Indopui Pahnihnaa Korean Sipai Vanduai - Rohmingthanga Ralte

KOREAN SIPAI VANDUAI Yang Kyoungjong

(Indopui pahnihnaa ram hrang pathum tana ral dotu)

 

            Nimin nilengin NET ṭha lo nen, nizan lamah Indopui 2-naa inkhuainuaina rura D-Day, Normany-a, Allied leh Axis ho inbeih dan ziah atan ka zawng khawm e ka ti a. He pa chanchin hi ka tum loh deuhin ka hmu a. A chanchin behchhan hian kum 2011 khan ‘My Way’ tih film an siam chu download chawpin,  zing dar 5 thleng khan ka en leh ta zawk a. A chanchin ka chhiar tirha ka nuih a zat nen, a film en erawh chuan a lainatawm ang reng thung hle. Eng pawh nise, a vanduai dan hi han sawi reng reng teh ang.

 

            Yang Kyoungjong a chu Korean sipai niin, indopui 2-naah khan Japan ho tan ral beiin, Japan Imperial Army-ah a awm a. A hnuah Soviet sipai Red Army tan ral a do leh a, a hnu lehah German sipai Wehrmacht tan ral do lehin, Normandy-a German sipai an tlawm khan US sipaiin an man ta a ni.

 

Han ngaihtuah vang vanga, a nuihzatthlakna chu, Japan tan Red Army ho a do a, a hnuah an hmelma Red Army tan Japan te thurualpui German a do leh a, German hoin an man a, Soviet ho thu rualpui US a do leh a. Indopui pahnihna khan lawng karfung nei lo ang maiin, indona mual zauah khan a len kual vel a ni ber e.

 

Indopui inṭan tak tak hma kum 1938 khan Yanga chu kum 18 mi niin, Japan Imperial Army, Kwantung Army an tih atana lak luih a niin, Soviet ho ral bei tur atan, ral hma tawng dah a ni.  Khang lai khan Korea kha Japan awpna hnuaia awm a ni a. Battles of Khalkhin Gol an tihah chuan Soviet ho nen an inkhuainuaia, Soviet ho chuan Tank te an nei rup nen an ngam ta lo a, man a niin,  labour camp an tih lamah Prisoner of War turin hren a ni ta a.

 

            Kum 1942 indopui vanglai a rawn herchhuah chuan Soviet ho chuan an sipaite Nazi ho lakah an chan hnem hle tawh a. Chuvang chuan an mitangte chu tihluihna hmangin, Nazi ho do turin an nawrlui ta a. Red Army uniform an pe a, a ha duh chu an dam a, a ha duh lo chu an that nghal zel a. Tichuan, Japan sipai mi tang tam takte chu Eastern front lamah Nazi ho bei tur chuan thawn liam a ni leh ta.

 

                Kum 1943-ah, German sipai ho chuan Third Battle of Kharkov an tih indona aṭangin an man veleh ta thung a. German ram tana ral bei tura tihluihna hmanga nawrbeh leh a ni. German hovin, France ram an awp chinah thawnlutin, Soviet ho laka aṭanga an man chhawn veleh te hi ‘Easter battalion’ tiin an vuah nghe nghe a. Normandy lama Allied ho code name ‘Utah Beach’ lamah ṭangrual sipai ho lo dang tura dah a ni leh ta.

 

                Kum 1944, June-a, Noramnady inkhuainuainaah chuan German sipai chu an tlawm leh ta a, ṭangrual ho a siruk laa rawn thawk chu an dang zo ta lo a nih kha. Nothern France lama ṭangrual sipai, thlawhna aṭanga rawn ṭum thla ho ‘Paratroopers’ an tihte chuan Yanga chu an man veleh ta a ni

 

Ami (Nazi hoin American ho an sawina) ho chuan an man tirh chuan Japan mi leh saah an ngai a. Japan mi leh sain, Nazi uniform a lo ha daihte pawh chu a mak an tiletling hle. Indonaa saltang (POW) atan man a ni leh a, UK lamah thawn a ni a. Ani mai bakah hian, Lieutenant Robert Brewer of the 506th Parachute Infantry Regiment, 101st Airborne Division-a mi report-ah chuan an regiment chuan Utah Beachs-ah hian, Asian mi pali German uniform ha an man thu sawiin, ṭawng inhriat pawh tawn loh avangin, tumah an biak theih loh thu a sawi nghe nghe bawk.

 

Indopui a tawp chho ta zui bawk a, Yanga chu America-ah a pem zui ta a. Kum 1922 a thih thleng khan Illinois-ah a cheng ta a ni.

 

                Thlalak hi US sipai hoin POW ho nihna an ziah laia lak a ni a. Tunge a nih chiah officiala ziah ni lovin Young Japanese tia dah a ni a, US Natioanal Archives-ah chuan, ‘Young Japanese man’ tia chhinchhiah a ni bawk.

 

                Engtin nge, khang zawng zawngah khan a tlan bo mai loh tih leh engtin nge a hmelmate tana ral a do zel tih zawhna a awm thei a. Mi tangte kha ral hmatawngah an dah a, hnung lama an lo tlan kir vaih chuan lo kahhlum hmak zel an ni ṭhin a. An tan duhthlan tur dang kha a awm chuang lo. Thih nge thah I duh tih ang vel kha an dinhmun a ni.

 

A lehlam zawng chuan indona kha tizat dam piala a paltlang zel thei kha a vannei letling ang reng khawp mai. Khawchhak tawp aṭanga Europe khawmualpui, KM 7000 vel dam taka a thleng thla thei te kha a mak ang reng viau. Soviet hovin an man laia an that ta mai lo te kha a vanduai viaunain a vannei khawp mai. Soviet ho pawh hi German ho rawn em avang khan an nun rawn-zia a lang tam lo mai mai ṭhin a. An rawn em avang khan, indopui 2-naah khan Nazi ho hlauh ber sipai an ni ve tlat.

 

rhralte

Source:

https://military.wikia.org/wiki/Yang_KyoungjongZO TUNGCHAW