝙤𝙬 𝙩𝙝𝙚 𝙈𝙤𝙨𝙠𝙫𝙖

𝘿𝙤𝙬𝙣 𝙩𝙤 𝙂𝙤𝙧𝙠𝙮 𝙋𝙖𝙧𝙠

𝙇𝙞𝙨𝙩𝙚𝙣𝙞𝙣𝙜 𝙩𝙤 𝙩𝙝𝙚 𝙬𝙞𝙣𝙙 𝙤𝙛 𝙘𝙝𝙖𝙣𝙜𝙚

Chutih lai chuan, he hla hi phuahpum a la ni chuang lo a. An manager McGhee-a sawi dan chuan, “Moscow peace fest.-a, a zan hnihnaa kan zai zawh hnua, kan haw lam busa kan chuan lai chuan Maine-a chu ‘Wind of change’ hla thluk chuan a faifuk leh rat rat a. A thluakah chuan hla remkhawm dan tur pawh a awm tawh tih a hriat a. Tichuan, a tukah chuan a hla pumpui chu a rawn nei ta ni”. 

Moscow aṭanga an haw hnu chuan Meine a leh a band te chuan uluk zawkin hla chu an siam ṭha leh a., A hnu thla rei loteah chuan an album ‘Crazy World’ an release-ah chuan a rawn tel ta reng a ni.

 Tichuan, Wind of Change hla chu khawvel duh rawn a rawn ni chho ta a. Ram 12 aia tamah, chart-ah dinhmun sang ber a luah thei a. USA lamah pawh a hit em em mai a, (Europe aṭanga US-a hla hit neih hi a awlsam vak ngai lo) chutih rual chuan Europe lamah thung chuan hla hit satliah ngawt aia pawimawhna a nei a. He hla thuchahin a ken, zalenna leh insuihkhawm lehna, beiseina lo awm te hi mi’n an hmu thiamin an duh phah em em a ni. Politics lam aṭanga thlir pawn, hla pawimawh leh lar tawp khawk a nihna hi hai theih a ni lo.  

 He hla an record dawn hian, an zaitupa chuan faifuka bul ṭanin tih a tum a. Mahse, record company lam chuan chu ngaihdan chu an lo duh lo nasa mai a. A chhan pawh Scorpion band kha hard Rock Group bonra ve tak nia mi’n an hriat mek a ni si a, faifuk nem diaia bul ṭan chu dik theiin an hre lo a ni. Faifuk ai chuan ṭingṭang ri ṭeng ṭang et awt a bul ṭan chu record company lam duh dan a ni.

 Record company duh dan ang chuan ṭingṭang ri ṭeng ṭang et awt chuan bul chu an han ṭan tir ta a. Mahse, a dik hlei thei tlat si lo. A tawp a tawpah chuan Meine-a idea chuan an ti leh ta zawk a ni. Ṭingṭang ri fai leh tliang nalh tak kara lo faifuk hlar hlarh turin thutlukna an siam ta a, an siam sual lo chiang kher a sin. Vawiin thlengin, faifuk hmanga hla inṭanna, mi te hriat hlawh ber hla a ni zui ta zel a nih hi.

𝐁𝐄𝐑𝐋𝐈𝐍 𝐃𝐀𝐈𝐃𝐀𝐍𝐆𝐓𝐔 𝐁𝐀𝐍𝐆𝐏𝐔𝐈 𝐀 𝐂𝐇𝐈𝐌 𝐓𝐀:

 Kum 1989 November ni 9 a lo nih chuan Soviet leh America, Cold war avanga Europe khawchhak lama an intlansiakna pawh chu a lo tawp hnai ta a. East Berlin Communist Party thupuangtu chuan “Berlin khawpui daidanna chu East leh West mite tan inkalpawh tawn theih tawh turin thlah zale a ni dawn” tih a puang a. “Chumi zanlaiah aṭang chuan West German lama cheng te chuan zalen takin an indaidanna bang chu an rawn kan thei tawh ang” a ti a. Chu thupuan hria,  East leh West lama awm mipuite chu an lo pungkhawm chawpchilh nghal ta vak a.  Zanlaiah chuan checkpoint-ah chuan a maka mak a tam an lo tlingkhawm ta hmur mai a. “Gate hawng r’u” tiin mipui chu an au rual dual dual mai a ni.

 Chawlhkar tawp a lo thlen chuan East Berlin mipui maktaduai hnih chuan West Berlin lam chu tlawhin, bangpui bulah chuan zalenna chu lawm tumin an phu suau suau mai a. Mipui zinga ṭhenkhat chuan tuboh te lo kengin, an theih ang angin an indaidanna bangpui chu an han chhu ṭhiat pawp pawp a. Chung ho chu “Mauerspechte” (Wall of Woodpeckers- Bangpui rektu Thloh) tiin an hming lem vuah an ni zui nghe nghe. A hnu chuan Cranes leh Bulldozer te hmangin an bangpui ‘Iron Curtain’ an tih ṭhin chu an chhu darh sawp ta vek a. Kum 1945 hnua, Berlin ṭhendarh a nih hnua an inzawmkhawm lehna hmasa ber chu a lo thleng ta a ni.

𝙏𝙖𝙠𝙚 𝙢𝙚 𝙩𝙤 𝙩𝙝𝙚 𝙢𝙖𝙜𝙞𝙘 𝙤𝙛 𝙩𝙝𝙚 𝙢𝙤𝙢𝙚𝙣𝙩

𝙊𝙣 𝙖 𝙜𝙡𝙤𝙧𝙮 𝙣𝙞𝙜𝙝𝙩

𝙒𝙝𝙚𝙧𝙚 𝙩𝙝𝙚 𝙘𝙝𝙞𝙡𝙙𝙧𝙚𝙣 𝙤𝙛 𝙩𝙤𝙢𝙤𝙧𝙧𝙤𝙬 𝙙𝙧𝙚𝙖𝙢 𝙖𝙬𝙖𝙮

𝙄𝙣 𝙩𝙝𝙚 𝙬𝙞𝙣𝙙 𝙤𝙛 𝙘𝙝𝙖𝙣𝙜𝙚

𝙒𝙖𝙡𝙠𝙞𝙣𝙜 𝙙𝙤𝙬𝙣 𝙩𝙝𝙚 𝙨𝙩𝙧𝙚𝙚𝙩

𝘿𝙞𝙨𝙩𝙖𝙣𝙩 𝙢𝙚𝙢𝙤𝙧𝙞𝙚𝙨

𝘼𝙧𝙚 𝙗𝙪𝙧𝙞𝙚𝙙 𝙞𝙣 𝙩𝙝𝙚 𝙥𝙖𝙨𝙩, 𝙛𝙤𝙧𝙚𝙫𝙚𝙧

𝐍𝐄𝐔𝐇 𝐍𝐄𝐔𝐇:

 Moscow Music Peace Festival huaihawttu hi an band manager Doc McGhee leh Stas Namin niin. An manager pa tea hi Soviet thlawhna turu MIG jet fighter siam chhuaktu kha a ni nghe nghe. MIG fighter avangin Soviet chuan van lamah rei tak chungnungna a hauh a nih kha. Kum 1986-a film an siam Tom Cruise-a channa Top Gun-a pawh MIG jet fighter hi hman a ni nghe nghe.

 Wind of Change hla hi Russian leh Spanish ṭawng pawn record a ni nghe nghe a. Russian ṭawng hmanga zai hi Maine-a hi chuan harsa a tiviau thung a. Mahse, Russia rama an concert a nih chuan a thunawn tal hi chu sak a tum ziah ṭhin. 

 Nobel Prize chawimawina latu Russian President ṭhin Mikhail Gorbachev-a khan Soviet sawrkar rorelna khawng khirh tak kha a rawn tinem ta deuh a, a tawpah phei chuan an system khirh tak kha a tlusawp ta nih kha. Moscow-a Scorpion an lo kal lai kha Russia rama rorelna a chan lai a ni nghe nghe a.

 Kum 1991 khan Gorbacheva hian a hrangin Scorpion te hi zin turin a sawm leh a. Kha lai hun kha Russia ram phelh darh hma dinhmun hlauhawm taka a din mek lai a ni a, Gorbacheva rorel hun kha a chep tawh em em bawk nen, khatiang huna anni hmu tura a sawmna na siam kha, Scorpion te tan chuan chiawimawina ropui a tih loh theih loh. A hnu rei lo teah Soviet chu a tlu chhe ta reng a nih kha. Scorpion te hian $ 70,000 ‘’Wind of Change’ royalty an dawn aṭangin Gorbacheva hi an pe nghe nghe a ni. He pawisa hi, a chanve chu an ta niin, a chanve chu an record company Mercury Polygram ta a ni.

 An hla tawp lama ‘Balalaika’ tih thu mal lo lang hi Russian ṭawng niin, an ṭingṭang chikhat, ṭingṭang pangngai nena in ang ve ṭep niin, a pian, a taksa chu kil thum nei niin hrui thum hmang a ni.

𝘽𝙡𝙤𝙬𝙨 𝙨𝙩𝙧𝙖𝙞𝙜𝙝𝙩 𝙞𝙣𝙩𝙤 𝙩𝙝𝙚 𝙛𝙖𝙘𝙚 𝙤𝙛 𝙩𝙞𝙢𝙚

𝙇𝙞𝙠𝙚 𝙖 𝙨𝙩𝙤𝙧𝙢 𝙬𝙞𝙣𝙙 𝙩𝙝𝙖𝙩 𝙬𝙞𝙡𝙡 𝙧𝙞𝙣𝙜 𝙩𝙝𝙚 𝙛𝙧𝙚𝙚𝙙𝙤𝙢 𝙗𝙚𝙡𝙡

𝙁𝙤𝙧 𝙥𝙚𝙖𝙘𝙚 𝙤𝙛 𝙢𝙞𝙣𝙙

𝙇𝙚𝙩 𝙮𝙤𝙪𝙧 𝙗𝙖𝙡𝙖𝙡𝙖𝙞𝙠𝙖 𝙨𝙞𝙣𝙜

𝙒𝙝𝙖𝙩 𝙢𝙮 𝙜𝙪𝙞𝙩𝙖𝙧 𝙬𝙖𝙣𝙩𝙨 𝙩𝙤 𝙨𝙖𝙮.

(𝘏𝘦 𝘩𝘭𝘢 𝘞𝘪𝘯𝘥 𝘰𝘧 𝘊𝘩𝘢𝘯𝘨𝘦 𝘭𝘦𝘩 𝘉𝘦𝘳𝘭𝘪𝘯 𝘞𝘢𝘭𝘭 𝘤𝘩𝘶𝘯𝘨𝘤𝘩𝘢𝘯𝘨 𝘵𝘩𝘶𝘻𝘪𝘢𝘬 𝘩𝘪 𝘩𝘮𝘶𝘩 𝘵𝘶𝘳 𝘢 𝘵𝘢𝘮 𝘦𝘮 𝘦𝘮 𝘢, 𝘬𝘢𝘯 𝘵𝘩𝘶𝘻𝘪𝘢𝘩 𝘥𝘢𝘯 𝘩𝘪 𝘢 𝘯𝘨𝘢𝘪𝘩𝘯𝘢𝘸𝘮 𝘱𝘢𝘸𝘩 𝘬𝘢 𝘳𝘪𝘯𝘨 𝘤𝘩𝘪𝘢𝘩 𝘭𝘰, 𝘢 𝘤𝘩𝘩𝘢𝘯 𝘤𝘩𝘶 𝘭𝘢𝘬𝘬𝘩𝘢𝘸𝘮𝘢, 𝘪𝘯𝘥𝘶𝘩 𝘵𝘢𝘬𝘢 𝘳𝘦𝘮 𝘢 𝘩𝘢𝘳 𝘳𝘪𝘢𝘶 𝘮𝘢𝘪. 𝘈 𝘯𝘨𝘢𝘪𝘩𝘯𝘢𝘸𝘮 𝘭𝘰𝘩 𝘱𝘢𝘸𝘯 𝘢 𝘣𝘦𝘯𝘨𝘷𝘢𝘳 𝘵𝘩𝘭𝘢𝘬 𝘵𝘢𝘭 𝘤𝘩𝘶 𝘬𝘢 𝘳𝘪𝘯𝘨 𝘵𝘩𝘰 𝘢. 𝘕𝘪𝘬𝘩𝘢𝘵 𝘵𝘩𝘪𝘭 𝘵𝘩𝘶𝘢 𝘻𝘪𝘢𝘩 𝘮𝘢𝘪 𝘢 𝘯𝘪 𝘢, 𝘻𝘢𝘶 𝘻𝘢𝘸𝘬𝘢 𝘪𝘯𝘦𝘯𝘯𝘢 𝘩𝘶𝘯 𝘢𝘸𝘮 𝘴𝘦, 𝘢 𝘴𝘢𝘬𝘢𝘭 𝘥𝘦𝘶𝘩𝘢 𝘻𝘪𝘢𝘩 𝘥𝘢𝘯 𝘱𝘢𝘸𝘩 𝘢 𝘢𝘸𝘮 𝘯𝘨𝘦𝘪 𝘬𝘢 𝘳𝘪𝘯𝘨 𝘢. 𝘒𝘢𝘯 𝘜 Nixon Vanlalruata Rokhum  𝘩𝘪𝘢𝘯 𝘢 𝘦𝘯𝘨𝘢𝘮𝘢𝘩 𝘩𝘮𝘢𝘪𝘯 “𝘐 𝘻𝘪𝘢𝘩 𝘥𝘢𝘸𝘯 𝘢𝘷𝘢𝘯𝘨𝘪𝘯 𝘭𝘢𝘸𝘮𝘵𝘩𝘶 𝘬𝘢 𝘴𝘢𝘸𝘪 𝘦” 𝘵𝘪𝘪𝘯 𝘭𝘢𝘸𝘮𝘵𝘩𝘶 𝘮𝘪𝘯 𝘳𝘢𝘸𝘯 𝘩𝘳𝘪𝘭𝘩 𝘳𝘪𝘯𝘨𝘢𝘸𝘵 𝘮𝘢𝘪 𝘴𝘪 𝘢. 𝘈 𝘣𝘦𝘪𝘴𝘦𝘪 𝘢𝘯𝘨 𝘱𝘢𝘸𝘯 𝘬𝘢𝘯 𝘻𝘪𝘢𝘬 𝘢𝘯𝘨 𝘦𝘮𝘢𝘸? 𝘗𝘩𝘶𝘳 𝘵𝘩𝘶𝘵𝘪𝘯 𝘬𝘢 𝘻𝘪𝘢𝘬 𝘷𝘦 𝘭𝘦𝘩 𝘱𝘢𝘸𝘮 𝘮𝘢𝘪 𝘢 𝘯𝘪𝘩 𝘩𝘪- 𝘙𝘏𝘛)