MI DAWIHZEPIN THLAHRANG/RAMHUAI AN HMU DUH BIK TIH HI DAWT A NI -Lalmuanpuia Punte

 

MI DAWIHZEPIN THLAHRANG/RAMHUAI AN HMU DUH BIK TIH HI DAWT A NI

-Lalmuanpuia Punte

 

Hetia a thupui ka’n tih tawngna chhan chu kei hi Ramhuai leh thlahrang lam hlau em em ka ni a,  thil hlauhawm lam chi ka chhiar lai te hian chhunah pawh ka ṭim  uaih uaihin ka hmulthi te ding ur ur reng thin. Chuti khawpa patling ve si dawih chu ka nih rual hian thlahrang/ramhuai hi ka la hmu ve lo reng reng.

 

Zin deuh reng mai ka nih avangin mahni chauha hmun fianrial tak tak, khaw daifem tak tak a I.B/Rest House ang chi-ah te, a dawih a dawihin mahnia riah chang ka ngah hle a; vawikhatmah thlahrang/ramhuai hi ka la hmu ve miah lo. (ṭumkhat Gauhati-a keimah chauha hotel room-a ka riah a, ka room chhunga vai 2 titi ka hriat bak kha chu).

 

Ṭumkhat chu le…… a kum tak hi ka hre ta chiah lo, 1994 a ni ta em aw? Saiha Circuit House-ah ka thleng a, Dr. C.Silvera Central Minister a nih laiin Saiha a rawn tlawh dawn avangin Circuit House leh I.B tih tlak deuh chu a lo thleng sa te pawh min hnawtchhuak vek a. Soil & Water Conservation Rest House chhe tawh tak, fianrial deuh a awmah ka insawn a. Room 3, VIP room 1 leh ordinary room 2 a awm a, ordinary room 1 zawkah chuan ka in nghat a, he Rest House hi maintain tawh mang loh a ni a. A hran duh hmel riaua ka hriat avangin torch light thar leh zu tam tawk ka lei a, zan dar 9 velah mu turin ka haw a, mut zai reng reng rel ta lo chuan zu chu ka in ta ngat ngat mai a, May thla tir ṭo ruah haw tur thli thawt vuk vuk hun lai a ni lehnghal a. Thli chu a thaw vuk vuk mai a, tuidawn te chu a chhem thla ri rum rum mai a (Rest House maintain mumal tawh loh a ni ka tih kha).

 

Ka hlau lutuk chu thlahrang thawm hriat emaw hmuh ngei emaw inringin ka thu a, tuidawn vel han rik rum rum lai chuan ka hlau lutuk awm ngaihna ka hriat loh avangin torchlight thar nen chuan room aṭang chuan ka chhuak a, sitting room te, VIP room leh room 1 zawk te chu lutin torchlight chuan ka en kual vak vak mai a, engmah ka hmu si lo. In hnunglam kawngkapui hawngin pawnah ka chhuak a, in hnunglamah chuan zawl te reuh te a lo awm a, zawl hmawrah chuan zawl rawn anin inruak te reuh te hi a lo awm a. Pawn kil tin mai chu torchlight chuan ka chhun kual a, zawl hmawra in ruak chu ka pan phei a, tukverh aṭangin inchhung te chu torchlight chuan ka zuk en a, kawngkapui a chu handle-a hawlhkalh ringawt a nih avangin ka hawng a, a chhungah chuan ka dak a, in chhung kil tin mai chu ka en kual vel a, engmah ka hmu lo….

 

Room-ah ka lut phei leh a, kawngka te ka kalh leh hnu chuan ka hlauh em avang chuan zu ah bawk chuan ka ṭuan leh a, mahse ka hlauh em avang chuan ruih a har khawp mai, sana ka en deuh reng a, ka sana en hnuhnung ber kha zing dar 2 vel niin ka hria. Zu ka in hnem tak em avang chuan ka lo muhil a, a tuk zing dar 7 rik dawn hnaih tawhah ka harh a, ka inphih fai sawk sawk a, thingpui dawr lamah inhnawhpuar tumin ka kal a. Ka hmelhriat ṭha deuh mai, ni danga ka kal pawha an ina thleng tura min sawm fotu nen kan inhmu a. 

Thingpui dawrah kan chawlh luh chuan, “Khawnge i thlen?” mi ti a, ka sawi chiah chu…….“Ehe, i va huai ve” a ti ta mai a, ka beng ka tun ta hru mai a, “Eng nge” ka ti a, a sawi ṭha duh miah tawh si lo…. ka zawh ka zawh hnu chuan, “A hrang an tia” a ti leh ringawt a. A hma zan khan engmah hmu loin thawm engmah hre lo mah i la, insawn chhuah ka tum ruh em em nghal ringawt mai… Pu Silvera-te kha zankhat chauh riakin an haw leh tak avangin Circuit House-ah bawk chuan ka room ngai kha ka chan leh avangin ka insawn chho leh a, midang pawh an lo thleng ve nual takna in hemi zan hian a hma zana ka riahna avang khan ngai ka awh thei meuh lo.

 

A hnu kum 1 vel a liam tawh hnuin Cheural khua (Cheural hi Saiha piah a ni) ami Lungleia MZP hruaitu mi pakhat hnenah ka sawi chhuah leh avangin kha Rest House chanchin kha min hrilh ta a. Heti hian a sawi, “Kha Rest House chowkidar Gurkhali pa kha a thi a, a hran nasat em avangin a nupui fanaute pawh an awm ngam lova, department lamin Lawngtlaiah an sawn a, department pawhin an maintain zui ta vak lo a, mikhual pawh an thleng ngai vak tawh hleinem..” tiin….Chowkidar pa thla, a hran nasat lutuk avanga a chhungte rauhsan te kha ka lo va lut vel, awi, awi, awi, ka mur  uaih uaih.

 

Ka han sawi tum tak chu…. “Kei, mi dawih tak pawh hian miin a hrang an tih hmunah hre sa lovin ka riak a, ka dawih avangin a hran ngei pawh ka ring a, engmah ka hmu si lova, chuvangin thlahrang/ramhnuai hmu te hi mi dawihzep, an dawih vanga hmu ni a sawi ṭhin hi a dik love… thlahrang/ramhuai hi a hmu chi an awm, an dawihzep vang a ni lo ve…” tih mai zawk hi a ni.

 

KA THIANPA TE INLUAH HRANG

Thlahrang leh ramhuai hi ka la tawng ve lova, ka tuipui viau chung hian ka hlau em em lawi bawk a. Heti khawpa hlau hi chuan tuipui loh mai awm tak, ka tuipui viau tlat mai hi a mak ang reng khawp mai. Kei anga hlau ka ṭhian ṭhenkhatte hi chuan an tuipui ve lo khawp mai, a ngaihthlak pawh an ngaithla ngam ṭha ṭhum lo. Kei erawh chuan hlau chung chung in ka tuipui viau a ni.

 

Kan ṭhianpa 1, Mahuma tunah chuan a thi tawh, Aizawl veng hulum lai taka mi inhnuai a luah kha thlahrang chu an hmu ngai lo nachungin a thawm an hre ngun khawp mai. Amah kha tlangval, anmahni chauha inluah e ti lo in, kan ṭhiante ho hi an riak khawm luih luih ṭhin a, amah chauha awm kha a nei khat khawp mai. A changin rul lianpui tleng ri hruah hruah niawm tak te an hre ṭhin a, a chang leh bel hawng ri te an hre ṭhin. 

 

A hlauh lem loh avangin a sawi ngai lem lo a, ṭhian dang riak ve te’n a hriat ve zeuh zeuh ṭhin avangin an sawi a, kan hre ve ta a ni. A ina riak ve ṭhian dang, thawm hre ve ṭhin ho pawhin an hlau lem lo, a thuphungin an sawi mai mai lek a ni.

Kan ṭhianpa Thangkima - Tka inluah pawh kha a hrang ṭhin bawk a, ani pawh hian a hlauh loh avangin kum 3 chuang daih a luah a, nupui a neih hnuah an nuin a hlau viau chung pawhin insawn pui ta'ng e pawh a ti chuang lo. Tka pawh hi Mahuma ang tho, a nupui neih hma chuan mahni a inluah e ti lovin mahni chauha riak khat ve tak a ni a, ama sawi mai ni lovin ṭhiandangte pawhin an sawi aṭangin kan hria a ni.

 

He in hrang pawh hi amah inlar lova thawm ringawt nei ṭhin a ni. Choka leh sitting room inzawm a nei a, choka/sitting room lama an awmin bed room lamah mihring kal thawm a hre ṭhin a, bed room-a a awmin sitting room lamah thawm a nei ṭhin. Tka hian a hlauh loh em avangin ‘Hetianga thlahrang thawm rawn nei ṭhin hi chu puanin va khuh ila, a ruangam hi mihring puana khuh ang mai hian a lang thei’ tih thu a hria a, khuh a tum a, khami ṭuma a ṭhianpa a ina riak (tunge ka hre ta mai lo) khan a phal loh avangin a khuh ta lo.

 

A nupui neih hnuin zan 1 chu a mumangah a rawn inlar ta a, thil hrilh a lo tum a, “He ina ka la awm rengna chhan hi chu…….” a ti hman chauh a, a muhil a rum nasat lutuk avangin a nupuiin a kai tho hlauh mai a, a hrilh zo hman ta lo, a uizia tun thleng hian a la sawi zauh zauh ṭhin. Zan khat erawh chu a muthilh laiin kut vawtin a kai tho a, chu zet chu a hlau ve ta deuh a, a insawn ta a ni. He in hrang hi a ina riak ṭhian dangte sawi pawh kan hre nual mai.

 

HOTEL ROOM CHHUNGAH MI 2 TITI KA HRIA

A ni leh thla leh kum ka hre ta lo. Gauhati-ah Hotel Prag Continental ah ka thleng a, ka thiante 2, Ngaizuala leh Mapuia (MSU hruaitu ve ve) te an lo riak ve a, zan kan mut hnu chuan Ngaizuala chuan eng emaw hriat nei tlatin a inhria a, a pa Aizawla dam lo a thi a, an rawn hrilhna niah a ngai nghet tlat mai si a. Mobile phone awm hma kha a nih avangin hotel reception aṭanga trunk call book kan tum a, an pick up thei tawh si lo..... Tichuan hotel reception-ah chuan chhukin duty kan zuk kai tho chawp a, Ngaizuala te hi kan ṭhenawm maia awm an nih avangin ka puzawn te in kan han phone a, ka puzawn kan han kai tho a, "Pu Kapṭhianga (Ngiazuala pa) a thi em ni...." ka han ti a, ani chuan, "Ka va kal ang e, nakinah min rawn phone leh rawh.." a ti a. A hnu deuhah chuan ka han phone leh a, "Thi lo, chutiang thawm a awm lo; an thim thuap mai, kaih thawh chi pawh an ni lo.." a ti a, Ngaizuala pawh chua thaw huai a.

 

A tukah chuan anni 2 chuan Aizawlah min hawsan ta a, a hma ang bawkin keimah chauhin hotel-ah chuan ka awm leh ta a. Chumi zan chuan ka muhil chu ka harh a, ka room chhungah chuan Vai hmeichhia leh mipa, thawm dim taka titi hi ka hre ta tlat mai, light ka on a, ka sana en a, dar 11:45 a ni...... ka'n ngaihthlak chian pawh chuan an titi tui em em niin ka hria, vai ṭawng ka thiam loh avangin eng nge an sawi phei chu ka hre lova... ka hlau khawp mai a, ka zu in bang chu ka in ka in ta mai a, dar 1 thleng vel ka men ka hria, zu ka in tam tak em avang chuan ka lo muhil ta a.. a tuk zing dar 4 velah zun chhuakin min kai tho a, titi thawm ka hre tawh lo, han hriat leh ngial ka tum pawhin ka hre tawh lo.....

 

A tukah insawn ka dil a, ka insawn ta daih...... he hotel hi Gauhati kan kal changa All Assam Students' Union (AASU) hoin min dah ṭhinna deuh ber a ni a, he hotel-a kan thlen nawn leh pawh hian he room min pek an tum chuan ka duh tawh ngai lo.... hotel-a thawk te mi thar an lo ni tawh si a, a chhan ka sawi ngai si lova, mak an ti thei ṭhin khawp mai.

 

KAWNPUI DAIAH PA LIAN A HMU

Kum 1981 July ni 7-a MST Bus Shillong kal haw lam Kawnpui daia accident leh a hnua bus accident-na bul vela thil thleng mak tak tak leh thawm mak tak tak an hriat ṭhin hi kan hre hlawm awm e. Tun a mi hi pa lian an hmuh erawh hi chu tun hnai mai a thleng a ni a, bus accident nen a in kungkaih em chu ka hre lo. July ni 14, 2014 khan Pu Hranglawta leh a nupui chu an lo (Bus accident-na thlang mual) ah an feh a, an haw tlai deuh a, khua a la eng ruau ruau tih ah an haw a, thui vak lo an kal hnu chuan kawng thlang mauhak (mau reserve) ah chuan sava hram niawm tak mak deuh an hre ta a, an hawi thla rual ṭhawt a....

 

Mau karah chuan var deuh reu ruau pa lian zet mai hi an zuk hmu ta mai a, khua a thim lek lek tawh avangin a lang chiang tawh vak lova, mak an ti hle mai a, Pu Hranglawta chuan finfiah ngei a duh ta a (Pasalṭha a ni awm e), an nu nen chuan mau karah chuan thawm dim deuhin an lut thla a, thawm dim deuhin an pan thla a, pa lian pawh chu a la che sawn hauh lo... A bul hnai set sawt an zu thlen chuan an ngaih ṭha chiah lo mah se Pu Hranglawta chuan eng tiang chiaha lian leh sang nge hriat chian a duh tlat a, a bul hnai lehzualah a va kal a, a var buang deuh thur hi a ni, a ti.

Tichuan, a han teh ta a, chu pa lian chu a ṭona lei seh chin aṭang ringawt pawhin feet 2 lai a sang zu nia mawle... Hetiang pa hi an la hmuh ngai loh avangin ei chi a nih leh ni loh an hre lova, tun laiin pa leh bekang eisual an tam em avangin khawih lovin an kalsan ta mai a ni awm e....hehe

 

 

ZO TUNGCHAW