NAZI
MISUAL 7 SOUTH AMERICA A TLANCHHIA TE
(THE 7
NOTORIOUS NAZIS WHO ESCAPED TO SOUTH AMERICA)
Rohminga Ralte
Indopui II-naa Gernman ho, ṭangrual lamin
an tuk zal hnu khan, Europe khawmualpui, Hitlera’n lalram pathumna (third reich)
din a tumna kawnga mi rawngra ho, an sipai lal, la dam an man si loh te tan
khan a chep tawh em em mai a. Nazi sipai, Nazi party-a nihna sang nei leh an ṭanrualpui
sang tam tak chuan tlanbo a, bihrukna tur an zawng nasa hle a. Tichuan,
Atlantic tuipui kanin South America lamah raltlan anga luhna zawngin,
Argentina, Chile leh Brazil lamah te mi thar angin nun bul thar ṭan tumin an
tlanchhe ta hum hum mai a nih kha.
Argentina bik hian German kha a
rukin a lo ṭan viau ṭhin a ni ang, indo lai pawh khan German mi tam tak ten awm
nan an hmang nasa hle a. Kum 1945 hnua lam phei kha chuan an President Juan
Peron khan Facist thuthlung kha vuanin, German intelligent officer leh an
diplomats te, Spanish leh Italian
lawngchawlhna kal tlanga an bik bo theihna turin phur takin ruahmanna a siampui
a nih kha. Tin, Vatican, Rome lama Nazi raltlan, catholic refugee te kha ṭanpuina
a pe ṭhin a, a ṭhen chu a ruk taka a tih laiin, a ṭhen erawh langsar tak pawn a
ṭanpui ṭhin a nih kha.
Chutianga Nazi mi leh sa te lo ṭanpui
ṭhin a nih avang chuan South America lam chu sual thupbo nan a rem chang tih
hriain, Nazi party leh a thurualpui, Indopui tan tirh leh indopui laia, mahni
mihringpuite chunga rawngra taka che ṭhinte ho tan chuan duhthusam ram a nih
phah ta reng a ni a. German lama sual turu buru pui pui lo khawih ṭhin chuan
South America lamah khan bikbo hlen tumin an tlanchhe ta vawng vawng a nih kha.
Hitlera lal ram pathumna (third reich) din a tumnaa sual tawrawt deuh deuh te
chu, an chanchin tlem in tarlang teh ang.
1.
ADOLF
EICHMAN:
He
pa hmingthan chhan hi, a chhe zawng leh a nun rawng lutuk vang a ni a. “The
Most Wanted Nazi” tih hial a ni. Eichman-a hi Hitlera architechture niin, ‘Final
solution’ (a hlawp hlawpa Juda te urhlumna) Europe-a Juda te urhlumna tura thutlukna
siamtu a ni bawk. Eichmana hi SS-ah lieutenant colonel (SS = Schutzstaffelin = Protection
squad) niin, Juda maktaduai 6 te, Nazi ho thihna campa thah tura lakkhawmnaa an
thluak bur ber a ni a. Europea Juda te zawn chhuah hna, man khawm hna,
phurkhawmna kawngah a remruatna hi hman niin. Thihna camp Autchwitz, Treblinka
leh thihna camp dang Poland rama German luah china thawn liam zung zungtu pawh
a ni.
Mahse,
indopui an lo tawp meuh kha chuan, a lu chunga a meiling chhek khawl chuan a
kang ve ṭan ta a. Mite nunna zah sak hauh lotu chuan a nunna chu a hlut leh em em
mai si a, a sahimna tur zawngin a buai ve ta thung a ni. South America lama
tlan bo dan tur zawngin, hma a la ve ta a. Indopui a zawh khan a pawi khawih
nasatzia kha thup rual ni hek lo le, Austria ram lamah an biru phawt a. Genoa,
Italya Franciscan monk te ṭanpuinain Argentina lama kal theihna tur visa an
ngaihtuahpuia, Red Cross passport dik lo an siam bawk a. Chung hmang chuan kum 1950 khan lawngin
Argentina khawpui Buenos Aires lam chu a thurualpui Ricardo clement nen an pan
ta ni. Tichuan, Buenos Aires ah chuan an nupui leh a fa pa li te nen bul ṭan
tharin, Mercedes-Benz motor siamna lamah te a thawk ta a. Mahse, sual leh sual
lian tak khawihtute hi chuan vanneih chin hi an nei ve ṭhin a. Man chhuah a ni
leh ta tho a ni.
Juda hnam, an mi leh sa ten indopui
II-naa, kha ti taka nghaisak leh tihduhdah an tuar avang khan Indopui zawh aṭang
khan Israel ram leh Juda miten nasa takin ṭan an la ve ta a. An chipui
maktaduai 6 thattute chu eng hunah pawh man chhuah chu an tum ber a ni ve ta
thung a. An spy pawl ropui Mossad ho chuan indopui zawh aṭanga an man hma chu
ni khat te pawh Eichmana chu zawn loh lai an nei ta lo a. Indopui zawh hnu kum
15 hnuah, Daring Operation an tih hmangin kum 1960, May ni 11 khan an man ta
nghe nghe a ni. He ta Mossad hoin an man dan hi film lamah pawh hmuhnawm takin
en tur a awm a. Eichmana hi chiu ruiin El Al Flight tlawhna khalhtu anga thuamin.
Argentina aṭang hian an ru chhuak a ni. Tichuan,
Israel court lamah a chungthu an rel taa, Juda tam takte thihna leh
concentration campa innghaisakna nasa tak avang ten thiam loh chan tir a ni a.
A chungchang hi thla 4 te meuh Jerusalem lam court ah khel a ni a. Tichuan,
Israel court-in a tih ngai miah loh leh awm chhun ‘thi tura thutlukna’ (death
sentence) chu a chungah a tla ta a, kum 1962, May ni 31 khan khaihlum a ni ta a
ni.
2.
JOSEF
MENGELE:
A
hming chhe than dan chu “Angel of Death” (Thihna vantirkoh) tia a hming lem
vuah a ni a. Eichmana dawttu niin Nazi ho zawngtu ten an zawn nasat em em bawk
chu a ni. Amah hi medical doctor niin, Auswitchz campa ‘Macabre experiment’ an
tih hmangin mi tangte nunna hmanga enchhinna a kalpuitu a ni a. He SS officer Mengele
hi indopui ṭan a nih khan khawchhak lam ral hmatawngah Soviet ho lo dang kir
tur zinga dah a ni a, huaisen lawmman tangkapui Iron Cross pawh a dawng nghe
nghe a. Hliampui a tawrh hnuah, chu lai hmuna awm leh tur chuan a fit tawk tawh
lo tiin Auswitchz camp rapthlak lama sawn a ni a. Chutah chuan mi tangte
hmangin, nau phir pian tir dan enchhinna kalpuiin, phir hmangin medical
experiment a ti nasa a. Chuvang chuan naupang tam tak hreawm taka siamin, an
nunna hial a laksak ṭhin a ni.
Ani pawh hi indopui an
lo zawh meuh khan a lu chunga a meiling chhekkhawl chuan a kang ve ṭan a.
German ram chhungah chuan kum 3 chuang chu a biru bo thei a. Mahse, a biru
kumkhua thei dawn lo tih chu a hrechiang hle. Kum 1949 khan Catholic Clergy te
puihnain Argentina chu Italy kaltlangin a pan ta a ni. Argentinaah chuan khawl
dawr te neiin, kum 1958 chuan Uruguay-ah ama hming dik tak chuan nupuite an nei
leh a. Buenos Aires khawpui daifemah te chengin, mahse Eichmana an man thu a
hriat hnu khan a bibo ta a, a hmasa berah Paraguay lamah kalin, a hnuah Brazil
lamah te a tlanchhe kual leh a ni.
Nazi peltute chuan ṭhangkhat lian
chuang an lo zawn tawh a ni bawk chu West Germany chuan Argentina sawrkar hnena
Doctora chu an ram lama thawnlet turin dilna a siam a. A pawi khawih chu
politics lam thil niin, a chungthu chu an rama rel a ngai a ni an ti a. Mahse, Brazil
tuipui kamah, kum 1979 khan tuia a chen laiin a stroke a, tuiah chuan a tlahlum
zui ta a ni. Mahse, amah ngei a ni tih chu kum 1985 khan forensic hmanga test
hnuah hriatchhuah a ni ta chauh a ni.
3.
WALTER
RAUFF:
He
SS officer chepa lar ve dan thung hi chu Mobile gas chamber siamna leh hmanna
tur kawnga mawhphurtu pakhat niin, a kutah hian Juda 100,000 vel indopui
II-naah khan urhlum an ni. United Kingdom spy MI5 ten an chhui dan chuan,
Rauff-a hi motor lian (truck) Gas chambera siam danglamnaa hma latu niin, truck
chuan mi 60 vel phur theiin, an mi man te an phurkhawm laiin, an tlan pahin an
urhlum mai ṭhin a ni. Khawngaihna leh lainatna tel miah loa Judate leh
tualchhunga an mahni lo dotute a urhlum ṭhin dan hi a hming than pui hle a ni.
Ṭangrual sipai te khan Rauff-a hi
indopui zawh hlim khan an man a. Mahse Ameirca ten, indonaa an mi man te an
dahkhawmna (PoW) aṭangin a tlanchhuak a, Italy lama convent pakhatah a biru zui
ta a. Kum 1948 khan Syria tan military
adviser hna thawkin, he mi hnu hian Italy lamah kir lehin, Ecuador lamah a biru
leh ta a, kum 1949 khan ama hming pangngai hian Chile lamah a khawsa zui leh ta
a ni.
Rauff-a hi kum 1958 aṭanga 1962 chhung kha
West Germany spy-ah a la ṭang zui tho a. Chile ah hian King Crab factory-ah
manager hna a vuan a. A awmna chin hi German aṭanga a pension lehkha, a address
thara an lo thawn aṭanga hriat chhuah a ni a. Kum 1962 khan man a ni a, mahse a
kum lehah chhuah zalen leh a ni. Chile sawrkar hian West German-in an ram lama
thawnkira tura a tihna chu a dodal zui a. Kum 1984 khan thiin, a vuinaa kal
German leh Chilean te chuan a thlah nan “Heil Hitler” tiin an au rual nghe nghe.
4.
FRANZ
STANGL:
Thihna
var (White Death) tiin he pa hi a hming lem vuah a ni. A chhan pawh mi tangte a
nghaisaknaah thawmhnaw var a hain, vuakna hruihrual a hum reng ṭhin a. Austria-a
piang niin, Aktion T-4 (dam lo leh rual ban lo te thahna programme) an tiha hma
latu a ni. A hnu lamah Poland rama German awp chhunga Sorbibor leh Treblinka
thihna camp-ah commandant in a awm a. Sorbibora a awm lai, Treblinka lama a
insawn hma hian Juda mi 100,000 chuang a that ngei nia hriat a ni a, Treblinka
lamah hian Juda 900,000 vel a that leh bawk a, he camp hi Nazi ho in Juda te an
thah tamna hmun pahnihna a ni nghe nghe.
Indopui
a zawh khan American sipaiin an man a, mahse Italy a Austrian tan in aṭang hian
kum 1947 khan a tlanchhuak a. A hnampui Bishop Alois Hudala khawngaihna zar
zovin Stangl hi Red Cross passport hmangin Syria lama kalin, a hnu kum 1951-ah
Brazil lamah a kal leh ta a ni.
Brazil
Sao Paulo-ah Volkswagen factory hnuaiah a hming pangngaiin hna a thawk a, kum
1967 Simon Wiesenthal-an chhuichhuakin, man leh a ni a. Simona hi Haulocust aṭanga
dam khawchhuak a ni nghe nghe a, Nazi man hna thawktu hriat hlawh tak a ni nghe
nghe. German lamah a chungthu rel tura thawnlet niin, mi 900,000 thihnaa
mawhphurtuah thiam loh chantirin, dam chhung lung in tang tura tih a ni a. Lungphu
chawlin kum 1971 khana thi ta a ni.
5.
JOSEF
SWAMMBERGER:
Austrian
Nazi niin, SS commandant a ni a. Indopui II-na laia Nazi ho labor camp pathum,
Juda ho bik dahkhawmna leh Poland rama German awp chhunga camp te enkawltu a
ni. German Shepherd ui mihring te bei
tura zirtir thiam tak niin, kum 1942-ah Rozwadow camp, intihluihna hmanga hna
inthawh tirna camp a lo thleng a. A kutah hian mi tang za chuang thiin, a ṭhen
te chu amah ngeiin a kaphlum ṭhin.
Kum
1943-a Przemyśl campa, a ruala mi 500 thahnaah a mawh latu a ni a. Ama kut aṭang
hian mi 35 chu he campah hian kahhlum an ni bawk a, an hnung lam aṭangin an
nghawngah a kap ṭhin a ni. Auschwitz lama mi tang te thawn hna thawktu a ni
bawk a. Kum 1944 khan Mielec Juda khawpui an tiha Juda te thenfai hna thawktu a
ni bawk. A kalkawngah chuan ruang a darh nuai ṭhin tiin Simon Wiesenthal chuan
a sawi nghe nghe a ni.
Kum
1945-ah Austria-ah man a ni a, kum
1948-ah Italy tannin aṭanga tlan chhuakin, thla khat hnuah Argentina a thleng
a. He tah hian a hming pawh thlak loin zalen takin a cheng a, Argentina khua
leh tui nihna pawh a nei nghe nghe a ni.
Kum
1973 khan West Germany chuan an rama thawnlet turin Argentina sawrkar a ngen a.
Mahse, a tlanbo zui ta daih a, German sawrkarin a awmna hrilh thei hnenah
Dollar 300,000 a phal hnu chuan, kum 1978 khan Argentina official ten an man
leh ta a ni. Kum 1990-ah Germanah a chungthu rel ṭan a ni a. Thuhretu chuan. Josef-a
hian mi tang te chu meipuia thehluh ṭhin thu te, Juda ho an thah te phum khawmna
hmun bula, mi ṭhingṭhi lai a thah ṭhin dan te, naupang lu bang vuak nana a hman
ṭhin dan te an sawi a. Hetiang a tih ṭhin chhan hi a silaimu a ui vang a ni an
ti. Kum 1992 khan thiam loh chantir niin, dam chhung tang tura a chungthu rel a
ni a. Kum 2004 khan kum 92 mi niin a thi ve ta a ni.
6.
ERICH
PRIEBKE:
SS
commander niin, Gestapo (Nazi Police) member a ni bawk a. Kum 1944-a Rome Ardeatine
puka thil rapthlak tak tihnaah khan a tel a. Nazi ho chuan mi 334 chu he tah
hian an talh a, a chhan pawh an mi leh sa 33 chu Italy-a anmahni lo dodaltuten
an lo thah vang a ni a. Erich-a hian Italian mi pahnih a thah thu chu a pawm
rualin, thupek a zawm mai thu a sawi thung a. Tin, Roman Juda 2000 Auschwitz
campa thawnna tura hming sign tu a ni bawk a ni.
Kum
1964, kum thar hma niin British ho mi tang dahkawmna hmun aṭangin a tlanchhuak
a. Thirhling nei chu a vengtute zu ruih laiin a tlanchhuah theih nan a tan chhum
a ni. Bishop Alois Hudal ṭanpuinain, Red Cross passport lem hmangin kum 1948
khan Argentina lamah a tlanchhe thla a. Idyllic tlangrama San Carlos de
Bariloche-ah khawsain, ha tah hian a hming pangngaiin German sikulah a thawk ta
a ni.
Kum 1944 khan ABC chanchinthar
lakhawmtu Sam Donaldson-an a kawmna a ṭangin a hun hmalama a awmdan chu
hriatchhuah a ni a. Italy lamah thawnlet niin, he tah hian thiam loh chantir niin,
dam chhung tang tura a chungthu rel a ni. Kum 2013 khan kum 100 mi niin a thi
a. A vuinaah hian Facist duh pawl leh duh lo pawl an intibuai nghe nghe a. Argentina
lamin an rama phum an phal loh avangin, a ruang chu tuma hriat lohna hmuna phum
bo a ni ta a ni.
7.
GERHARD
BOHNE:
Dan
hre mi leh SS officer a ni a. Hitlera
lal ram pathumna din tumna kawngah khan, ngawr enkawlna hmunah thawkin. Aktion
T4 (rualban lo te thahna) program hlawhtlin theih nana bungraw lakhawmtu a ni.
Amah chuan, lainatna nena mi thattu (mercy killer) tiin a insawi a, Aryan thlah
bik ho chauh an awm theihna tura awmze nei taka hma latu, rilru leh taksa lama
rualbanlo te thattu a ni a. He program ah hian German mi 200,000, tihdam theih
loh natna vei te chu tihhlum tel an ni a. SS Bohna agent chu thu dik lo leh
eirukna avanga Nazi party aṭanga ban a nih hnu khan, a huho a mi thah enchhinna
kha kalpui ṭan a ni ta nghe nghe a
Kum 1949-ah Argentinaah a tlan lut a,
a nihna chu ‘Technician’ tia thupin an ram President Juan Peron a hnuaiah a
thawk a. A hnu chuan hriatchhuah a ni
ta tho a.
Perona rorelna paihthlak a nih khan,
Germany lamah a tlan let leh a. Kum 1963 khan Frankfurt court chuan a chungthu
a rel a, bail in a chhuah a. Argentina lamah bawk a tlan thla leh a, a hnu kum
thumah German lamah man let leh niin, a chungthu rel leh a ni a. Mahse, a
hriselna te a lo ṭhat tawh loh avangin, an sezawl chhuah ta mai a. He mi hnu kum
15 chhung chu a la dam zui leh ang lawi a, kum 1981 khan a thi ve ta a ni.
An sual pawi khawihIN a vuaklet dan
hi, a namai lo viau mai. Indopui zawh lama an dam chhung khan thlabar leh hlau
reng rengin hun an hmang dawn tih a hriat a. Sual pangngai hi a awm laiin,
nunrawnna nena sualna hi chu a vuaklet pawh a na viau a nih hi maw! CHU TEH!
Refgerence:
https://www.history.com/news/the-7-most-notorious-nazis-who-escaped-to-south-america
ZO TUNGCHAW
Comments
Post a Comment