LALṬANPUIA TOCHHAWNG CHANCHIN TLANGPUI
Rohmingthanga Ralte
Assistant Profesor
Dept.of Mizo, GANC.
THUHMA:
He hla ‘Pialral Rammawi’ Lalṭanpuia Tochhawng
phuah hi, kumin 2021 aṭang hian MZU
hnuaia B.A 3rd semester MIL Mizo zirlaiah telh thar a ni a.
Zirlaiten kan chhawr ṭangkai theih turin, tihiana sawi zauna leh zir zauna kan han siam leh a. Tuna, heta kan
sawi chin chauh hi a dikna leh a hla thuchheh vela thil awm chauh a ni lo tih
hi lo hria ila, kan mit tihvar nan tak tak chauh, a tlangpui leh kan hla zir te,
hriat leh zir a nawm zawk nan kan tiang hian kan rawwn buatsaih a ni a. Thui
deuh leh technical deuh pawn a sawi theih ang. Mahse, kan ngaihtla ṭha peih ṭhin
si lo a. A tawi thei ang ber leh kan hriatthiam tho tur siin kan rawn buatsaih
a ni, uluk takin min lo ngaihthlak sak ula, in lo hman ṭangkai ngei theihna
turin.
Pian leh Murna:
Hla
phuahtu chanchin, pian leh murna ang chi te hi Exam zawhnaah chuan a chhuak
ngai lem lo a. Mahse, kan hla zir tur kan hriat chian nan leh hriatna zau zawk
kan neih theih nan, eng emaw chen, an hla te kan luhchilh hmaa, a phuahtute
chanchin hriat ve hi a ṭha si a.
Lalṭanpuia
Tochhawng (Ṭanpuia/ṬPA tia an koh ṭhin)
kha, September ni 15, kum 1961 khan Thankhuma (L) leh Hrangziki te inkarah Kawrthah
khua, tuna Mamit District nitaah a khuan
a lo pianga, an fa u ber dawttu niin. An unau hi 7 niin hmeichhia pali (4) leh
mipa pathum (3) an ni a. A nu Hrangziki hian kum 2015 thleng kha chuan a la
dampuiin, Kawrthah-ah Inpui a nghak nghe nghe ṭhin a ni.
Chhungkaw Chanchin:
Ṭpa
hian February ni 20, 1985 khan Lawmnapari d/o Rokunga (L) nen inneiin fapa 4 an
nei a ni. A thih ni thlengin Chawnpui Veng, Aizawla anmahni inah an khawsa a
ni. Fa mipa hlir 4 a nei a.
Eizawnna leh Hna lam:
Lalṭanpuia
hian hmun hrang hrangah lehkha a zir kual hnuin, nupui a neih hnuah Aizawl
College aṭangin kum 1986 khan BA a zo a. BA a passed hnu hian sorkar hna a
thawk ṭan a, sorkar hna department hrang hrangah a thawh kual hnuin, Economics
and Statistics
Department-ah a boral ni thleng khan a thawk a, a boral hma lawk khan
Inspector-ah a kaisang nghe nghe a ni.
Zo-Rimawi Khawvel Lamah:
Lalṭanpuia
hi naupangte a nih lai aṭanga mi tumruh leh, a thil tih tawhna lamah chuan
hlawhtlin ngei tuma bei ṭhin mi a ni a, Zoram khawvelin a hmelhriatna ber rimawi
lamah hian naupangte a nih lai aṭangin a tui ṭan a. Rimawi tum te hian hun tam
tak a hmang ṭhin a, mi lungleng thei tak niin, a tleirawl lai hunte pawh
lungleng taka zai nan leh hla phuah nan a hmang nasa hle. An khua Kawrthah atanga
Matric a pass hnuah Aizawl lamah College a kal a, Lallianmawia Pachuau te nen
inkawp chhoin an inzui nasa hle a ni. Lallianmawia Pachuau khan Lalṭanpuia hla
hi 10 vel lai a cassette-ah sak sak nghe nghe a, lar pawh a lar hlawm hle nghe
nghe a ni.
Lallianmawia
Pachuau khan a hla a sak lar nual hnu khan, ani pawn B.A a zo ve ta a (BA a passed hma a mipui hriat hlawh khawpa
zai a duh lo a), amah ngeiin ama hla phuah te a lo sa chho ve ṭan a. Ni 15
October, 1986 khan AIR, Aizawl-ah hla a thun ṭan a, heta tang hian Zoram mipui
hriat a hlawh ṭan ta a ni.
Lalṭanpuia Tochhawng hian Cassette Album 3 a siam a, Chung te
chu :
1.
Ka hmangaih ka rawn zawng che,
2.
Hmangaihna ka ngen a ni (1989 August) tih leh
3.
Zoram khawvar hun nghakin (1992) tih album a siam
leh a, A album pahnihna ‘Hmangaihna ka ngen a ni’ tih album
kha Zoram khawvel hriata a rawn lar chhuahna a lo ni ta a ni.
‘Hmangaihna ka ngen a ni’ tih album a hla Hmangaihna
ka ngen a ni, Mampui ka duh berche a, Ka lo
haw thuai dawn, tih leh Jenny a tel ve lo tih hlate chuan
Zoram rimawi khawvel a deng chhuak chiang hle a. Heng hlate bakah hian a hla
phuah leh amah ngeiin a sak “Miten an hmu ve lo”, “Min hruai ve ang che”
tih hla te leh a aihnahphahpui ṭhin Lallianmawia Pachuau a sunna hla ‘Hmangaih
LM’ tih hlate chuan hriat an hlawh hle a ni. ‘I hriat loh ka hlau ṭhin’
tih leh ‘Ka duat ngawt ang che’ tih hla khan Zoram rimawi khawvel a
deng chhuak hneh hle.
Lalṭanpuia hian a hlaphuah leh a sak zingah chuan ‘Miten
an hmu ve lo’ tih hla hi a duh ber a, ‘Mampui ka duh ber che a’
tih hla hi mawi a ti ber thung.
Lalṭanpuia khan Hla 50 vel phuahin, hla 26 chu Radio-ah a thun (record)
a, Lalṭanpuia
Tochhawng hla phuahte hi - Pathian fakna
lam hla, khawhar hla, Lengzem hla leh
Hla lenglawng te an ni hlawm a. A hla phuahte hi a hit hlawm hle. A
zaithiam leh hlaphuah
thiam avangin Lelte Award pawh a lo dawng nual tawh a ni. Mizoram pum huap Zai
intihsiakna (Solo Competition)-ah
pawh lawmman pakhatna ṭum
hnih lai a lo la ve tawh bawk a ni.
A
Hun Hnuhnung:
Kum
2015, November ni 1 tlaia a lengchhuak haw lam chu, an In panna kawngah a chesual
a, a chetsual lai hmutute’n an theih anga rangin 7th Day Adventist Hospital-ah
an hruai chho nghal a. A theih ang angin a hliam hi buaipuiin Oxygen-te an pe
a, a hliam a nat deuh avangin Aizawl Civil Hospital-ah hruai chhoh leh a ni a.
Doctor leh Nurse-ten theih tawp chhuaha an buaipui chungin tlai lam Dar 6:10
khan a hliam tuar lovin a thi ta a ni.
PIALRAL RAMMAWI – Lalṭanpuia Tochawng
Pialral rammawi hla Lalṭanpuia phuah hi a hla
phuah hmasak pawl a mi a ni a. Kum 1979-a pawl Sarih (7) a zirlaia a phuah a
ni. Lalṭanpuia leh Lallianmawia kha mi inang sa inang an tih ang chi, duh zawng
leh lunglen zawngte in ang em em mai leh inkawmngeih tak an ni a. He a hla
phuah pawh hi Lallianmawia khan a album Duatlai Atea cassette, kum 1986 kum
tawp lama a siamah khan a thun a nghe nghe a. Lallianmawia khan a larpui em
avangin, Lallianmawia phuah emaw ti pawh an awm chawk zel a ni.
Lallianmawian a cassette-a a thun chu a rawn
lar tak tak hma khan Lalianmawia kha a lo thi hman tawh si a. Mi ṭhenkhat phei
chuan amah leh amah a lo insak chhan a nih hi an tihial ṭhin a ni.
He hla kan zir turin a sawi a tum
leh tarlan a tum tlangpui chu tawi te chuan, “He khawvela thihna avanga inṭhenna lo awm ṭhin hi a lungchhiat thlak em
em a. Nakinah thih hnu piah lamah bak kan inhmukhawm thei tawh dawn si lo a.
Thih hnu piah lama lenrual duh leh ngaih em em te nena intawhkhawm leh inhmuhkhawm
leh vat a chakzia tarlanna hla a tih theih ang chu”. A changtin kan sawi zauna aṭangin kan rawn
sawi fiah chho pah ang.
A hla changkhatnaah chuan he hla
phuahtu hian a ṭhiante, a lenrualte ho chu, in ngaihtuah ve ngai em, he kan
khawvel inher vel dan leh mihring nun te hi. He dam chhung tawi teah hian, hlim
ni tawng ṭhin mah ila, lungngaih hun a lo her chhuak leh a. Dam chhung khawsak
lungkham buaiin mi tin kan buai em em mai si a. Hlim ni kan tawn ve chhun te
lah hian rei a daih ṭhin si lo. Heng hringnun inher dan te hi chhut neuh neuh
chuan lung hi a awi thei mawlh lo a ni, tiin mihring nun inher kual, buai dan
vel a rawn tar lang a. A hla Lallianmawian radioa a thun hi lo ngaithla pah
ila:
1. Lenrual zawngte u, in dawn ve ṭhin em?
Lei hringnun damlai lungngaih buaina,
Hlim ni awm chhun te hi a va rei lo em,
Ka dawn changin lung reng a awi lo.
A
hla thunawnah chuan he hla phuahtu duhthusam hi kan hmu a. A duhthusam chu he
khawvela mihring nunte hi a tawp huna, pialral rammawi, vanrama ṭhen tak ṭhiante,
lungduh ngaih em em te nena intawhkhawm leh a, inhmuhkhawm leh nan he khawvel
hi chhuahsan leh kalsan a chakzia kan hmu a. Hla thu har leh ulh em em hman a
la nei lem lo a, a tluang ṭhain a mam pawh a mam ṭha viau awm e.
Lei hringnun
pel a, len hun tur,
Ka ngahkhlel
em mai, pialral rammawi chu,
Thleng ila,
aw chu hmun ngei chu.
A hla chang hnihnaah chuan Mizo sakhaw hlui
lama pi pute rindan hmanga a duhthusamna kan hmu leh a. Pi leh pute Kristian an
nih hma kha chuan hawilopar, lunglohtui te kha thih hnu piah lama an hmuh leh
thihna khawvel lama an tawn ṭhin a nih dan te kan hre vek ang a. Kristianna
sakhaw lo luh hma kha chuan mitthi te kha pialral, mitthi khaw kal kawng an
zawhnaah khan hring lam khawvel ngaiin, an lung a leng em em ṭhin a nih kha. Mahse,
hawilopar an tawn a, lunglohtui an in tak hnuah chuan hring khawvel an ngaihna
zawng zawng te chu a bo ta vek ṭhin tih kan hria ang a. Chung pi pute sakhaw
hlui rin dante chu rawn tarlangin, thih hnu piah lamah chuan leihringnun
ngaihtuah tawh loha awm theihna, hawilopar tawnin, lunglohtui te kan in ang a.
Mihringte khawvel chuan min pawt lungleng tawh hek lo ang a. Ṭhenrual duh kan ṭhen
tak te nen khan kan la intawkkhawm leh dawn si a tiin a rawn zaipui a.
Hawilopar tawna lunglohtui dawnin,
Lei hringnun reng hi dawn zai rel lovin,
Ṭhen hnu lungduh zawngte nen chuan,
Awi maw kan intawk khawm leh ang.
A hla chang tawp berah chuan mitthi angin an dah
chin, an inchan vel thung ta a. Chutah chuan zawhna siamin. Kei hi lo thi tain,
hawilopar leh lunglohtui te chu lo in in, lo tawn ve ta ila. Khawvela ka ṭhian
leh lenrual zawngte khan engtin nge min ngaih ang aw? Engtin nge min lo sawi
ang a, ka chanchinte an lo sawi ve nasa ang em titen an ngaihtuah kual vel a. Chutah,
thih hnu piah lamah lungrual leh thurual tak ṭhenrual te nena intawhkhawma,
inhmuhkhawm vat vat a chakzia chu sawi lehin, a ṭhiante ho te chu an chak ve em
tiin zawhna a siam zui leh ta a ni.
Engtin min ngai maw, ka lenrual zawngte,
Hawilopar tawna lunglohtui dawn chu,
In nghakhlel ve maw ka lenrual zawngten,
Aw ka nghakhlel em mai kei zawng.
Aw le, he hla in a sawi tum tlangpui chu ṭawng
tluang pangngai zawkin tikhan kan sawi zo a ni leh ta mai a. He hla hi pawl Lalṭanpuian,
sarih lek a zirlaia a phuahah chuan a nep lo khawp mai. Tin, he hlaa a themthiamna
lo lang chu, pi pute sakhaw hlui rin dan kaikawpin thihna leh thihna piahlam
khawvel te a rawn tar lang a. Mizo kan nih chhung chu pi pute sakhaw hlui lama rin
dan te kha, eng emaw chen kan hriat ve ngei hi a ngaiin, a pawimawh em em a ni
tih hria ila. Thu leh hla ṭha tak hnar te pawh a ni ṭhin. Pialral tia, Kristian
nih hnua an rawn sawi hian, pi pute pialral ni tawh lovin, Kristian te vanram a
ni tih hria ila, Vanram sawina, tehkhinna (metaphor)
ṭha takin thu leh hla thiamte hian an rawn hmang ṭhin reng a ni. Lunglohtui,
hawilopar leh mitthi khaw kal kawnga an tawn ṭhin chungchang te pawh hi kan
hriat chian loh chuan hre chiang tura zir thar leh te pawh a ṭha khawp ang. Tun
ṭumah hi chuan kan sawi tel rih lo mai ang e, a sei dawn si a.
Comments
Post a Comment