𝐍𝐀𝐙𝐈 𝐒𝐢𝐩𝐚𝐢 𝐑𝐚𝐥𝐬𝐚𝐢𝐭𝐡𝐢𝐚𝐦, 𝐈𝐧𝐝𝐨𝐩𝐮𝐢 𝐈𝐈-𝐧𝐚𝐚 𝐓𝐚𝐧𝐠𝐫𝐮𝐚𝐥 𝐒𝐢𝐩𝐚𝐢𝐭𝐞 𝐭𝐚𝐧𝐚 𝐓𝐡𝐢𝐡𝐧𝐚 𝐊𝐞𝐧𝐠𝐭𝐮.

𝐌𝐀𝐓𝐓𝐇Ä𝐔𝐒 𝐇𝐄𝐓𝐙𝐀𝐍𝐀𝐔𝐄𝐑

𝐍𝐀𝐙𝐈 𝐒𝐢𝐩𝐚𝐢 𝐑𝐚𝐥𝐬𝐚𝐢𝐭𝐡𝐢𝐚𝐦, 𝐈𝐧𝐝𝐨𝐩𝐮𝐢 𝐈𝐈-𝐧𝐚𝐚 𝐓𝐚𝐧𝐠𝐫𝐮𝐚𝐥 𝐒𝐢𝐩𝐚𝐢𝐭𝐞 𝐭𝐚𝐧𝐚 𝐓𝐡𝐢𝐡𝐧𝐚 𝐊𝐞𝐧𝐠𝐭𝐮.

(A hming hi, Mathiu hatzi-naw-ar tia lam tur. NAZI hi Natzi tiin an lam thin bawk)

 Indopui II-naa German leh a ṭanrualpuite hi, film lama mi sual pawl ang deuha ngaihna hi mi nawlpui rilruah a tam viau niin a lang? An ralsaithiam ṭha leh ropui zet zet te chanchin pawh hi, ṭangrual lam sipai ralsaithiam te ang em chuan an lar lo ṭhin a tih theih ang chu!?

Kum 1943 aṭanga 1945 thleng, Soviet sipai khawchhak lama ral hmatawng te (eastern front) tithlabara, hlauhlawpa siamtu, a mupui mit fing tak nena, a tum hlah ngai lo. A hmelma sipai a dahṭhatte hi, mi 345 ni a sawi nimahse finfiah phak loha a kahhlum te nen chuan hei ai hian a let hniha an tam rin a ni. 

 

Nazi ralsaithiama hi kum 30 a tlin hma hauhin, hliampui leh man te a tuarin, a tawk ve nual. Mahse a ralsai hna chu chhunzawm zelin, German ralsaithiam zingah, a chungchuang ber a ni zui ta a ni. Kum 20 a nih khan a ropuina leh hmingthanna tam zawk chu a lo khum tawh a ni.

𝐀 𝐇𝐫𝐢𝐧𝐠𝐧𝐮𝐧 𝐇𝐮𝐧 𝐇𝐦𝐚 𝐋𝐚𝐦

 Matthäus Hetzenauer hi Austria tlang ram, Alpine region an tihah chuan a lo sei lian a. An khaw hmun hi khaw hawi a nuamin, van inhawng pawh a zau a, ram leilung chu mittlin tawk thlir tur a awmin, Alps tlang lah chu a mal ṭo lurh mai bawk nen. Indopui II na khan German tana hmelma do turin sipaiah a len lut ve ta a ni.

 

 Kum 1924, December ni 23 ah Brixen, Thale khuaah a piang a. Austrian chhungkua, lo neia ei zawng an ni a. An khua hi German ramri hmar lama awm a niin, an khua leh a chheh vel chu vur tlengna (ski) hmun atana duhthusam a ni nghe nghe a. 

 Hetzenauer, Matthäus-a nu leh pa chuan, chu hmunah chuan leite letin an theih tawpin hna an thawk ṭhin a. Simon-a Matthäus-a pa chu ramvachal leh pasalṭha kut hmui tak mai niin, a silai kah thiamna chuan an chhungkaw tan Sakhi, Sazuk leh Turkey te chu chawhmeh atan a hawn tir ṭhin. 

Naupang mai a nih lai aṭangin Matthäus chuan a pa che zia leh zei zia, a silai hman dan leh a chet ran dan te chu zir chhawng zelin, a thil zir chu a sa pelh nan chuan a hmang ṭangkai ve fo reng a ni. A silai kah thiamna leh kah dik lutukna chu a thisenah, a pu Josefa aṭangin a ṭhan hnan bawk nen, a pu hi Austro-Hungarian sipai bang niin, a medal dawn te chu banglaiah a tar tlar ṭhat ṭhin a. Chung zingah chuan Iron Cross, German sipai chawimawina sang pawh chu awm vangin, chu chuan a tute thinlungah huaisenna leh chung medal te chu an neih ve theih ngei nan, an thinlungah duhna leh awhna awm se ti a tar a ni.

A ramvahna leh sa pelhna aṭangin, bikbo dan, hmuh mai harsa taka insiam dan leh inphen dan te a zir zel a. Hei hi ralsaithiamna a zirna zelah atan a pawimawh tawp khawk a ni. Hun harsa leh ri luai luai karah pawh ngaihtuahna fim tak hman thiam a, thu tlukna fel tak siam te a zir zel a. Leichar leh awitlana tanhmun khawh a ngaih thut hunah pawh, han insiam rem zung zung dan te pawh a zir zel a. He thil thiamna hi hmelmate nena inhnaihchilh taka an awm hunah pawh, a sahimna tur leh a bikbo theih nana ṭangkai em em a ni. 

 Kum 17 mi a nihin, German sipaiah ziah luh a ni a, anmahni ram Austria, Kufstein-ah 140th Mountain Rifle Reinforcement Battalion ah a awm a. Anni hian khawchhak lam ral hmatawng (Eastern Front) an puih ṭhin rualin, chhim lam ram ri a, an (German) hmelma te rawn pawng tur chu ṭan hmun khawhin an lo bei let ṭhin bawk a ni.

 

 Tlangvala chuan kum 1943 khan Mortar leh laipui lam kah zir turin a unit awmna chu a thlak ta a. Mountain infantryman ni turin, zirna kum hnih chhung a nei a, chu thil chu Hetzenauer tihawm mi reng lah a lo ni leh zel a. He ta an zir lai hian an hotupa (commanders) chuan a silai kahthiam chungchuanna chu a lo hmuh hmaih i khaw lo a, Kum 1944 march aṭanga July thla chhung chu ralsaithiamnaa intuaihriam leh zual turin a zir leh ta bawk a ni.

𝐌𝐚𝐭𝐭𝐡ä𝐮𝐬 𝐇𝐞𝐭𝐳𝐞𝐧𝐚𝐮𝐞𝐫: 𝐊𝐡𝐚𝐰𝐯𝐞𝐥 𝐇𝐮𝐚𝐩𝐚 𝐑𝐚𝐥𝐬𝐚𝐢𝐭𝐡𝐢𝐚𝐦𝐚 𝐜𝐡𝐮!

 Tlangval ralsaithiama chuan silai (rifle) model pahnih chu a hna atan a hmang ṭhin a. Karabiner 98k leh entlang (hmuh hnaihna) (6x) leh Gewehr 43, ZF4 leh entlang (4X) chu a taksa peng ni ve awm ang maiin, a pangah chuan englai pawn a bet reng ṭhin a. He silai pahnih leh enhlatna te nen hian khawvel huap pawh a, ralsaithiam hlauhawm, Indopui II-na ṭangrual sipaite hlauh em em chu a ni zui ta a ni.

 Hetzenauer chu Carpathia, Hungary, Slovakia-ah te sawn kual a ni a. Carpathia-ah hian August kum 1944 khan dah a niin, he tah hian a chungchuanna chu a rawn lantir ta a ni.

 German sipai te chuan Soviet ralhmatawng te chu a theih ang ang dana, lo chhutchah chu an tum a, he mi turin Hetzenauer pawh chu dah a ni ta a. A hna ber pawh mountain artillery units te chu Soviet ralsaithiam leh an puakrang (machine gun) laka venhim a ni a. Chu chu a nitin hna a ni a, German sipai ho chuan Soviet silaimu chhum lo chat loa lo kal ṭhin chu a tawrh pawh an lo tuar nasa reng thin a ni.

 Tlangvala chuan Soviet unit commander leh puakrang enkawltute chu a pel ber a. Huaisen takin, an hmelma ram lamah te chuan a lut fo a. A tum tak kapfuh turin fimkhur takin a khawsa a, Soviet sipai za hotu zawn chu a hna pawimawh ber a ni fo.

An hotupa ber that tur chuan a chekkawite thah hmasak an ngai a, ralsai hna chu game chi khat leh awlai lo tak a ni reng a. Amah pawn heti hian a sawi a, “Hmelma sipai za hotu leh puakrang pute ho dah ṭhat chu tih makmawh a ni a, a chhan chu keini lam hi sipai kan tlemin, silaimu lah kan nei tlem em em a, ralsathiamte puihna tel lo chuan a ngaihna a awm lo a ni” tiin.

 Hetzenauer chuan a changin, silai mu khat lek pawh kap turin, khawvawt leh vur sur hnuaiah darkar fe a awm a ngai ṭhin a. A dawhtheihna nen rilru fim tak hmang rengin, vawikhat chet sual zeuh chuan a ṭanhmun chu a lailang theiin hnelma ten an rawn hre thuai thei dawn a, chu mai bakah Soviet ralsaithiamte kutah a nunna chu a chan thei reng si a. 

 A ralsai hnaa, a ralsai hlat ber chu yard 1200 a hla a mi a ni a, chu chu football field let 10 vel a ni. Kum 1944 August aṭanga kum 1945 May thla inkar khan a kuta thi ngei chiang taka an chhinchhiah chu mi 345 an ni a. Ni khatah mi pakhat aia tam dah ṭha ṭhin ang a ni. Soviet sipai lam te hian ralsai hlum an ngah viau mai a, chutih lain Hetzenauer dahṭhat te erawh German sipai lam ten an chhinchhiah chauh a ni a, heng te hi thla sawm chhunga a hna thawh an ni mah mah.

 Nazi ralsaithiam hlauhawm ber mai chu a hnathawh an pu ten hai bik hek lo, chawimawina sang Iron Cross 1st Class leh 2nd class chu an hmelma sipai tam tak a dahṭhat a vangin an hlan a. Ralsaithiam nihna Badge Rangkachaka siam chu amah chauh hlan a ni nghe nghe. 

𝐀 𝐇𝐮𝐧 𝐇𝐧𝐮𝐡𝐧𝐮𝐧𝐠, 𝐈𝐧𝐦𝐚𝐧𝐧𝐚 𝐥𝐞𝐡 𝐓𝐡𝐢𝐡𝐧𝐚

 Kum 1944 khan kum 20 mi niin, laipui mu siper avangin a lu-ah hliam a tuar a. Hei vang hian chawimawina tangkapui pawh a dawng nghe nghe a ni. Indopui tawp thleng khan hliam vawi 2/3 vel chu a tuar zui a. Hetzenauer hna pakhat leh chu an unit te Soviet ral hmatawng aṭanga an inhnuhdawh lai lo ven kha a ni a, a thiamna leh a vanneihna ten daih loh chin a nei ve bawk a, kum 1945 khan Soviet ho chuan an man zui ta nghe nghe a ni.

 Mi tang han nih chu a nuamin a hlimawm hran lem lo a, a ṭhiante chuan sawisak an tuarin, an nunna te hial laksak an ni ṭhin. Mi maktaduai khat lai chu hliampui tuara thi lek lek te an ni hlawm reng a ni. Soviet tan inah kum 5 a tan hnuin, kum 1950 indopui zawh tawh hnu khan chhuah zalen a ni ta chauh a ni.

 Indopui a lo zawh tawh avangin Matthäus Hetzenauer chu an khaw lama let lehin thing mistiri hna a thawk chhunzawm ta a. Nupui atan Maria neiin, an nu ai hian kum 2 in a thi hma ta nghe nghe a. Kum 2004 khan kum 79 mi niin, insawiselna neuh neuh neiin, a hringnun zinkawng chu a lo zawh tawp ve ta a ni. 

(A chanchin tlangpui kan pet lawr zawr zawr a ni e)

RHT4.9.21