LAMANGA NU LAWM VS HLAWH RAWIH NI?
(Han sawi ve tawh hrim hrim the ang)
-
Rohminga
Ralte
Kum tinin Nikir thla ni 21 a lo
thlen hian, ‘Lalmanga nu lawm rawih ni tih leh Lalmanga nu hlawh rawih ni’
chungchanga inhnialna hi Social media
lamah hmuh tur a awm ziah a. A inhnialtute hi an ṭan hmun lamah kawh takin an ṭang
ve ve ziah a. An inhnialna aṭang hian a khawi lam ve ve mah an inhmin ngai lem
lo niin a lang a. Kum tin inhnialna atthlak a nihna tur pawh a awm thei tawh
hial awm e. Sawi dan inpawmsak chuang si loa inhnial ziah mai hi.
A khawi nge dika dik lo zawk tih
sawi ka tum ve chiah lo a. A mi mal ang chuan he ṭawngkauchheh hi a dik ve veah
ka pawm mai a. A hahdam thlak ber mai. Thlalehah ‘Vawkhniahzawn thla leh Vawkhniakzawn
thla’ chungchangah hniah leh hniak chungchanga inhnialna pawh a awm leh
ngei mai thei?
Ṭawng chungchang hi sawi dawn chuan
a hun lai mil anga ngaihtuahna sen ve a ngaih ṭhin avangin, kan hriat ve phak aṭangin
“chutiang chuan tih a ni” tih ringawt hi chu ṭanchhan rintlak ber chu a ni lem
lo. Ṭawng hi a hun lai mil zelin a inherrem ve fo si a. Hmana ṭawngkauchheh an
hman ṭhin kha, khua leh tlang dung a hran ang zelin sawi dan te a lo danglam ve
hret hret ṭhin si a.
Lalmanga nu hlawh rawih ni tiha hlawh rawih chungchang hi
mi tam takin kan hriatthiam loh leh a dik thei loa kan ngaih chhan chu an hun
lai kan zuk ngaihtuah tel ṭhin loh avang niin a lang. Ṭiau thlangah hian
Mizorama lalte zingah Sailo an lian berin, an chanchin hi hmuh tur pawh a tam
ber a. Sailo lal dan kawngkal vek anga ngaihtuahna hman leh thil sawi vek mai
hi a awl phah reng a ni.
Lalmanga nu kha Ṭiau chhak lama lal
a ni a. An hun lai khan Fathang leh lal chhiah hrang hrang kha a la awm lo a
nih mai hmel? Fathang leh chhiah hrang hrang hi Ṭiau ralah eng zata tam nge a
awm ka hre mai lo a. Mahse, Ṭiau thlang lamah chuan Zahmuaka fate Sailo ho lal
an nih aṭang khan hman ṭan a nih mai hmel a. Lal tura an insawmnaah khan lal
dinhmun tur anga an inremsiamna kha a ni si a. Chutih rualin lal zawng zawngin
an hmang lo a nih hmel bawk a.
Lianchhiari pa Khawvelthanga kha
Dungtlang lal a ni a. Mahse, lo an nei ṭhin tih chu a fanu chanchin aṭangin kan
hmu a. “Lianchhiari pa loah chuan bung lian tawk ṭawi deuh mai hi a awm a.
Hnawk a ti hle mai a, “He bung mi thlaksak ngam hi chu awm se Lianchhiari ka
neihtir mai tur” a ti a”.
A thlak ngam an awm phawt chuan
Lianchhiari pawh khan lawma a neih hreh loh thu a sawi a. An khaw tlangval
zinga bung zar thlak ngam an zawn ṭum chuan, tlangvalho chuan Chawngfianga
chauhin a thlak ngam tur thu an lo sawi zel a. Tichuan, Chawngfianga kha
Lainchhiarin an loa thingzar thlak turin a sawm ta a nih kha. (heta ṭang hian
an inngaizawng chho ta tak tak pawh a nih hmel)
He tah hian enga tinge lalin lo an
neih? tih zawhna a awm thei ta a. A chhan bul tak hre lo mah ila, lal chhiah chi
hrang hrang ang chi kha Lianchhiari pate hian an la hmang lo a nih ngei a
rinawm.
Tichuan, Lalmanga nute lamah kir
leh ta ila. Hlawh a ruaia, ‘hlawh rawih’ chu a Mizo ṭawng kal hmang lo ti te kan
awm zel bawk nen. A Mizo ṭawng kal hmang loa kan hriat chhan hi, an hun lai kan
zuk chhut tel tawh loh vang a ni ngei ang. Kan hriat phak khawvel aṭangin tehna
kan siam ringawt mai zel a, thil hi a dikhlel ta hu ṭhin a ni.
Lalmanga nute hun lai khan hlawhfa leh inhlawhfa ṭhin an la awm a
rinawm loh. An ei leh bar inrelbawlna kha sapin subsistence economy an
tih ang chi, sum leh pai tel loa inrelbawlna a la nih ngei a rinawm. Inlawm an
nih loh chuan kaichhan an insawm mai ṭhin a rinawm a.
Lalmanga nu kha lal hmeithai a ni
ve ran mai si a. A khaw mipui te lak aṭanga a hlawh chu an tha kha a
nih hmel, lal chhiah chi hrang hrang a la awm lo a nih hmel a. Tichuan, an khaw
mipuite tha a rawih chu, a hlawh (chhiah/tax) a lak ni a ni ta mai awm e. Lawm
turin ruai dawn ta se, a lo kha a zo hman dawn lo, a chhan chu a khaw mipui tam
tak lawm let khan a hmanhlel ngei dawn tih hi chhut tel ve ta ila. Tichuan,
Lalmanga nu chuan hlawh nge lawm chu a rawih tak tih hi kan chhuizawn thiam
maiin a rinawm.
Mahse, ṭawng hi mihringte ang thoin
a ṭhanga, a inher rem ve hret hret zel ṭhin a ni. Ṭiau thlang lamah Sailo lal te
hnuaiah kan changkang ve zel a. Inlawm ringawta hun hman hunte kha a liam ve
zel a, tunah tak phei chuan hman lai anga inlawm ṭhin kha Mizoramah ngei pawh
hman lai anga uar leh kalpui nasat chu a nih tak lo tih kan hre vek ang.
Mihring kan pung ve zel a, sum leh
pai, tangka hmanga inrelbawlna (cash economy) kan hman chhoh aṭang phei kha
chuan, inlawm ringawta hun hman hi a theih ta loh tih a chiang reng mai.
Tichuan, sum leh pai hlawh turin, mite loa inhlawh emaw hlawhfa emaw atan a nei
deuh chuan rawih an ching chho ta ti ila, dawt a ni lo’ng chu. Chung ho chuan
lawm ruai tawh lovin hlawhfa an ruai tia sawi a ngai ta a (hlawh ruai tawh lovin).
Hlawhfa an hmelhriat hma kha chuan
hlawh ni lovin hlawhfa kha rawih ngawt a theih loh hmel tlat mai, kan ṭawngah
pawh hlawhfa tih thumal tak hi a la
awmin a rinawm loh. Tichuan ‘Lalmanga nu
hlawh rawih ni’ tih chu a Mizo ṭawng kalphung lohna a awm ta lo a ni.
Mahse, sawi tawh angin, hun inher
zelah inlawm leh kaichhan ringawta hun hman a theih loh chinah, hlawhfa chu
rawih a nih tak hmel a. Tin, Lalmanga nute hun lai angin thil a awm tawh lo a, Sailo
lalte pawn lo an neih tawh ngai loh avangin, an tan chuan lawm emaw hlawh emaw
rawih a ngai ta lo a. Fathang leh chhiah chi hrang hrang kha an hlawh ta zawk
nen. Hlawh rawih ṭawngkau chheh chu a taka hman a nih tak loh nen, ṭawng thi a
ni chho ta mai awm e. Mipui vantlangin inlawm an lo uar bawk nen, Lalmanag nu
bikin a hlawh rawih ṭhin chu lawm rawih tih ṭawngkauchhehin a thlak
chho ta a ni mai awm e. Heti hian he ṭawngkauchheh hi chu pawm kawp chu a nuam
ta mai a ni.
Nula hmelṭha deuh chu ‘lum hluma hlawh hreh lo tlangval an tam ṭhin’”!
ZO TUNGCHAW
Comments
Post a Comment