VAIRENGTE NAUPANG BO, HIGH SCHOOL TUIKHUAH, AITLANG LEH RAMHUAI BAHHNUTE - Ka Tungchaw

VAIRENGTE NAUPANG BO, HIGH SCHOOL TUIKHUAH, AITLANG LEH RAMHUAI BAHHNUTE

-Ka Tungchaw 

Vairengte naupang bon ṭanna bul high school tuikhuah hi kan naupan laia kan tui chenna hmun ber a ni ṭhin a. Vairengte khaw lumah kha chuan sikul chawlh apiangin kan veng lam naupang ho chu kan tleh phei hul hul ṭhin. Anih loh chuan naupang bo ruang an hmuhna, Aitlang lamah kan kal ṭhin a. Aitlang erawh a hlat tham avangin, kan kal ṭha peih meuh lo.

Naupang bona ṭanna bul vel hi, tun hma chuan ramhnuai dik tak kha a la ni a. High school tuikhuah lam hnaih berah hian ka nu leh paten, lo pawh kha an nei ve ṭhin a. Tunah chuan a khawlai ta hle mai a. Lirthei pawh a thleng phei ta vek mai. 

Ka thil sawi tur hi naupang bo nen inkaihhnawihna erawh a nei lem lo a, naupan laia tlatna mualte a nih avangin, a lunglen thlak vei em a kan thai luklak mai mai. Vairengtea kan awm loh hnu, khaw hran leh hmun hran hrana kan awm tak hnuin, khang hun laia kan hlauh em em, ramhuai chi khat nia an sawi 'Bahhnute' kan tih mai kha, khaw dang leh hmun dangah hian an lo sawi ve ngai reng reng lo mai tih ka hre hnuhnawh a. 

High school tuikhuah kawngah hian 'Bahhnute' a awm an ti ṭhin a. A hnute chu a lian em em a, a darah a bat chho ṭhin a.. Mihring a hmuha, a man chuan a hnute a hnek tira, an a vek a, a hruai bo ṭhin tiin, naupang a thukhawchawng leh naupang chumchiap tak tak la nih nen kan hlau thei ṭhin hle. 

Keini ang rualah, mahnia high school tuikhuah va kal vang vang ngam kha an awm ngai meuh lo. A bul vel kha di chhe hmun kawlh vul a ni ṭhin a. Tunah erawh thing a lo ding ngaw ṭha ta hle mai (thlalaka kan hmuh angin). Ṭum khat di hmun kan u ten an hal phei chu, a alh nasa lutuk kha, a ram pumin kan kang tawh mai dawn emaw kan tia, kan hlau lutUk kha, kan ṭap pur tawh nghe nghe.

High school tuikhuah hi Vairengte high school hoin an khuah a nih avangin a hmingah, 'high school tuikhuah' lo pu ta niin an sawi a. A dil chhak zawk hi hmeichhe tuikhuah niin, a thlang zawk hi mipa tuikhuah a ni a. Mipa tuikhuah lai takah thing ro a ding ṭhin a. Thingro ler atangin kan zuang (dive) thla ṭhin a, thingzungah ka lu pawh ka toh pawp tawh nghe nghe. 

Hmeichhe tuikhuah hi a thuk zawk ṭhin a. Mipa tuikhuah hi tui paih a nih deuh reng a vangin a thuk lai pawh fit ruk vel chauh a ni ṭhin a. Tui a tam tak tak ngai meuh lo a, fur puiah erawh a lian kan ti ve pang pang ṭhin hle. Hmeichhe tuikhuah hi mipa leh hmeichhiain, an inkhuah ṭawm a nih avangin rul lu pahnih nei a awm an ti ṭhin a. Tumah phei chuan an hmu lem hlei law. 

Hmeichhe tuikhuahah tui thiam deuh hlek an cheng ṭhin a. Mipa tuikhuahah tui la thiam vak lo an cheng ṭhin. Hmeichhe tuikhuahah pawh, a thuk chin lam sirah, thingro lian sang tak a ding ṭhin bawk a. Chuta ṭanga zuang thla ngam chu huai kan ti ṭhin hle.

Naupang bo te hi a bona kawng tur, a vah velna tur han ngaihtuah hian a lainatawm khawp mai. High school tuikhuah aṭanga Aitlang ram lam hi, inkarkik ve tak a ni a. Aitlang hi ramri lui awmna niin, leilet velah pawh a tlangpuiin vai chhawr tun hma kha chuan an awm ṭhin. Krismas hnah, hnahthial lak nan ten, kan kal leh zauh ṭhin tih lohah chuan a hla tham a, kan kal ṭha peih meuh lo a, Kawrthindeng pawh a tam ṭhin hle! 

Zan tam, ramhnuaiah, kawng mumal loa, naupang kum 2 mi vel han vak kual tur, a mangan dan tur, a thlaphan dan tur han ngaihtuahin, a khawngaihthlakin, a lainatawm vawng vawng khawp mai. 

Vairengte khawtlang leh mi tlawmngaite an fakawm hle a ni. Naupang nu leh pate pawh an rilru a hrehawm dawnin, Pathianin awmpui tlat rawh se