MIZOPA THINGSERH VS JAPAN-PA TUISERH (水盃 Mizusakazuki)
Lal lal hun lai khan hnam tin hian, lal leh an khaw tana inpumpek ngama intiamna hi an nei vek ṭhinin a rinawm a. Mizo tlangvalten 'thingserh' an sat ṭhin a. Japan tlangval hovin 'tuiserh' an in ve thung ṭhin a. Lal khua leh tuite tana intiamna leh inpumpekna kawngah hian Mizo tlangvalte aiin Japan tlangval ho hian, an sawn thui ngam hret chu a ang?
Pi pute khan ral lu an lam niin, mual laiah ‘Thingserh’ an phun a, chumi bulah chuan zu thlum ṭha elkhen chawhtawlhah an siak tling luau va; thingserh bulah chuan chempui an dah a.
“Kei ka ni” inti ngamte chuan thingserh chu an pan nal nal a, chempui chuan an kik kerh a; a bula ṭhu khan nopuiin zu a lo pe a, a in zawh veleh a kal bo va. Miten thingserh sat ngam hi hriat an chak a, an enthla ru deuh reng ṭhin a ni.
Thingserh sattu rilru chu hetiang hi a ni: “Ralah hian a ṭul hle loh chuan ka tlan ngai lo vang. Kan khua rawn runtute phei chu ka chhuah lo vang. Kan khua leh nunau hum tur chuan ka hnungtawlh lo vang a, hneh loh ai chuan thih hi ka thlang zawk a ni. Chuvangin, lal khua leh tui chhan nan ka nun ka pe phal e, tih lo hre rawh u,” tihna tluk a ni. Khaw khata thingserh sat ngam an tam hle chuan chu khua chu a thlamuang em em thin (K.Zawla)
Japan ho khi, thliarkarah awmin, indopui pahnihna leh a hma lamah khan! Asia-a hnam chungnung leh ropui bera indah leh inngai an ni.
Hnam chin dan phung an neih pawh a upa tawhin, an lal (emperor) te kha Pathian ang hiala ngaitu an ni. Indopui pahnihnaa America-in Atom Bomb an thlak khum hnuah pawh khan, sipai tam tak chuan tlawm an la duh chuang lo a.
Mahse, an lal Hirahito-an thil tam tak a ngaihtuahin, inphahhniama tlawm chu a ṭha ber a ti tawh si a. Tlawmna thu pawh a ma kamchhuak, an hriat ngei loh chuan sipai tam takin an awih dawn chuan loh avangin, a aw, a thusawi chu khung tir niin theh darh a ni. An theh darh hma hian sipai lal ṭhenkhatten a aw an thun hi ruk chhuaha, tihchhiat tumin an bei vak nghe nghe a ni.
Indopui pahnihnaah khan Japan thlawhna khalhtute khan an hmelmate an thihchilh hmiah hmiah fo a. An thlawh chhuah hmain thu tiam an la ṭhin a. Chu chu 'Misogi' an ti a. A awmzia chu, 'Thlarau tih thianghlimna' (Purify the soul) tihna a ni.
No-ah tui thianghlim an thli chhuakin, an in ṭhin a. Tam tak chuan zu emaw kan ti mai thei. Zu ni lovin tui thianghlim a ni. Tui an in zawh chuan an mi huaisen pasalṭha (samurai) te chin dan dungthulin, an tui inna no chu leiah an vawm keh zui a. No an vawm keh chuan, 'no chu tui in leh nan a hman tlak tawh loh' tih a entir a. Anni pawh chu an lo kir leh tawh dawn lo tih a entir nghal bawk a ni. Kamikaze, Melange, Hara-kiri te pawh a ni vek mai ang chu.
Type peih tawh lo 😂
Comments
Post a Comment