𝐌𝐀𝐍𝐂𝐇𝐄𝐒𝐓𝐄𝐑 𝐔𝐍𝐈𝐓𝐄𝐃 𝐋𝐄𝐇 𝐋𝐈𝐕𝐄𝐑𝐏𝐎𝐎𝐋 𝐈𝐍𝐇𝐔𝐀𝐓 Ṭ𝐀𝐍𝐍𝐀 𝐓𝐇𝐀𝐖𝐍𝐓𝐇𝐔 𝐇𝐋𝐔𝐈 𝐀Ṭ𝐀𝐍𝐆𝐈𝐍 - Rohminga Ralte

𝐌𝐀𝐍𝐂𝐇𝐄𝐒𝐓𝐄𝐑 𝐔𝐍𝐈𝐓𝐄𝐃 𝐋𝐄𝐇 𝐋𝐈𝐕𝐄𝐑𝐏𝐎𝐎𝐋 𝐈𝐍𝐇𝐔𝐀𝐓 Ṭ𝐀𝐍𝐍𝐀 𝐓𝐇𝐀𝐖𝐍𝐓𝐇𝐔 𝐇𝐋𝐔𝐈 𝐀Ṭ𝐀𝐍𝐆𝐈𝐍

-Rohminga Ralte

(A va sei ve ti tur tan chuan melh pawh melh a peih awm loh ang. United leh Liverpool inkar thu hi hriat tur leh hmuh tur tam tak a awm mai thei. Mahse, ziaha dah ve ngei ka duh avangin, kan bitum ve a nih hi. I duh leh chhiar la, chhiar lo la, a pawi lem lo e. Typo pawh a awm pawn, lo melh kan ru, ka taimaknain a tlin tawh rih lo)

𝐈𝐍𝐇𝐔𝐀𝐓 Ṭ𝐀𝐍𝐍𝐀 𝐊𝐀𝐖𝐍𝐆 𝐂𝐇𝐔 𝐋𝐀𝐖𝐍𝐆 𝐊𝐀𝐖𝐍𝐆:

Mizorama chanchinṭha rawn luh kum, kum 1894 khan, sap ram lama Manchester khuaa sumdawngte chuan, lawng kawng (ship canal) chu Liverpool lawng chawlhnaa chawl tawh lo turin, sumdawng hote sum hmangin an lai ṭan ve mek a. Eng vang a chu lawng kawng chu lai nge an nih tak? Eng dang ni lovin, England hmar thlang lama lawng chawlhna hmun lian tak neitute chu Liverpool te an ni a. Khang hun lai khan Manchester kha thawmhnaw lama sumdawnna lian em em neitu an lo ni ve mek bawk a. Liverpool lah, lawng chawlhna hlawk zet neitu an lo ni ve mek si.

Manchester aṭanga an thil thawn chhuah leh lakluh reng reng chuan Liverpool lawng chawlhna lam chu a paltlang zel a ngai si a. Liverpool sumdawng ho lah chuan dim baksak loin, an lawng chawlhnaa lawng chawlh man leh chu lai hmun an paltlang man chu dim hauh lovin sum tam tak an lo lak sak nghek nghek ṭhin a. Chuvang chuan Manchester lam sumdawngte hlawk vena tur chu tam takin a kiam phah ṭhin a. Chung te hrereng chuan Liverpool lawng chawlhna lam chu tlawh tawh loa, Irish tuipui aṭanga Manchester lama, lawnga pumpelhna tur lawng kawng chu laih a ni ta a ni. An laih zawha, hman an nih meuh chuan Liverpool lama sumdawngte chuan an tuar ve ta hle thung a. Chem loa lu lak an sawi ang maiiin, hna nei lo, hna chan phah leh lawng chawlhna aṭanga eizawnna tam tak chu mi tam takin an chan phah ta ve thung a ni.

Kum za chuang mahni sakhaw dik tak ni lo vuan ta te zingah, Kristian inti si a, dik awm bera lang, dik tak tak si lo, kawra hmanga kan tam avangin, kan ram kalphung leh inrelbawlna pawhin a tuar chhoh em em lai hian, Manchester leh Liverpool te inhuatna mei pawh chuan mit lam aiin alh lam a pan zel a. Kum za chuang lo inhaw tawhte hi kum tlem tea inrem leh ngawt thei lah an ni tawh hek lo.

Manchester leh Liverpool khua te hi Mel 35 (km 56) leka inhlata awm an ni a. England hmar thlang lama khawpui lian pahnih an ni dun a. Rel (steam engine hmang) kawnga, khawvela khawpui thlunzawm hmasak ber pawh an ni nghe nghe. Kum zabi 19 naah khan Manchester leh Liverpool te hi sumdawnna lama hlawhtling dun em em an ni a. Manchester lamin Factory an kalpuiin, la an thar chhuak hnem hle ṭhin a, la an ngah em avang hian ‘cottonapolis’ tite pawhin an lo sawi tawh ṭhin (Hei vang hian United Jersey 2012/13 aṭang khan Gingham (puanchei ang chi a zeh) print chu hman a ni ta bawk a). Chutih laiin Liverpool lam thung chuan Lawng chawlhna hmangin sum an lo rut ve ṭun ṭun ṭhin thung a nih kha.

Kha kum zabi tawp lam aṭang khan, a hmaa kan sawi Manchester lawng kawng kha laih zawh a lo niin hman theih a lo ni zui ta a. Chu chuan inrem lohna nasa tak a rawn hring chho ṭan ta a ni. Sumdawnna kawnga inhaw ṭan ni mah se Manchester leh Liverpool khaw original hote chuan, an inzawmna hi a ṭhat chuan England hmar thlang lama ropuina leh chungnungna chu an kutah a awm reng dawn a ni tih an hre ru reng tho a. Chu mi tur pawh chuan inzawmna ṭha zawk chu kalpui chu an tum ve zel tho a, mahse...

𝐊𝐇𝐄𝐋𝐌𝐔𝐀𝐋 𝐂𝐇𝐇𝐔𝐍𝐆𝐀 𝐈𝐍𝐃𝐎𝐏𝐔𝐈 𝐏𝐀𝐊𝐇𝐀𝐓𝐍𝐀

Mizorama chanchinṭha luh kum tak kha Manchester United leh Liverpool tan erawh an inkara chanchin chhe thlen kum a lo a ni ve thung a. Manchester lamin, Liverpool pumpelh lawng kawng an laih zawh aṭanga thla thumnaah chuan an pahnihin intihsiakna (competitive match) inkhel hmasa ber chu an hmachhawn dun ta a.

Manchester United hi Newton Heath L.Y.R FC tiin kum 1878-ah Railway hnathawktu hoin an din a ni a, kum 1902-ah Manchester United hminga thlak a ni. Kum 1886-ah an competitive inkhel hmasa ber neiin, F.A Cup 1886-87 first round an khel a. Liverpool hi 1892-ah Everton Board ho leh an President John Houlding Anfield khelmual neitu, nena inrem lohna avanga din thar a ni a. Everton ho chu Anfield aṭangin Goodison Park-ah a insuan ta bawk a. Everton leh Liverpool pawh hi khaw khat club inhal kumkhua an nih phah zui ta bawk. Johna ho hian Anfiled lam chu an chang zui ta a, an pahnih inkhelh ṭuma, Liverpool fan ten, “You should have paid the rent” tia Everton fan te an zai khum khan engkim a tichiang mai awm e.

Kum 1893/1894 season chu Newton Heath lam tan kum tluanin khua a dur a ni mai a. Table-ah a mawng berah awmin, Liverpool lam chu Second Division-ah tumah hnehtu nei loin fawr takin an kal a. Kum thara First divisiona khel zawk tur, seat khat la awm chu Newton Heath nen palyoff hmanga zawn a ngai ta a. Liverpool hian 2-0 a hnehin, Newton Heath chu Second division lamah an tlak phah a, Liverpool lah First division an lawn kai ve phah thung a. He inkhel result aṭang hian sumdawnna kawnga inhuatna chuan field chhunga indonaah a hruai lut chho ta zel a ni.

𝐊𝐔𝐌 𝟏𝟗𝟎𝟎 𝐂𝐇𝐇𝐎-𝐀𝐇

Kum 1900 chhoah chuan Liverpool lamin League title hmasa ber chu kum 1901-ah an la ta a. A pahnihna atan kum 1906-ah an lak chhunzawm leh a. Man United lam pawh fisrt division lamah an lo let leh tawh bawk a. Kum 1908-ah chuan an league title hmasa ber an la ve ta bawk a. An Charity Shield hmasa ber an la zui bawk a. A kum lehah F.A cup an la zui leh bawk a. Kum 1911 ah League Cup leh Charity Shield an la leh ta bawk a.

Indopui pakhatna avangin inkhel chu chawlh a ngai a. Kum 1919-ah an han chhunzawm leh a. Liverpool lam chu kum 1922, 1923 ah te champion lehin, United chu 1923-ah an relegate zui leh a. Kum 1923 aṭanga 1947 an pahnihin an NIL chho ta char char a, Liverpool lamin League cup an lak leh hma zawng kha chu an kut chi lo hawi ve vel mai mai a ni. Mahse, an tana khuanu ruat chu an chungah a ṭha lam zawngin a rawn thleng ta zel a.

𝐊𝐔𝐌 𝟏𝟗𝟒𝟎 𝐀Ṭ𝐀𝐍𝐆𝐈𝐍

Kum 1945 a lo inher chhuah chuan United Legend Matt Busby kaihhruaina hnuaiah United chu pangngai takin an kal chho ta a. Busby hi United hmelma kumhlun Manchester City leh Liverpool player ṭhin a ni mauh thung a. City tan vawi 204 leh Liverpool tan vawi 115 khelin, Liverpool Captain te hial a ni ṭhin nia!

Busby hian inkhelh a chawlh san hnuin, Livepool lam hian an Assistant Manager hna pek an tum a. Mahse, Busby hian duh lovin, a lo tum rilruk lam chu phalsak turin a ngen ta zawk a. Man United lamah kalin, manager hna chu a dil a. Mahse, manager game enkawltu satliah ni lovin, training naah te, transfer chungchangah te a inrawlh ve vek an phal sak a phut a. Club official ho aiin game ṭhatna tur hre zawkah a inngai bawk a. Tichuan a hun laia mi te rinphak miah lovin United manger hna chu kum 3 atan contract an ziak ta a, mahse club thuneitute a hmin viau a ni ang, kum 5 atan inremsiamna an nei leh ta zawk a ni.

𝐁𝐔𝐒𝐁𝐘 𝐇𝐍𝐔𝐀𝐈𝐀𝐇 𝐔𝐍𝐈𝐓𝐄𝐃 𝐀𝐍 𝐕𝐔𝐋

Busbya hian United chu hlawhtlinna a chanpui nghal rum rum lo a, pangngai takin an kal ve bek bek a. Kum 1947, 48, 49, 51 ah te league runners up a nihpui a. Kum 1946/47-ah phei chuan Liverpool chu point khat leka pha lovin, runners up a nihpui a. Kum 1948 ah chuan F.A cup lamah a champion pui ta a. Kum 1947 khan Liverpool lamin League cup an lo chawi ve thung bawk a. Mahse, heng hun lai hian an pahnih hian an hlawhtling lo dun viau thung. Kum 1923 aṭanga an artelukawn chhoh fo hnuah, Zoram buai hma hret kum 1964/65-ah chuan ‘Famous trinity Goerge Best, Dennis Law, Bobby Charlton’ te hmang chuan Championship title chu United chuan an la ve leh ta a. Liverpool lam an lo tlahniam ve leh mek laiin United erawh an lawn sang ve leh ta thung a.

Busbya khan kum 40 chuang hnuah league tilte chu kum 1952 khan a lakpui leh kha a ni a. Heng hun chhoh hian United chuan an hmelma Liverpool lakah chungnungna an khum chho ngar ngar a. First divisionah chuan kum 1952, 1956, 1957, 1965, 1967 ah te Busby a hnuaiah Champion an ni chho a. Kum 1963- khan F.A cup an chawi bawk a. Kum 1968 chuan Wembley-ah, Benfica 4-1 a sawpin, English club zinga European Cup chawi hmasa ber an ni zui ta bawk a ni.

Kum 1960 chho hian Liverpool lam pawh Bill Shankly a hnuaiah an par vul ve leh mek a. 1962-ah first division lamah an lut cho ve leh a. Kum 1964 leh 1966 an champion ve leh bawk a.

Busbyan United tana a hnathawh hi Real Madrid lam pawn an lo hmu hmaih i khaw lo a. An manager turin an sawm ta reng a. Real President chuan, “Santiago Bernabeu chu Paradise ang maia nuam a ni” tiin a sawm a. Busbya chuan chu sawmna duhawm chu “Manchester hi ka vanram a ni” tiin a lo chhang ve thung.

Kum 1967 leh 1968 a European cup an chawi hnu khan United chu an kut a chawl leh ta vang vang a. League title lam pawh la thei lovin hun rei tak chu an awm ve leh a ni.

Hetih lai hian kum 1970 chho aṭang khan kum 1990 thleng chu Liverpool lam vul vanglai a thleng chho ta thung a. Kum 1973a Shanklya manager na hnuaiah League cup an chawi a. Mi te mak tikhawpin Liverpool chu an rawn chungchuang chho ta a. Kum 1974-ah Shankly a chuan F.A cup a champion pui hnuah a bang zui ta a. Kum 1974-1991 inkar hian Liverpool lam hian Manger pathum Bob Paisley, Joe Fagan leh Kenny Dalglish te neiin, hlawhtlinna nasa tak an nei chho zawt zawt a. Kum 1974 khan Shanklya lo champion puina nen, League title chu 11 lai kum 1990 khan an la hman a ni.

Liverpool chuan European Cups chu kum 1977, 1978, 1981, 1984 ah te an chawi zui bawk a. European Super Cup chu kum 1977 chawiin, Uefa Cup chu kum 1973 leh 1978-ah an chawi bawk a. Heng lai hian Liverpool hi tuma el phak lohin an vawklallen a ni ber a. Mahse, United bawk lo langin kum 1977 F.A cup finalah Liverpool chu hnehin, Liverpool ho Treble Champion an nihna tur chu an laksak a ni, Liverpool hian League cup leh European cup te an lo chawi tawh a (Liverpool hi chu chipchiar lutuk ka ziak peih lo

).

𝐊𝐔𝐌 𝐙𝐀𝐁𝐈 𝐓𝐇𝐀𝐑𝐀𝐇 𝐔𝐍𝐈𝐓𝐄𝐃 𝐓𝐇𝐀𝐑 𝐀𝐍 𝐋𝐎 𝐋𝐀𝐍𝐆 𝐓𝐀

Kum 1990 a rawn inher chhuak a, khawvel changkanna pawhin hmasawnna nasa tak a nei a. Liverpool in kum 1990-a an league title an chawi hnu khan, ṭhangkhat lian chuang fe an PUL chho dawn a ni tih chu tuman an ring lo ang. Kum 1992-ah Championship chu English Premier League tiin a hming thlak a rawn ni a. Inkhel chu T.V lama tihchhuah turin inremsiamna te a lo awm ta a. Chuta ṭang chuan club lamin sum an hmu tam chho ta ṭan a. Chu hun chiah chu Manchester United chuan an hmang ṭangkai ta chaih mai a. Pawisa an lo nei ta hlawm a, players ṭha pawh an lei chho ta sup sup a.

Man United chu kum 1986 aṭang khan Sir Alex Ferguson a chuan a lo enkawl tawhnain, Kum 1990 hma lam zawng kha chuan eng a an pui thei bik lo a. manager hna a chelh tirhin United chu an League-ah 21 na ni mekin, 11 na dinhmun a thlenpui a. Kum 1988-ah 2 na dinhmun an hauh chho lehin , Liverpool chu point 9 in an phak lo a ni. Kum 1989/1990 season-ah phei chuan fans leh press lam aṭangin SAF chu bang se titu an tam hle. Old Trafforda an banner pakhatah phei chuan, “Kum 3 chhung kan hrethiam tawh che, mahse ek mai I ni…ta ra Fergie” tih an tar khum hial.

He season-ah hian mak tak maiin, Nothingham Forest ṭhat vanglai a ni nen. FA cupa an intum hunah, an chak loh chuan SAF hi ban nghal a nih an ring ṭhup a. Team ṭha zawk Forest ho chu United chuan 1-0-in an hneh ta hlauh a. SAF dinhmun pawh a him phah ta bawk a ni. United chuan FA cup an chawi zui a, SAF-án United tana a trophy chawi hmasak ber a ni zui ta bawk a ni.

Kum 1990/91 ah United chu table-ah 6na niin, European Cup Winners’ Cup an la hlauh thung a. He season hi United tan chuan season chhe tak an ti nghe nghe. League cup leh Uefa super cup chawi mahse, League tilte erawh Leeds an hneh loh avangin an chan ta a.

𝐙𝐎𝐑𝐀𝐌 𝐌𝐈𝐏𝐔𝐈𝐈𝐍 𝐊𝐀𝐍 𝐇𝐌𝐄𝐋𝐇𝐑𝐈𝐀𝐓 𝐓𝐀𝐊 𝐓𝐀𝐊 𝐇𝐍𝐔-𝐀𝐇

Liverpool FC hi EPL clubah chuan ka hriat hmasak pawl an ni a. 1990s chhoa a, an league Bangladesh TV aṭanga kan hmuh ṭhin kha, ka uipui tuilian thlir ve vel mai mai ṭhin a. Ka la hriat reng chu an goalie ten ball an petna kan ti ṭhin hle. An area aṭangin lehlam keeper area kha dead ball nen lam an pet thleng ṭhin a. Liverpool player ah chuan mi hang John Barnes (Liverpool 1987-1997) ka hre hmasa ber bawk a. Khang lai khan ka ralkhat ṭan ve mai mai a.

Kha mi hnu khan thingtlang lama kan awmzui zel avangin EPL pawh hi ka en har hle. 1998/99 aṭangin ka en chho leh a. United-in 1999 a treble champion dinhmun an luah khan, rilru leh thlarauin United kan ṭan chho ve ta a ni a. United han ṭan chhoh takah chuan Liverpool nena han ṭan kawp chu a har chho ta tulh tulh a. Steven Gerrarda back pass sual luih avanga Man United an champ loh tak aṭang phei kha chuan amah leh Liverpool ngeina hi a liam so bawrh bawrh a ni mai (a tawlh thluk ṭum nen khan hriat pawlh lo ila, Chelsea point 4 in an champ phah tak ṭum kha a ni a. United a vawi 19 nana an champ ṭep ṭum a ni thung).

𝐏𝐋𝐀𝐘𝐄𝐑𝐒 𝐈𝐍𝐋𝐄𝐈 𝐓𝐀𝐖𝐍 𝐋𝐎𝐇𝐍𝐀

He club pahnihte inhuatna hi field pawn aṭanga inṭan a nih avangin, an hliam hi a thuk a, dam mai chi a ni lo a. Chuvangin an pahnih inkarah pawh hian an players te direct-a transfer hi a awm mang lo reng a ni.

Player 9 chu kum 1964 hma lam direct transfer khan an awm ve a (kan thai lang lo mai, google it). Tom Chorlton's kha kum 1912-ah a hmasa ber atan Liverpool aṭanga United-a insawn a ni a. Kum 1964-a Phil Chisnall kha Manchester United aṭangin Liverpool-ah a pakai bawk a. Kha kha club pahnih inkara direct-a player transfer hnuhnung ber a ni zui ta bawk (Senior player-ah).

Direct ni lo, club danga luh kual hnua club pahnih tana khel kawp pawh an tam vak lo a, a lar zual chu Paul Ince kha Inter Milana a kal hnuin Liverpool a zawm a. Owen kha Madrid-a a kal hnuah United a zawm ve leh a nih kha.

 

Tun hnaiah kum 16 mi Ethan Enis chuan Liverpool contract chu hnarin, Man United a zawm ta daih a. A direct transfer ang hrim hrim chuan kum 1964 hnua a hmasa ber a ni leh ta a. Mahse, senior team lamah erawh kan la hmu har deuh mai thei a.

An club pahnih inkara players inlei tawn hi an ti lo bur tih a chianna chu, Argentina left Back Gabriel Heinze kha kum 2007 khan Liverpool lamah kal a tum a. Mahse, United thuneituten phal lovin, kum 43 chuang lai indawr tawn lohna dan an lo kalpui tawh chu vawng zelin, Heinze chu Real Madrid lamah a liam ta nih kha. Heinze-a kha, “United i chhuah san dawn chuan foreign club loah chuan i kal thei lo ang” tia hrilh a lo ni bawk a, SAF-an United history nen an sermon khum hrep bawk a ni.

EPL ṭan a nih hmain, Liverpool club record hi a chungnung larh a. Vawi 18 lai league no mawi an chawi a. EPL ṭan a nih hnuah erawh an artelukawn chho ta char char a, tun hnaiah tak tak Salah te rawn awm hnua, Klopa hnuaiah an champion veleh ta chauh a ni a. Chutih laiin, Europe lamah erawh English club zinga record nei ṭha ber an la ni zawm zel a.

EPL ṭan a nih hnuah United an rawn chungnung ta thung kan tih tawh kha. Liverpool record um thei bertu pawh an ni zui a. An history hmangten an lo indeu nasain, an lo incheksawlh nasa hle ṭhin reng a ni. Man United hi Chhampionship leh EPL ah vawi 20 an champion tawh a, Liverpool hi vawi 19 champion-in EPl bikah vawi khat an rawn champion ve ta a. Europe lamah Liverpool lam hi vawi 6 champion tawhin, United hi vawi 3 an champion ve tawh thung a ni a.

𝐂𝐎𝐌𝐄 𝐁𝐀𝐂𝐊 𝐖𝐇𝐄𝐍 𝐘𝐎𝐔'𝐕𝐄 𝟏𝟖!

Kum 1994 season a ni a, United chu an parvul chho mek a. Anfiled-ah an hmelma kum hlun Liverpool chu Cantona hoin an va hma chhawnah. An fieldah chuan Kop hovin, banner-ah, “Au Revoir Cantona and Man United Come Back When You’ve 18 (Cantona mangṭha le, vawi 18 in champion hunah i lo kir leh dawn nia)” tih chu an lo tar khum hep mai a. Man United player te leh fans te tan chuan khawvela banner hmuhnawm loh leh anmahni hmuhsitna nasa ber a ni hial awm e.

Liverpool vanglai leh ṭhat chhoh laia an record chu an chhuang hle a, vawi 18 champion-in, Club dang tana vawi 18 champion chu vana lawn tum ang vel harsa a ni ve bawk a. Anmahni um bertu Man Utd. lah kum 1994-ah hi chuan vawi 9 chauh championship Trophy an la chawi si a. An tan vawi 9 dang han champion leh chu thil awlsam a ni dawn lo tih pawh a chiang viau a, thil harsa leh theih loh tluk deuh thawa ngaih a ni ve bawk a ni. Hei vang hian Liverpool lam pawn uan pawh an uanpui reng a ni. An champ ve zel chuan Liverpool record hi United tan engtikah mah umphak ngaihna a awm dawn lo tih chu an hisap dan pawh a ni ve reng a. Mahse, EPL ṭan a nih hnuah Champion tih ni an nei thei ta si lo a, United lah an champion chho ta zut zut mai si a. Tichuan le Liverpool record chhuan em em vawi 18 chu an um pha ta mai a nih kha.

𝐖𝐄' 𝐀𝐑𝐄 𝐁𝐀𝐂𝐊

Kum 2008/2009 season a lo inher chhuah meuh chuan United chu a vawi 18na atan an champion ve ta a. Liverpool record chu an nih rual ta a, kum 2009-ah chuan, Liverpool ho banner chhanna, “In 1994 You said come back when its 18! Well here we sat on Your Perch” tih leh “You told us come back when we’ve won 18… We Are Back” tih banner te hmang chuan Liverpool fans te an cheksawlh ve ta thung a nih kha.

Kum 2014 a ni a, Liverpool chu kum 26 hnuah EPL chawi thei dinhmun duhawmah an ding mek a. Chelsea nen an inkhelh ṭumin Steven Gerrard-a chuan defence hma chiah atangin, an keeper a back pass chu Drogbain lo lain, a pet goal zui ta a, Gerrarda gift vang chuan Liverpool in EPL champion an beiseina a bo zui ta bawk a. Kha ta Gerrarda chet dan kha United fans te chuan nuih sawhin, kum 1994-a an tihelna dungthulin, banner-ah, ““Au Revoir Gerrard and Come Back When You’ve Won One” tih an tar khum ve leh a, United khan league title vawi 19na an lo la tawh bawk nen, an deu let ve leh ta a ni.

English club zinga record nei ṭha pahnih an ni dun zel a, club dangte hi chuan anni 2 te inhuatna ril ang hi an nei pha lo a. Man United bik hi EPL ṭan a nih hnuah rei tak vawklallen an nih avang hian ertu club a ngah zual niin a lang a. Arsenal, Chelsea, Man City te ho pawh hian an hmelma hmuh vek a tih theih ang chu.

SAF a chawlh tak hnuin United pawn record thar an siam hlei thei ta lo a, history mai lo chu chhuan tur a awm hlei thei ta bik lo a. EPL ṭan a nih hmaa Liverpool hovin an history an uanpui ṭhin dinhmun ang deuhah khan kan ding ve mek a nih hi!

Tun season, nipui bazarah beisei miah lohin Ronaldo chu a lar chhuahna clubah a rawn let leh ta a. Hei hian Man United boruak chu nasa takin a chhem alh thar leh ta a. Inkhel en ṭha duh tawh lo, kei tiamin Ronaldo hian United inkhel en tur leh United tana atso leh turin min hruai lut leh ta chu a nih hi.

He club pahnih hian League title lak belhkhawmin vawi 39 an chawi tawh a. FA cups vawi 19, League cups vawi 13, FA community Shield vawi 36. Europeans Cups (UCL ni ta) vawi 9, UEFA Cups (Europa League ni ta) vawi 4, UEFA Cup Winners Cup vawi 1, UEFA Super Cup vawi 5, Intercontinental Cup vawi 1 leh FIFA Club World Cups vawi 2 te an la tawh a ni.

(A kum leh lehlin dik loh a awm mai thei a. Ka phak ang tawkin, Internet lama kan hmuh kan han letling ve pawp pawp a ni a, a duhkhawp lo tan, chhiar sen loh internet lamah a la awm tho a nia. Ni 3 vel chu ka chai ve tum hrang lehnghal)

ZO TUNGCHAW