Dawvan - Sangzuala Pachuau

*Dawvan*

-sangzuala pachuau

Kan ṭawngkam pawimawh tak pakhat a nih vangin hriat ve makmawh a ni si a, a hming tal pawh a bo mai loh nan sawi rik fo a ngai a ni.

Lal dawvan:

 

 Hmanlai lal in char lam chhuat kha, chhuat pangngai aia sang hretin an dawh kang bik ṭhin a. Chu chu dawvan(Hmun ṭhenkhatah chuan 'devan' lo ti pawh an awm a ni awm e)an ti a, hmun pawimawh tak a ni. Lal inah hian ro rel a ṭul lem loh lai pawhin lal upa leh lalin a kawm duh zawng a kohte chu an chuang kai ṭhin a. Chhuat dunga ṭhu lum hûl hûl lovin he laia kan sawi hmun, dawvanah hian an inkawm khawm ṭhin. Zu te pawh an in ho va, inkawm nan tak an hmang ṭhin.

Tin, lal leh upaten ro an relna hmun a nih bawk avangin hmun pawimawh tak a ni a. Lal leh upa hmaa ding an awm chuan he dawvan aṭang hian an lo dawngsawng ṭhin a. Thu chhia thu ṭha an rem emaw, thu buai hla buai an ngaihtuah emaw pawhin he lai hmun hi an ro relna hmun chu a ni. Thu buai hla buai neia lal hmaa inkhing an awm chuan, chhuat zawlah, dawvana lal leh upate hmachhawnin an dintir reng a, ṭhut an phal ngai lo a ni, tih hi han belh lawk bawk ila.

khaw hran tlang hran aṭanga tu pawhin lal an biak a ngaih ṭum, pûr châwk te, vehbur khawn leh pawipang an rawn zakzeh apiang te bakah; khawtualah pawh thu chhia ni kher lo, lal thu neihna huam chhunga thupha chawina te, ngaihdam dilna,(Khawipui lâk leh tûm zik kheh te pawh a ni ang chu)te, lal hnena zualkona thil te nen lam he lai hmun aṭang hian lal chauh emaw, a upate nen emaw an lo dawngsawng ṭhin a ni.

Heng kan sawi tâk chi hrang hrang avanga lal ina kai an awm chuan *dawvan kai* an lo ti ṭhin a ni. Dawvan kai ṭawngkam hi, thu buai hla buai chungchangah hian kan hmang rim bik a, hei chauh hi emaw ti pawh kan awm thei awm e.

 

Zawlbuk dawvan:

Lal in char lam chhuat ang tho khan zawlbuk chhuatah hian, a hual chhuakin mihring dung chen aia zau mahin an dawh kang ve ṭhin a. Hei hi zawlbuk dawvan an ti ve a, mahse zawlbuk bahzar tia sawi an tam zawk mah ang e. Lal in thleng pha lo thu, val upa leh tlangvalhote rel phak thu a awm chuan, he dawvan aṭang hian an dawngsawng ve ṭhin a ni. He dawvan/bahzar hi chhuat aṭanga malte chen vela sangin, bang angrengin an huang hung leh a, chu bang angreng leh zawlbuk bang tak tak inkar chu, tawng chen dawn laiin a awng a. Chu lai hmun awl chu *âwkpakâ* an ti a, mi ṭhenkhat chuan âwkpakawngkâ tiin an sawi ve bawk. (Tîtîah chuan, run hma lehzual chuan âwkpakâ hi an siam ngai lo va. Khawnglung runa an chet sual nasat em avang khan an siam ta ṭhin a, a tirah chuan âwkpakâ ti lovin râlrelh an ti niin sawi a awm). Zawlbuk dawvan/bahzar hi mut nan an hmang vek tho.

Bahzar hi han um zui thui hret ila. He dawvan hi bahzar tia sawi a ni ve bawk tho va, tun hnuah lal ṭhenkhat phei chuan an luhkapui aia sang leh hretin an dawh belh a, a chung te pawh siamin a bang pawh khup chen vela sangin an ping a, chumi chung chu a liang thlengin an tiawl thung a, hei hi *lal luhkapui bahzar* tia sawi an awm bawk a. Lal nula an awm chuan a rual kawm vena leh puanbu te pawh a vawnna hmun ber a ni.

Kan rilrua awm ve reng tur chu, hun hrang leh hmun hrangah, thil hming kan vuah leh kan puttir te hi a dang hret hret thei tih hi. Hman dan hrang hret hret te pawh inhriatpui zel mai hian a fel hmul viau.