Suakpuilala

𝐒𝐔𝐀𝐊𝐏𝐔𝐈𝐋𝐀𝐋𝐀 (𝐒𝐨𝐨𝐤𝐩𝐢𝐥𝐚𝐥)

Ramri buaina chungchang a rawn rik leh ṭhin hian, Mizo lal hmingthang Suakpuilala leh Kumpinute ramri inremsiam dan sawi thar a awm leh ṭhin a. Chhiar mai tur lah ka la hmuh fuh thei law... 

Col. Listera te nena an inremsiam danah lah khan, engmah a chiang si lo, ram ri an kham dan hi! (A document, pdf neite in awm chuan min lo pe ve nghe nghe ula, ka lawm ngawt ang).

Chutih rual chuan, literary theory pakhat Post-Colonialism thlirna aṭang chuan (mi ngo ho te awpbehna duh lohna avanga epletna) 'Suakpuilala' kha, a ngaihsanawm lem lohna a awm ve bawk a. 

A chhan chu, vailen vawikhatnaah khan 'Tual dawih lal mai ni lovin, sapho, kumpinu te lo ṭanpui nasa em emtu a ni. Mahni lalpuite phatsan a, sap lama ṭang ta tihna a nih chu'. 

Lalburha ten Kumpinu an lo kah nasat tehlul nen. Ropuiliani lahin, a thih thlengin mi ngo duham ho kha a do a nih kha. Suakpuilala te erawh Lungleng lal Khamliana nen khan, sapho kaihbu an ni mai awm e. Mahni hnampui te aia ram pawn mi ṭanpui duh zawktu chu...

𝐀 𝐋𝐞𝐦 𝐒𝐚𝐰𝐢𝐟𝐢𝐚𝐡𝐧𝐚:

A lem kan dah hi tun hnaia viral a ni a. A kawltute hi Suakpuilala tute an ni awm e. Commissioner Edgera khan Major Mac Donald hruaiin Changsil Bazarah Suakpuilala be tur khan a rawn kal a. Kal kawngah thla thum ngawt an thang nghe nghe a. Dawhthei taka an nghah hnuah, Bepari Bazar (Changsil)-ah chuan Suakpuilala chu an nghak chhuak ta a. 

Suakpuilala hmelhmang an sawi dan chu, "Hmel bumro tak leh mitmeng fim rem rawm, tlangram putar mak sak tak chu. . ." tiin.

He ta an inbiakna ni leh thla hi March ni 21, 1870 tih a awm laiin, a lemah hi chuan September ni 20, 1871 tih a inziak thung a. Dik zawk chu a awm ngei ang, a ni leh thla hi. A lem hi mingo hovin an pek a ni e.

(Tute huatthu mah sawi ka tum lem lo a. Thil hi thlir dan dang, a sir lehlam aṭanga thlirna a lo awm ve ṭhinzia sawi lannan kan hmang mai a ni e)