- Ka Tungchaw
(Tun lai chu indopui 2-na behchhan film ka en nasaa, Phung rilru-ah piring chauh an tih ang maiin, he lam hian rilruah a luah reng mai a)
Indopui pahnihnaah khan Soviet lamin Mosin Nagant Rifle hi an ralsai thiamte leh sipai nawlpui hote an hman tir a. A hun lai khawvela rifle siam chhuah tam ber pawl niin, an siam ṭan tirh kum 1882 aṭanga, kum 1892 thleng khan maktaduai 37 vel siam chhuah nia sawi a ni.
A rifle nihphung lam chu sawi zui lo mai ila. He rifle hmang thiam em emtu, Sniper pahnih, ralsaithiam dun chungchuangte chanchin nen inhmer kawp thung teh ang.
1. THE LADY DEATH
Khawvela hmeichhe ralsaithiam turu bera an sawi fo chu Lyudmila Pavlinchenko (Lutmila Paplichenka tiin an lam) khan he Mosin Nagant Model 1891 hmang hian, an hmelma sipaiho mi 309 (confirmed kills) a phil a.
He nu hi a danglam ve khawp mai! Soviet sniper tur atana hmeichhe 2000 an lak zinga pakhat a niin. An lak tirh chuan nurse turin an ti a. Mahse, a duh bau lo, a silai kahthiamzia a lantir hnuah sniper atan an ti ta chauh.
Indona hmunah lah chuan silai indaih lohna avangin, a tirah silai hum tur a nei lo. An ṭhianpa thi tur silai a rochun a. Romanian sipai 2 chu an thal nghal ṭhak a. Chuta ṭang chuan, official-in Sniper hum a luah ve ta chauh.
Chung, a mi pahnih kahhlumte chungchang chu, ''Kha kha indona muala ka bapist channa a ni'' tiin a sawi nghe nghe!
Mihring 309 lai mai kaphlumtu chu, sniper thlir lohna lam aṭanga lo thlira, mihring an nihna zawnah; ani chu khawngaihna nei lo ang hiala ngaihna leh zawhnate pawh a dawng ṭhin bawk a.
A mi kahhlumte chungchang, a ngaihdan an zawh chuan, ''Mihring ni lovin facist ho a lawm ka thah'' a ti hmak zel.
A hna chu a nuam a tih leh tih loh an zawhin, ''Sa peltuin, a sa pelh an kah thluk tawp ṭuma, hlimna nasa tak a chang ang hi a ni mai'' tiin a sawi bawk. An hmelma sniper mi 36 kaphlumin, pakhat nen phei chuan ni thum tal tap an inveh nghe nghe!
German lam khan an hlau hle a, a hming lemah ''Lady Death'' an sa/phuah hial a. German officer nihna leh chocolate tam tawk peka, an lama ṭang tur ten an sawm vel. Soviet tan khan a 'Cial' ve ngang a ni ang. Hliam a tawrh khan submarine ngatin, Sevastopol aṭangin an la chhuak nghe nghe! Amah behchhana movies an siam 'Battle of Sevastopol' pawh a hmuhnawm miah miah khawp mai.
2. THE WHITE DEATH
Red Army hovin ''The White Death'' tia an vuah khan, Mosin Nagant civil guard rifle, variant M 28-30 hmangin, Red Army, Soviet sipai mi 500 chuang phil ang a hriat a ni a. Indona lian tham vawikhata mi kaphlum hnem bertu nia hriat a ni bawk.
Kum 2017 hma lam zawng kha chuan a mi kahhlum zat hi mi 100 atanga 200 inkar vel bawr ang chauha hriat leh sawi a ni a. A mimal thil chhinchhiahna bu, kum 2017 a an hmuhchhuah aṭangin, mi 500 vel Soviet sipai a lo dah ṭha tih hriat leh a.
Amah khan a mi kahhlumte chungchang kha, engmah a sawi duh ngai lem lo a, a mi kahhlum a chhinchhiahte lakah, a inthiam lo ve ṭhin a ni ang, a diary chu ''Ka sualna list chhinchhiahna bu a ni'' tiin a sawi ṭhin.
Simo Häyhä (Simaw Helha zuk ti daiha) hi Finnish pa niin, Finland leh Soviet Winter War 1939-1940-ah khan a hming hi a chher a ni. Indopui 2naah pawh a hna hi a chhunzawm zel a.
A kahhlum zat (confirmed kills) hi inhnialna a awm ve reng a. Soviet lam chuan kha indonaah khan an record aṭang chuan Red army mi 600 chuang vel chan angin an insawi a, Finnish ho propagandaah te an puh a.
Mahse, metre 150 dana target, minute khat leka a ngaia vawi 16 kap fuh hman leh theitu a ni miau a; rifle load chawp ngai hmang siin. Kha indonaah khan Red Army nawlpuite khan vur rama, an camouflage atan, thawmhnaw var lam kha an la ha ngai mang lo bawk nen. Hmuh kha an awl phah nasa bawk a. Mi 500 chuang hi chu a phil a rinawm ang reng viau. Tin, scope a hmang ve duh lem lo a. Scope hman hian ''kan lu a lawr sang hret zawk a, a him lo'' a ti ve tlat.
An pahnih chanchin hi Internet leh Youtube lamah pawh hmuh tur a tam khawp mai. An chanchin tlanglawn kan rawn tarlang ve mai mai a ni e. Kan sawi tel loh ngaihnawm tam tak pawh a la tam hle.
Vasily Zaitsev
Tin, kan movies hriat lar em em leh hmuhnawm. Stalingrad khawpui Red army ten an lo venna, 'Enemy at the gates' a changtupa, Soviet Sniper tha zet Vasily Zaitsev pawh khan Mosin Nagant Rifle tho hi a lo hmang ṭhin.
Comments
Post a Comment