MISS YOU IN A HEART BEAT
(Back to 90s)
Ka ṭhutna sira vapual nupa niawma mawi, ṭhu dun melh melh te chu ka thlir reng lai chuan, ka ngaihtuahna chu hun tam tak liam taah a thlawk let a.
He kawvela subject ropui ber, mi tin maiin an nun kawnga an lo chai fo tawh, a ṭhen tan vanduaina, a ṭhen tan dam chhunga hlimna siamtu, ‘Hmangaihna’ chu chung induh thiam takte pahnih chuan a theory-a an zir mek bakah a practical in a exam chho ve mek tih chu ka hriat thiampui rualin, anni aia khawvel ka lo hmachhawn rei tawh avang erawh chuan an pahnih avangin ka zeldinna chu a kal ta vak mai a. Ka zeldinna leh suangtuahna chu hla pakhatin min hruai sak a…
I believe that there's something deep inside
That shouldn't be from time to time
I sure found out, thought love was such a crime
The more you care, the more you fall
Induh thiam takte pahnih thinlung chhunga hmangaihna par mekte chu ka hmuh hmaih hauh lo. Mahse, hmangaihna kawng an zawh thui zel hunah tluk leh tlak an la fawm ang a, nuih leh nuarna ten thla a la zar khum ve chuan ka ring a. Hmangaihna, an mahni’n an chaih theih loh hun leh hmangaihnain a la chaih hunah meuh chuan an huatthute thlengin a la te ve ngei awm si a.
Thikthute nei lem lo chuan an awm bik awm der si lo. C.Ṭhuamluaia’n, “Ka nu hmangaihna an tih hi a ṭha lo em mai, ṭahna a ni” tia a character pakhat a sawi tir ang deuh khan. Hmangaihna-ah hian engkim a lo awm dante, 'indona leh hmangaihnaah chuan engkim a thiang' tihte pawh thupuiah an rawn la neih ka ring a.
Chung hunah chuan an inngainatna leh an induhna a thuk zual zel ang a, mahse ṭhang kung malah mai mai pawh inpal tluk a awlzia te chu an la hre ve dawn si.
No need to worry, no need to turn away
'Cause it don't matter, anyway, baby
An pahniha inthlakhlelhna te chu a ni telin a la zual zel ang a, an hlim dun vang lai berin, lungngaihna leh beidawnna te nau pawh an la tawk ve ngei ang. An hlim mek laiin, an inhau ang a. Thinrim ṭeuha an inṭhaṭhen hun a thlen hnu lawkah, “ka thinrim tak tak lo a sin” te pawh an la ti ang chu!
Thinrim ṭeuha inhmu lo vang vanga an awm hnuah, an ingaihzia thu leh an lungphu nen lama an inthlakhleh dante chu an hrechiang dun tulh tulh ang a. Whatsapp lamah te, “kan inhauhna avang khan ka hmangaih lo che tihna a ni lo, khang kha chu thinrimna vanga thleng mai a ni” tiin a sawi fel lamah ṭan an la la ngei ang.
Ooh, I'd miss you in a heartbeat
Ooh, I'd miss you right away
Ooh, I'd miss you in a heartbeat
'Cause it ain't love, if it don't feel that way, oh no
An thinrimnate a lo reh hunah, chu hmun, tlaitla eng thlirna nuam zetah chuan; ka ṭhutna sira inthlahlel taka an la ṭhut dun leh hunah, mi dang an awm ve tih pawh hre lo ang maiin, an kutte pawh chu an la inkhalh sak leh niap niap ang a. Mipa zawk chuan a duati kut zum sin sel chu khalh neuh neuh pahin, “I kutte hi a te si a, mahse ka khawih ning thei miah lo” zawi te tein a ti sep sep ang a.
Khang tawn loh ni zawnga an inngaih dan, an lunglen dan, an inhauhna avanga thawk leh khata an khawvel par chuai hnupte, an lunglenna leh lungngaihna zawng zawngte chu an intawn leh ni chuan thup a theih loh dan chu, an intawn lehna chuan a tichiang dawn si a.
Mi hmangaih thei takte chu an eng a thawl tih nimahse, mi dangte hmangaih hnua kalsan leh mai a har dante, an hriat leh hmuh phak loh hruihrualin a thlun zawm tlat dante chu an hre chhawm zel ang a.
Chung zawng zawng chu thleng thei nimahse, thlen tir an phal dawn loh thu te pawh an la sawi ang a. Chuvang chuan 'fam chan hma chuan rinawmna vawng zel ang aw' tia rinawm tura intiamna thute pawh chu an chaw tui ber a la ni ngei ang le.
When we touch, I just lose my self control
A sad sensation I can't hide
To love is easy, it ain't easy to walk away
I keep the faith and there's a reason why, yeah
An pian hma kum sang tam tak, khawvela mihringte dah an nih aṭang khan hmangaihna hian hringmite zinga bu a khuar ve nghal a. Thuhriltu meuh pawn, ''hmangaihna lo chu tumah engmah ba suh u'' tiin a lo au pui lawm lawm tawh chu...
Khawvel mihringten zirna in nilo an lo exam fe tawh, mi tam tak in an fail pui dum dum ṭhin subject zir mekte pahnih kar thuah ka suangtuahna kal vak mai chuan mihring ka nih ve thozia lah min hriatchian tir tulh tulh si. An subject zir mek chu nang ngei pawn, har I tih fe ṭhin subject kha a ni tlat tihte ka chiang tulh tulh a.
Chuvangin induh takte hmangaihna khawvel din mek chu lo ral thlir sak ve maia, an hun tawn mek aia hun nuam leh hlimawm a awm lohziate chu hre zel se. Lungngaihna chirdup leh ṭahna ruamte pawh an la suartluan ve ang!
An hlim em em laiin harsatna an la tawn dawn thu chu hrilh mah ila, an pawm chuang lo ang a. A.. a dik lo hrim hrim, an vanglai leh vullai chu an duh tawka tlan turin… an khawsak phung leh chezia chu entawp mai a, 'khuanu rel fel sak chi zawk a ni' ti rilru chungin ka suangtuahnate chu kohkir leh zawk a ṭha e ti rilru chunga, ka thutna a ta ka thawh ruala, ka mawng ben fai pahin, anni leh ka suangtuahna chu kawla zam ral turin ka kal sawn san ta a...
No need to worry, no need to turn away
'Cause it don't matter, anyway, baby
Ooh, I'd miss you in a heartbeat
Ooh, I'd miss you right away
Ooh, I'd miss you in a…
Comments
Post a Comment