RÛN MAWI LEH A PHUAHTU VALZOTE CHANCHIN TLANGPUI SAWI
ZAUNA
-Rohmingthanga Ralte
Assistant Professor
Dept. of Mizo, GANC
Runmawi hla Valzotea (Zoliana) phuah hi
kumin 2021 aqang hian MZU hnuaia 3rd Semester B.A zirlai MIL ah zir
qan tur a ni a. Zirlaite hlawkpui theih tur leh hman ṭangkai theih turin a
phuahtu chanchin tlangpui leh he hla hi ṭawng tluang pangngai zawkin tun ṭum
hian kan rawn sawi dawn a ni.
Ṭhangthar
leh zawkte chuan Valzotea hi kan hre kher lo ang a. A hria pawn ama mi mal nun
vel chu kan hre lovin a rinawm a. Mizo hla lengzem leh lenglawng thiam taka
phuahtu niin, heng a hla phuahte hi zaithiam hrang hrangin sain, a audio album
pawh lo siam tawh a ni a. A hla ṭhenkhat leh tunah kan zir tur Runmawi hlate hi vawiin thlenga Mizo hla
ṭha tling (classic) ni pha an ni. A
phuahtu chanchin tlangpui lo sawi hmasa ila. A kimchang zawk chu heath hian a
chhiar theih tho a. -
https://rohmingatungchaw.blogspot.com/2021/07/hla-phuahthiam-valzotea-tv-r-zoliana.html
1 1. Pian
leh Murna:
Runmawi hla nalh
em em phuahtu, Tv. R. Zoliana (Valzotea) hi Pu R. Lianthanga (L) leh Pi K.
Lalthangpuii te fa 7 (pasarih) zinga upa ber a ni a. Chanmari venga an awm
laiin, ni 10.04.1958 zing dar 7:50
A.M-ah Aizawl Civil Hospital ah a piang a. A naute hi mipa 4 (Pali) leh
hmeichhia 3 (pathum) an ni. A nu leh a pa hi Medical Department a thawk an ni
a, a pa hi Renthlei hnam niin Compounder (Pharmacist) a ni a, a nu hi Khiangte
hnam niin Nurse (ANM) a ni, an nupa awm dun theihna a nih avangin heng khaw
hrang hrang - N. Vanlaiphai, Serchhip, Thingsulthliah, Vairengte leh Khawzawlah
te a naupan lai hian an chhungkua an awm kual thin a, chuvangin a naupan lai
hun tam zawk chu thingtlang lamah a hmang a ni.
2.
Zirna Lam:
High School chu
Republic High School, Aizawl ah kalin, heta ṭang hian kum 1978 ah HSLC a zir
chhuak a. Pachhunga University-a PUC a zir laiin, kum 1980 ah Western Cirle
Office, PWD, Chanmari ah LDC hna a zawm a, Aizawl College aṭangin PUC a zir zo
a, hemi hnu hian college chu a kal chhun zawm ta lo a ni. A kut ziak a mawi hle
maia, chuvang chuan thil pawimawh deuh bik chu an hotute khan an ziah tir ṭhin
a ni. Kum 1991 ah UDC ah kaisangin, Kawrthah Division ah a thawk a, hemi hnu
hian Saitual Division, PWD Office ah dah a ni leh a. Amaherawh chu, a hriselna ṭhat
loh avangin Western Circle Office, PWD, Chaltlang ah a hna zawm tir
(attached) a ni leh a, a hun tawp thlengin he hmunah hian thawkin he
hna hi a chelh ta a ni.
3. 3. A Mizia
Tv. R. Zoliana
(Valzotea) hi a naupan lai aṭangin mi inngaitlawm leh mi inthlahrung thei tak,
mi zakzum leh mi nunnem, mi pawisawi
hlau thei tak a ni a. Mi zaidam leh ṭawng tam lo tak niin, fiamthu duh ru tak a
ni thung. Tin, a rilru a chakin lehkha a
thiam thei hle a ni. A nu leh a pa a zahin an thu a hnial ngai lova, a
hmangaihin a duat hle thin a ni. A pa boral hnu, a nu hova an awm lai pawh
hian, a nu hi a hmangaihin a zah thiam hle a, a ngai pawimawhin a thu a hnial
ngai lo a, a theih tawpin a duat ṭhin a ni. Tin, amah hi zaidam tak a nih
avangin, a chhungte pawhin an hmangaihin an ngaina a, an zah hle bawk a ni. An
chhungkua chuan “Mambawih” tiin an
ko vek ṭhin.
4. ZORIMAWI KHAWVEL LAMAH:
An chhungkua hian
kum 1971 khan Record Player (Thingrem zai thei) an nei a, chu record player
chu a hunawl neih remchan apiangin, ngunthluk takin a ngaithla awl lo va,
rimawi ngaihthlak hi a taimain a chik peih em em. Sap zaithiam zai ngaithlak te
nuam a ti ṭhin hle. Hengte hian a nunah nasa takin kawngro a su a, A nun leh
rimawi hi englai mai pawhin an inngheng reng a, pawh ṭhen theih a ni lo ti ila,
kan sawi sual lovang.
Valzotea hi mi lungleng thei tak a ni a, a hun
awl tam zawk chu guitar perha zai nan a hmang ṭhin a. An in aṭang hian
khawthlang lam tlang dung hi kim takin a lang hring dup mai ṭhin a. Thlasik ṭiauchhumin
phai ruam a bawh var chuk mai te leh ṭhal bawm romei zam chiai mai te chuan a
nunah thu nung an sawi ṭhin a. Zan
boruak thianga van lam arsi pe tuarh mai leh thlasik kawng (milky way) an lang ruih mai te chu a thlir awl lo mai ṭhin. Zan
thla eng chuanin ralkhat tlang dunga khaw awmte, electric eng de sep sep lang
pe un mai te chu thlirin, an varanda
thuthlengah ṭhuin ṭingṭang perhin a zai ṭhin a.
Chutianga a hun
hman aṭang chuan a hla phuah tam zawk hi a lo piang chhuak a ni. A nihna takah
chuan Valzotea hian khuarel mawina leh siamtu kutchhuak hrang hrangte hi thlir
liam mai lovin a nihna leh hlutna dik tak chu a thinlungah a seng lut mial mial
mai a. Chu suangtuahna khawvelah chuan va chengin hlaraw ṭha leh mawi dapin pur
a va chawk a, a thil hmuh leh beng hriat khuarel mawina, nungcha hram thawm leh
rimawite chuan thu leh hla hmangin a nunah an inpuang chhuak a; chu thinlung
tuifar khat liam chu keini zofate hian tlai leh puar nan kan hmang a, a thu leh
hla parzu chu chhimin zofate hi kan lo in tlan tlai ta ṭhin a lo ni!
5. RUN
MAWI HLA LO PIANNA:
Valzotea hian hla hi a phuah ve nual a, hriat
theih chinah chuan Pathian hla 7 (pasarih) leh hla lenglawng 30 (sawmthum) vel
a phuah a, a hla phuah zinga mi, a ṭhianpa Pu Hmingthanmawia, Chanmari tana a
phuah sak “Sakhmelmawi” (Rose par rimtui min thliah la) tih hla chu Ainawn Pick your Pop, 1983-ah “Best
Pop song of the year”ah thlan niin lawmman pakhatna a dawng a. He tih
hunlai hian zanriah eikhama Chanmari veng tlangvalte chhuah khawmna leh innghah
khawmna, Pi Pari Sailo te nufa, kawng tinrenga anmahni lo chhawna lo dawl zo em
em thintute kha a ngai hluin a dah ropui thiam hle mai a. Sethlam rangva in
rawih ve lam tawh, ung ve thit thet tak mai, a bang chhung lamah lah ni se
chanchinbu hlui (statement) hmanga bel ran ve niau mai kha hla a chawi a duh ta
tlat mai.
Anni chhung hi an
chak lakna ber niin hmawmsawm leh nepnawi
an zuar bawk nen, thimhlim aṭangin an in leng lovin kawtkaiah nen lam an
insehmur tuau tuau mai ṭhin a. Pi Pari kha nu ṭawngkam bak deuh hlur mai, rilru
chhe hauh si lo, mitin mai ina an nel si kha a ni a, a inlengte kha han hrawk
tuar tuar mahse tun thinurah an la ngai lo, a rilru chhungril khan an hre tlat
a ni! Tichuan, chu an innghah khawmna in ngei mai chu “Run mawi” tia vuahin hla in a han chawi ta a, a thluk a mawiin sak
a nuam a, lar pawh a lar na ngiang mai a, zoram deng chhuak hla lar zingah tun
thlengin a la tel ta zel a. He a hla Phuah “Runmawi”
hi “3rd Best Pop Song of the
Year 1983” ah thlan ni lehin lawmman pathumna a dawng bawk a ni. A hla phuahte
hi a hun lai chuan an lar ṭhin hle. Pathian fakna hla a phuah zingah chuan “Hlimin ka zai zel dawn” tih te, Krismas hla, “Kan tana nau lo piang chu” tih te leh “Pass lawmna hla” te chuan mi hriat a hlawh ve hle a ni. A hla phuah
te hi Register-ah “Valzo’s Songs” tiin ziakin a dah thlap
ṭhin a ni.
6. A
HUN HNUHNUNG LAM:
Valzotea hi a pa,
Pu R. Lianthangan ni 18.05.1984 (Friday) zan dar 10:00 PM ah a boralsan a, a nu
hi Asthma (Thawhah) nei anih avang leh unau zinga upa ber anih avangin, chhungkua-ah a mawhphurhna a sang hle a, a naupan
lai aṭangin thawh hreh a nei ngai lova, inchhung khur hna pawimawh chu,
hmeichhe hna pawh sawi lovin a ṭul ang angin a thawk mai ṭhin a ni. Chhungkaw
enkawlna hna a kova innghat chu hriain a theih ang tawkin a hlen chhuak bawk ṭhin.
A damloh chhung
hian a tuar chhel em em a, A nu leh a naute hian enkawl an kham lo a ni. Amah
hi mi zaidam tak anih avang hian a chhungte pawhin an ngaina a, an zah bawk a,
a thu an hnial ngai lo a, a thinrim hmel an hmu ngai lo bawk a ni. A natna
hmunah Pathian nen leng dunin, a natna chu hlim tak leh lungawi takin a tuar
zel a, mahse, a natnain ṭhat lam aia zual lam a pan zel avangin, Civil Hospital
panpui a ni a, Kum 2000 Chrismas laia
Damdawiina a lut chu a zual hle mai a, December 29th, 2000 atangin
Dialysis hmanga enkawl a ni a. Damdawi-in aṭanga chhuak lehin in lamah enkawl
zui a ni a. Ṭhat lam a pan theih chuan loh avangin Kum 2001 April thla tawp
lamah Civil Hospital, Aizawl pan pui leh a ni a, tha chhuak leh mai tura kan beisei lain, April ni 30, 2001 (thawhtanni) zing lam dar 1:15 ah chatuan ram min lo
pansan ta a ni.
7. ZO
RIMAWI KHAWVELA A SULHNU:
Zoliana
(Valzotea) boral hnu hian, Valzotea Nu
leh Unaute leh a ṭhiante - Pu Vanneihtluanga
leh Pu Lalrammawia leh ṭhian dang te hmalaknain Zoliana (Valzotea) Tribute
Committee din ani a, “Valzotea Hlate” tih bu leh Valzotea hlaphuah 13 awmna, “Audio Album”
buatsaih a ni a, a hun laia zaithiam lar tak tak ten mawi takin an sa a ni.
Tin, Valzotea Album a Hlate hi Music
Video siam a ni a, Copy engemaw zat hralh chhuah a ni bawk.
Tichuan, Valzotea Hlabu leh Album tlangzarhna
leh, Valzotea hriatrengna Tribute Concert chu ni 27th
April, 2004 zanah Vanapa Hall ah mipui lenglo khawpin hlawhtling taka neih a ni
a. Valzotea Hlate tih Album hi release a nih zan hian Copy singkhat chuang
hralh chhuah a ni a, a hnu thlengin copy singhnih chuang hralh chhuah leh a ni.
He Cassettee aṭang hian Valzotea hlaphuah –“Sakhmelmawi”, “ Runmawi”
bakah, “ Ka Di ka Parmawite, Di
enchimloh” tih leh a hla dangte a lar thar hle a ni. Valzotea Hlate
Cassettee hralhna sum engemaw zat chu Home hrang hrang bakah, Chanmari Kohhran
Ramthar Project ah leh Thutak Nunpuitu Team, Zuangtuiahte hlan a ni.
A kum chiah kan
chiang ta lova, Rimawi Khawvelin Award a
buatsaih ah, Valzotea Hlate Audio Album
chuan “Best Love Song Album of
the Year” ah thlan a ni a, he award hi Saikuti Hall, Lunglei ah a dawng a ni.
Tin, a kum leh a buatsaihtute kan hre chiang lova, “Hlaphuah thiam” lawmman pahnihna Aizawl Lammualah a dawng bawk
a. A hla phuah “Sakhmelmawi” (Rosepar
rimtui) leh “Runmawi” chuan lawmman a dawng bawk a ni. Tin, Valzotea
hlaphuah “Runmawi” tih hla chu- Chanmari
YMA, Ramhlun South YMA leh Durtlang YMA ten sa in, Music Video mawi takin an siam bawk a ni. Tin,kum 2016 khan Zoliana (Valzotea) (1958 - 2001) chu a hla phuah thiam avangin “Heritage Wall of Fame” ah seng luh a
ni.
 |
| RUNMAWI HLA LO PIANNA IN LEH A INLENGTE |
(Pic: Hla phuahtu Zoliana (Valzotea), vei lama ding. A satu C. Vana (C. Vansanga) vei lama ţhu, Naga shawl bât..)
RUNMAWI HLA SAWI
ZAUNA ṬAWNG TLUANG PANGNGAIIN:
Veng khat leh
khawi i maw khuaah hian ṭhian inkawm bik leh inkawmho ṭhin te hi an awm fo a.
Chung ṭhian inkawm hote chuan chhuah khawmna leh inhmuhkhawmna bik in leh hmun
te an nei fo a. Tun lai ṭhalaite ṭawng chuan an spot, an RV an ni mai ang chu.
Chutiang chuan Valzotea leh a ṭhiante
pawn an veng Chanmariah chhuahkhawma, inhmuhkhawmna bik in an nei ve ṭhin a.
Chu an inhmuhkhawmna in chu, “Helai in tlâwm tak, an thlalakna hmun hi Mizo hla lâr
chuai thei lo “Rûn Mawi” lo pianna a ni. BOC tlâng chhak (tunah chuan Tata
Workshop ni ta) - Chanmari, Chaltlang Road-a awm hi a ni. He thlalak a lo lang
mi 8 lai hian rihsang an kai tawh nghe nghe.”tiin sawi a ni a (electronic source) (Thlalak kan hmuh khi niin, a sawitu ber hi tunge kan hre thei lo
a, a thusawi hi tihian kan dah tawp mai)
Tichuan an inhmuhkhawmna,
lenkhawmna ṭhin in chu hlaah a chawi ta a ni a. Khua a lo tlaia zan a lo thlen
hian, kan lenkhawmna in, ṭhian hoa kan inhmuhkhawmna inah lengkhawmin. Hlim
takin, inlungrual takin, hla te sain kan inkawm khawm ṭhin a ni tiin a rawn
sawi chhuak a.
Zankhua a lo tlai hianin,
Kaina rûn sâng kan mawi;
Suihlungrual zaa lêngin,
Hlim zai kan vâwr ţhin.
A hla
thunawnah chuan, uar tak maiin chu in chu nula leh tlangval te lenkhawmna hmun
a ni a, chu hmunah chuan kokim takin kan inhmukhawmin kan inkawmkhawm ṭhin a.
Kan tan chuan hei baka runmawi a awm chuang lo, tiin thiam leh nalh fahranin
chu in tlawm tak chu hlain a chawi ta a.
Lêng zawngte kimna ber rûn mawi,
Lanu chhuihthangval rual kan lawina.
A hla chang hnihnaah chuan
an chhuahkhawmna ina an kim ṭhep ṭhawp tawh chuan tu dang, mi dang mah an
mamawh tawh bik lohzia a rawn sawi a. An inkawm hlima zai hlimna turin ṭingṭang
an nei bawk a. Khawiah mah, khawi veng dangah mah len kual an mamawh lo a, chu
runin mawi takah chuan hlim takin, lungleng tak chung siin, an lunglenna te chu
hla hmangin zaipui ṭhin thu a sawi leh ta a.
Tu dang lêng dang kan ngai lo,
Rimawi ţingţang nen;
Khawi lam ţuan zai rel lo hian,
Lunglen thu hril za e.
A hla chang thumnaah chuan an
ṭhian hote chuan, khawvel khawsak lungkham mangan buaina ngaihsak lo lek a, zu
an han inho ṭuma, chu runmawia an han pana, an han lenkhawm te chuan chu
runmawi chuan dawl takin a lo dawng a. Lungawi
takin a ni leh a ṭhiante chu a lo dawn sawngin, an ruih avanga lo hau mai
lovin, dam takin a lo dawn sawn ṭhin dan a sawi leh a.
Eng dang dâwn lo rêng hian leh,
Chawltui ningzû rui a;
Han belh châng nîte hianin,
Ânka nêm te'n min chhawn.
A hla chang linaah chuan chu
an lenkhawmna in, run tlawm tak chu a ni
leh a ṭhiante tana a hlut em avangin, a hmingah runmawi kan phuah ang
che. Chung khuanu Pathian vengin hual him zel che se la tiin, mihring ang maiin
an chan vel a. Tichuan a duhsakna nen kum khuain, kum tluangin run mawi ni reng
ang che tiin a duhsakna leh a malsawmna thu a chhiah chu kan hmu leh ta a ni.
Kan lawina rûn hming ţha hluan,
Kan chawi nang che rûn mawi;
Chung khuanu lêng hual zelin,
Kumtluang rûn chang/tling la.
A hla chang tawp ber anga
lang hi, he hla lo sa hmasatu ber C.Vansanga khan a sat el nain, tlai khawhnua
Vanlalsailovan a sak leh hnu hian a tel ta lo a. Tin, Valzotea hlabu-ah pawh
dah tel a nit a lo a. Chu vangin a sawi zauna kan nei zui lo mai ang a. Mahse,
a hla thui erawh tihian kan hand ah ve reng reng ang e.
Tunah hlimin lêng mah ila,
Ţhennî a her thuai ang;
Tlâng tin mual tina lêngin,
Ngaih lai i vâwr dun ang.
ZO TUNGCHAW
Comments
Post a Comment