Rawnzawk (Silai zen bawm) - Liantluanga Hmar

 

RÀWNZAWK

 

- Liantluanga Hmar

He hming hi eng ṭawng aṭanga lak nge kan hre lova, Mizo zingah hria a lawi pawh kan tam tawh awm lo ve. A lam dan ka hriat ve danah chuan Pa-ràwn tih a 'ràwn' anga lamin kan ranvulh vawk kan lam angin 'zawk' tih hi lam tur niin ka hria. Rawnzawk chu Vailen hnua silai zen kenna ber niin Awlan leh Tukuli-ah inanga hman a ni.

Hmanlai chuan silai nena ramchhuak ten zen kenna atan seki an hmang ṭhin a, chu chu fungki kan ti a. 

 

A lem hi FUNGKI

 

 

A ki bul lam chu hnawh phuiin a ki hmawr zum lam chu a chhin neiin an siam a, an ak ṭhin. Tin, fungki hnuaiah hian sakhi emaw ngau vun emaw hmangin ipte an khai a, chu chu sahmim te an ti ve bawk. Tin, sahmim hi la phiar hraw tak hmanga siam pawh a awm ve tho awm e. Fungki leh sahmim ipte hi chu khawthlang Sapho tih anga ti ve mai kan nih a rinawm.

 

A thlalak kan hmuh ang hi Vailen hnua vai sumdawngin thir uma silai zen an zawrhna um kha niin Rawnzawk kan tih chu a ni a. A tlangpuiin kan hmuh phak ho kha a lema mi ang deuh hian a rawng a sen hlawm. A chhunga zen kha a chhinna no chu tehnaa hmangin silaiah zen chu an thun ṭhin. Sa lian lo sakhi hnuai lamah chuan chhin 1; tlema sa lian deuhah chhin 2 leh sai kahna atan chuan chhin thum te emaw an thun ṭhin.

 

An ramchhuahna lama zanriah buhfai an pai te an ren chang chuan rawnzawk chhin hmanga tehin silai teh khat anga chhuta inhming kima chaw an chhum, a taka ram pawh awm lova a buhhawp anga an ei ṭum te pawh a awm an ti. 

 

Hmanlai Mizo te kha thil hming phuah an awlsam a, Awlan silai an hmuh khan a hming leh a bung hrang te pawh hming an pe ve zel a. Chutiang hming an pek te chu hriat i nei ve em le - 

1. Silai âi bawp

2. A beng kua

3. A beng thlêng

4. A chaw

5. A hawlh fung

6. A hlo

7. A hmawr

8. A hmeh perna

9. Silai kawm

10. A kep tê

11. A khiangrah

12. A kua

13. A kur kum

14. A li pui

15. A li te

16. A mawng pheng

17. A ngul

18. A pial lung

19. A pian lung

20. A tho chuan

21. A ui lei

22. Laifei

23. Lailungdawt. 

Thil hi a tak hmuh tur a awm tawh mang loh chuan a sawina ṭawngkam hi chu a thi zel chu a nih hi maw!

 

 

 

 

RAWNZAWK 

 

 

 

ZO TUNGCHAW