KAWLTUCHAWI HLA SAWI FIAHNA
![Image](https://blogger.googleusercontent.com/img/b/R29vZ2xl/AVvXsEiSnAvYbH-OFql6qtadlRHJX3Taa4X8Bqq_hkJJRC0k9B45nX6At1OBpHkljgC7i4X5I26yPdLP4lEmyLZCRtU0Fa4L_ywAQvI1ntmMGjVwIp3Bqj7ukLancAjWBhg2DoiAKGt99ajJiOdL/s1600/1668585923410618-0.png)
Thu leh hla dahkhawmna. Mizo literature lama tui leh literature zirlaite'n an hman tangkai ve theih tak hlauhin. Mizo ziak mi hrang hrangte kutchhuak dahkhawm hi, i lo hmang tangkai ve dawn a nia. . References atan hman a nih loh chuan he Blog-a, ka thuziak bik hi suan kual phal a ni lo. Fakna te hi min lo hmeh sak zeuh ṭhin dawn nia!
KA PU CHU HMUN I PAN LEH DAWN HUN CHUAN…!
(Lalṭanpuia Tochhawng Shangri-la)
Rohmingthanga Ralte
Asst. Professor, GANC.
(Tukina ka la
mut laiin, ṭhenawmten an zai tir riai riai ka hria a. Ka thawhhlim aṭangin a
rauin min pawlzui a, ka thiam ang leh lunglenna phawk chhuak turin tihian ka
ziak ta ngawt a. Ka lung hi a tileng viau a nih hi! Tin, vawiin lamah, sample
te randoma an test naah kan negative hlauh nen. Vawiin chu lunglenna leh lawmna
nen hun kan hmang a nih hi. I peih leh lo chhiar la, I lunglenna a phawk chhuak
a nih chuan ka rilru ang pu mi i ni mai)
Kum
rei fe chu a ral ve ta reng mai. World bank kawng a la tlang lo a, Aizawl aṭanga
chhim lama zin tur chuan Aizawl hmar lamah Tuiriala tlan thlak phawtin Serchhip
Lunglei roadah, a kawng thui theih dan ang berin kan tlan ngar ngar ṭhin a ngai
a nih kha.
Lawngtlai, Chhimtuipui
(Kawlchaw), Saiha han tih ringawtte hi kum 2000 hma lam kha chuan kan sawi rik
dan aṭang ringawt pawn a hla nghal vawng vawng hle ṭhin. Hostelah khan chhim
lam aṭanga lo kal, lehkhazirpui kan nei nual ṭhin a. Sikul kan chhuahsan tak
hnu khan, anni ho nen hian, tun thlengin hmaihmaa inhmuh leh tih ni tak tak hi
a awm thei ta lo reng a nih hi!
Kum 2003 nge 2004 kha ni ta
ni? (hriatrengna aia hriat loh rengna a ṭhat zawk hi chuan thil hi a buai nuai
mai ṭhin). A vawi khat nan chhim lama kalna hun remchang kan hmu ve ta hlauh a.
Rilruah chuan, chuan ngai loh, dai ngai loh ram lama kal tur kan nih avangin,
rilru a phurh surh mai a. Saiha pa, a hun laia MDC, pa ṭawng duh deuh mai khan
Taxi in min hmang phei kha a ni a.
Chung hun lai pawh chu,
Aizawl Lunglei road pangngaia kal a ngaih ṭhin lai tho kha a ni a. Kawng a thui thama, hahdam deuha kan
tlan theih nan, motor inkhalh chhawk turin, ka nuphalpa ni ta, Mama nen kan pu
min hruaina tur lamah chuan kan tlan ta vang vang a nih kha. Kha mi ṭum khan
Aizawl hi zing dar 6-7 velah kan chhuahsan a, Saiha kan thlenin khua a la thim
lo, fur lai a ni nghe nghe a. Aizawl aṭanga Saiha, Lunglei road hlat lam hi tuna
Google Map-a a lan dan chuan KM 378 a ni a. Thleng hma kan inti hle, a
chawhrualin darkar khatah 50 km/h ang velin Maruti 800 khan kan tlan a nih hmel
a, Mizoram zin kawng angah chuan hetiang anga tlan par par theih chuan tlan hi
a hlawk duh hle, dinna zeuh zeuhna te a awm lo thei ṭhin si lo a.
Kha mi ṭum kha, ‘Pelh’ chawhmeh ka hriatna hmasa ber a
ni a, kan pu min hruaitu chuan chhim lama an chawhmeh tui leh chhuan em em a
nih thu hahipin a sawi a, khang lai khan Mizoram hmar lamah chuan he chawhmeh
hi kan la hmelhriat vak lo nghe nghe. Mahse, a baiin hotelah kan hmeh a, a tui
kha ka van ti lo tak, bai hi ka ngaina lo sa nen. Chutih rualin Mizorama hotel
tuina ber tia a sawi, Ṭawipui hotel erawh kha chu an siam tui ngang mai. A tuk
chawlhnia kan haw phei leh lam pawn, an chhungkaw zingah tukṭhuan kan ei haw
leh nghe nghe a. An vawksa rep kha a tui kher a sin. He mi ni lo, mi hruaia
Saiha leh Lawngtlai ka tlan ṭuma, ka motor tluan loh dan pawh hi sawi fe tham a
awm. Ka zin hmasak berin khaw en laiin kan thleng kha a ni a, a hnua nunau ho
daha ka kal leh chuan mutthluk palh hlauin Kawlchaw-ah zing dar 4 velah motora
ka mu ta tawp kha a ni a. A va inang lo tak! He lam chu duhtawk phawt ang.
Kha mi ka zin hmasak ṭum
khan a lawm an khaw luh dawnah, Saiha lam aṭanga luhin, ‘Khaw sakhming mawi ber
Chawntlangpui’ tih an tar ka hmuha, ka hriatreng tak chu. An tarna
bulah khan kawng kham zawngin tui kha a luang her her nghe nghe, fur lai a ni
kan tih kha aw. Khaw hming mawi ber an tih tak chhan hi ka hre lo a, zawh tur
lah an awm hek lo, an khua kha kan chhun pelh a, haw lamah kan zing pelh leh a.
Mahse, Lalṭanpuia Tochhong hla avang hian a nih ka ring ta rum rum. Ani khan a
hla ‘Min hruai ve ang che’ tih chang tawp berah khan,
Chhimhlei tual
nuamah sawn vangkhawpui sakhming mawi,
Chawntlangpui
leh sihtlangpui a awm a, tih leh
Vangkhawpui sakhming mawi, kumtluangin vul
reng rawh, tiin he khua hi a hlaah khan a lo chawi a nih kha.
KHAW HMING CHAWI HLA PAHNIH:
Khaw
mal hming chawia hla phuah hi engzat nge awm ka hre mai lo a, a tam viau mai
thei a. Mahse, mi tam takin an hriat erawh a tam lo a nih hi! Ka hriat ve
pahnih te erawh hi chu an lar hle nih hi. A Phuahtu lah Lalṭanpuia ve ve an ni
a. A phuahtu pakhat zawk Sialsuk Lalṭanpuia te khuaah hian mi pakhat, ‘chal kawl
deuh’ hi a awm a. Ka ṭhianpa ka tih ve ṭhin a ni a. Ani hian an khaw hla, ‘Aw Sialkhawpui’ thluk rema lam chiah hi
a thiam ni maw? Tlem lai deuh khan Rungdil bulah sangha kan han man a. AC/DC hla
hot ṭang et awt kan play pawn, a chheihpui zel tho mai a.
Ani
hian an khaw hla ai chuan Lalṭanpuia Tochhong hla hi a tana a pawimawh zawk zia
leh a duh zawk a ṭulzia hi a hre mawlh si lo. A chhan chu an khuaah hmangaih a
hmu lo a, a ngaihsak hek lo a. Hmangaihna ti riangvaitu, tihlu lotu a nih phah
mek si a. Tu pu nge, tu pu mah tih mai mai tura, a len tar hi ka hlauhpui ve em
a ni. Chuvang chuan hmangaihna dai ngai lohna hmuna hruai hi ka batah ka ngai
ta deuh a. Hruai ngei pawh ka la tum a. Sihtlangpuiah Sih nau ang a nuih nil eh
Chawntlangpuiah Chawnpui par iang tleitiri chhai ni a la thleng mahna? “Aw Sialkhawpui ka pianna hmun, ka seilenna tlang
lei luai” tiha a inawih reng hi chuan hmangaihna kawngah hmasawnna a hmu
ngai dawn si lo. “Kan lenlai enchim loh
parte i am dun ang” tih te phei hi chu a var pawh pha lo hrim hrim, Partei
nei ve hek lo le!
MDC PAHNIH TE:
Kan
pu, Saiha MDC ni ṭhinin min hruai aṭang kum tam fe hnuah Lalṭanpuian hmangaihna
a aupui nasatzia te hi kan hrethiam ve ta chauh chu a ni si a. Hrangchalkawn aṭanga
han her liam phei leh vuah vuah mai hi chuan kan tum ram Saiha la hnaih loh dan
hre ru kar chung siin, rilru hi a engthawl thei mawlh lo a. Mahse, tunah hian
kal leh ta ngat ila, Chawntlangpui leh Sihtlangpui khua te vang ringawt pawh
hian ka va phur dawn em! Kan puin min hruai ṭum khan hengte hi lo hre tawh ni
ila aw, kan thil thlir dan leh khaw hawi te a dang daih tur lah ni a, heng thu
leh hla lam ni lo, a kal kawnga khaw hming leh a phuahchhan te kha min hrlih
chipchiar viau hlawm a. Ṭhualṭhu khaw hming put chhan te erawh a duhaswm loh
hle.
Khawchhak
lam han fan khian lung hi a leng ruih zel mai a. Chhim lam pang kal erawh chuan
eng rilru nge kan put ka hrethiam lo. Mahse, tunah tunah ngei hian va luai phei
leh ta ila, rilrua he hla hi sak phei vawng vawng duh tawk mai lovin, car
tapeah ring thum dup dupin han ngaithla phei ila, he hla phuahtu rilru chhungril
tak hi kan pawh phain ka inring. Sawrkar hna avang te, eizawnna avang te hian
mahni khaw hmun pangngaiah a awm theih lo fo a. Mahni hna thawhna hmuna nuam titaka
awm thei te hi mi vannei an ni fo a. Sawrkar pawn an hnemhnanpui fo si. Aikal pawh
la chuang lo a, mahni thawhna hmun ni lo, mahni khaw lama sande sikul kaikim
thei te hi an awm nawk ṭhin si a.
Saihaa
min hmangtu kha a hun laia MDC a ni kan tih tawh kha. Chutin, he hla lo pianchhuahna
pawh hi MDC ṭhin tho, Pu Manghnuna a ni nghe nghe a. He hla aṭanga a lan dan hi
chuan mi ṭha leh mi dik tak a nih hmel a. “Aw
chutah chuan Pu Hnunan diknain ro a rel a, Hmangaihnain duatten a enkawl ṭhin”
tih lai tlar hian Pu Hnuna nun ram chu a tar lang chiang viau awm e.
LALṬANPUIA LEH
HMANGAIHNA:
Lalṭanpuia kha he khuaah, (khawi zawkah nge ka
hre lo) hian hnathawkin a awm ṭhin a ni sawi a ni a. He khuaa lanu leng te hi
an felin an ngaihzawn awm hle a ni ang. A hlaah hian a chawi vul thiam em mai
a. Ni hmangaihna leh diknain ro a relna hmun hi chu hmun hrehawm a awm thei lo
ang. Pu Hnuna chanchin hi kan umzui zel lo ang. He hla aṭanga a lan dan hi kan
duhtawk mai ang. Tichuan, he hla hi kan duh angin zalen takin kan letchhuak (interpretation) ve thung ang dawn a ni.
A hla chang khatnaah chuan:
Chhimhlei tual
nuamah sawn vangkhawpui sakhming mawi,
Chawntlangpui
leh sihtlangpui a awm a.
Aw chutah
chuan Pu Hnunan diknain ro a rel a,
Hmangaihnain
duatten a enkawl ṭhin.
A
lema kan lo dah hi en ila, he khaw pahnih hi khawthleng nuam lo tak chu a ni lo
tih kan hmu thei ang. Mizorama lui lian ber Chhimtuipui pawh awlsam tein an
thleng thla zung zung thei dawn tih a chiang a. Khaw inhnaihte an ni tih kan
hmu a, an nula leh tlangvalte pawh an inlen pawh fo ngeiin a rinawm a. Thikthu
leh mahni khaw nula te hauh bik hlur avangin tualthu chhia pawh an nei ngai
lovin a rinawm a? Chumi piah lamah an aiawha an thlan Pu Hnuna chuan dik leh ṭha
zetin, hmangaihna nen a bial mi te chu a enkawlin, an tan a ding ṭhin tih a
lang zui bawk a. Hmangaihna leh rinawmna te a par no dun hlep hlep mai dawn a
ni tak si a aw!
A hla thunawnah chuan hmangaihna ropuizia,
rinawmna feizia chu uar leh hmangaihna leh hmangaihtu hlutzia thiam tak maiin a
rawn zaipui ta a:
Hmangaihna a
dai ngai lo,
Rinawmna a
ngai reng.
Hlimna par ang
a vul.
Aw! Kei pawh
chutah chuan,
Hmangaihtu leh
hmangaih,
Ka zawng ve
duh a ni.
Kei ve thelul hi chuan
hmangaihna leh hmangaihtu hi he khawvel damchhung atan hian ka nei tawh a. A
dang zawn belh leh ka mamawh tawh lo a. Mahse, rinawmna leh hlimna te erawh
hmangaihna piah lamah hian neih reng chu mihring kan nih chhunga kan mamawh a
ni si a.
Ka pu chu hmun
I fan leh dawn chuanin,
Aw keipawh min
hruai ve ang che.
Sialsuka ka ṭhianpa ka tih
kha, a pu chu ni lo mah ila, he hmunah hian kan pu MDC ten min lo hruai tawh avangin,
kal leh tik ni a awm chuan ka la hruai ve ngei ang a. A tan hmangaihna leh
hmangaihtu kan la zawng khawp ang. Hlimna par vul hi hmuh a nuam si a.
A hla changhnihnaah chuan Pu Hnuna kalsanin, an khua leh a chhunga leng
te a rawn umzui ta a. Chu khuaah chuan, khawvel nun chu par ang a lo tlan tawh
a ni mahna le, patling a pumpain chu khua han ngaih ngawih ngawih mai chu, a chhan
tur dang vak a awm lo. Ni, ngaih tlak leh thlakhlelh tlakin chu khua te chu an
awm a ni mai a. Vangkhawpui tleitiri te lungawi tak mai han rim leh han chhai
chu, a aia nuam tur dang khawvelah eng nge awm chuang ang le?
Hmangaihna hi zawng a lo ropuiin a lo hlu em mai, kan Pathian lehkhabu thianghlimah pawh thuhriltu khan heti hian a lo aupui daih tawh a nih kha:
“Mihring ṭawngte leh vântirhkoh ṭawngtein thu sawi thei mah ila, hmangaihna ka neih si loh chuan, dâr ri ang emaw, dârbenthek ri ang emaw chauh ka ni ang. Thu hril theihna neiin, thu ril zawng zawng leh hriat tûr zawng zawng hre vek mah ila, tlâng sawn theihna khawpa rinna nasa nei mah ila, hmangaihna ka neih si loh chuan eng mah ka ni lo vang” (1 Korinth 13).
Hmangaihna tuipui hi a taka
hmuh theih nise, a chen mai duh tawk loa, liluha, pil paha hak bawrh bawrh duh
hi kan tam khawp ang le. Hmangaihna hlutna leh ropuizia hre em emtu hrifangte
hi kan inhmangaih hlei thei ṭhin lo mai pawh a. Amah Lalṭanpuia tak pawh kha
hmangaihna lipuia a chen dan leh a lo chhek per nasat ṭhinzia chu a hla dangah
pawh kan hmu ṭhin a, he hlaah pawh hian a mawi tawk fang chuan a hak ve nual a
nih hi:
Aw
Chawntlangpui leh Sihtlangpui lung min lentu,
Chuan ila an
vangkhawpui tleitiri,
Suihlung ka
rualpui ang a, hlimtea laitual lengin,
Hmangaihna tuipuiah kan pil dun tur.
Khaw sakhming mawia ka ṭhianpa ka hruai hunah chuan, an khaw nula hmelṭha ber kan rim ngam
lo a nih pawn, an khaw nula fel ber chu kan rim ngam tur a ni. Ti ti phung kan han
vawrh ang a, he hla Lalṭanpuian an khaw tana a lo phuah leh an khaw vanneihzia
te uar takin kan sawi ang a. Nula mitmei hmu nghal mai lo pawh ni ila, hniak
kan hnutchhiah tawh dawn avangin, kan kal leh hunah kan hniah chu chhuizui
lehin hmangaihna lipui lama luh a chakawmzia ten kan ti ti kan thlak thei tawh
mah na le? Kan hlawhtling ta hlauh a nih chuan, ka ṭhianpa kha eng khaw sawi
set set lovin, duh leh hmangaihna lipuia tla hlum law law turin ka theh thla
ang a. A hma hun tur chu a kutah ka dah tawh ang. A lo la inhaichhuak thiam lo
a nih chuan ka tuithlar zui tawh bawk ang.
He
khaw sakhming mawi te pahnih ka tlan pelhna hi kum 17 vel kal ta kha a ni tawh
a. He hla ka ngaihthlak thar leh hma hian, an khaw luh dawna ‘Khaw sakhming
mawi ber Chawntlangpui’ an tih chhan tur hi ka dap ka dap ṭhin a. Ka hre thei
mawlh si lo. Mahse, tunah chuan i he lovin, a chhan dik tak tur chu ka hre taah
ka inngai a, ka lawm veng veng mai. Hmana chhun pelh satlia lo deuh ang khan,
ka ṭhianpa tan ranngo va zawn leh te chu ka chak zek zek hle.
Kum
tam a liam tak hnu hian, he khaw pahnih hian an ropuina leh an nihphung te hi
an lo hloh daih tawh em, ka hre lo. Lo la hloh miah lo se, hlaa chawi satliah
mai ni lo, mi tam takin an khua an hriat phahna a nih ang ngei khan, Pu Hnuna
chekawi te hi lo la awm zel thei se tih hi duhthusam a ni. He hla phuahtu
duhthusam (Sahngri-la) ang hian
hmangaihnain suihlung lo la rual zel teh se:
Vangkhawpui
sakhming mawi, kumtluangin vul rawh aw;
I chhunga leng
lungduh zalengte Hmangaihnain suihlung rual se,
Beiseina leh
rinawmna, dikna te an thuam mawi ber lo ni se.
Mihringte
chenhona karah hian beiseina, rinawmna leh dikna te hi thil pawimawh ber ber an
ni fo a, anni reng bawk ang a. Mahse, heng thil ṭha leh ropui nunpui hi kan
thei ṭhin si lo a nih hi. Mi rinawm hi mi dik an ni fo a, mi dik pawh mi rinawm
lo an awm ngai lo. Kan dik tawk loh vang leh kan rinawm tawk ṭhin loh avangin,
chhungkua aṭanga khawtlang, ram rorelna thlengin kan duh leh beisei ang thil ṭha
kan hmuh theih loh phah fo a. Amah Pu Hnuna ang a, dikna leh rinawmnaa thuam,
hmangaihna nena khawtlang mipuite dawm ṭhin vek hi ni thei ta ila, kan ram pawh
hian hma a sawnin, Zoram hi Zoram nuam Chhawrhpial run dik tak a ni mai tur a
nia leh!
“Tichuan, hêng
thil pathum - rinna te, beiseina te leh hmangaihna te hi a awm reng dâwn, hêngahte
hian a ropui ber chu hmangaihna hi a ni.” (1 korinth 13)
He hla an sak thar leh hi an thiam vawng vawng teh a
sin!
https://www.youtube.com/watch?v=7N65rLiTflM
![]() |
Sihtlangpui |
![]() |
Chawntlangpui |
ZO TUNGCHAW
A ngaihnawm hle mai. Hla dang pawh han hriat zel teh.
ReplyDeleteChhiar a man hla lutuk e sir👍👍
ReplyDelete