REVD-A'N MAFAA A HMUH VAWI LI NAA, MAFAA KA HMUH VE DAN - Rohmingthanga Ralte

REVD-A'N MAFAA A HMUH VAWI LI NAA, MAFAA KA HMUH VE DAN

-Rohmingthanga Ralte

Assistant Professor, GANC

 

Rev. Zairema puala seminar PUC (Mizo Dept.) leh zairema Memorial Society (ZMS) lamin an buatsaih ni hnih ni-ah, paper ka present ve dawn avangin, ka kal ve a. A ni khatna leh chawhma lamah ka tel ve hman lo a.

 

Ni hnih ni, chhun pachangah ka zuk thleng thla a. Mafaa'n paper a lo chhiar (present) mek a. Mahse, ka lut duh tingtang ta lo a. An zawh veleh chhun chawlh hman zui a nih dawn avangin. An zoa, an rawn chhuak dam dam a. Thingpui te dawhin, a piah deuh thingbuk  hnuai ṭhutna awmah chuan kan ṭhu a. 

 

Kei fiamthu duh ve tak, ziaktu lar hote insawt fiamna vel ngaihnawma ti a, lawm em em tu hian. Fiamthuin Mafaa hnenah, ''Revd-a chu inkap pah zeuh em ka ti a''. Ani chu a nui liam mai a. Kan ṭhian nu pakhat chuan, ''A. . . a khawngaih thlak e a'' a lo ti a. Hetia ka zawh chhan hi rilru sual leh thip vervek put vanga zawt ni lovin, thu leh hla chai honaah, kan thu thiam lar te an han inkap zeuh zeuh hi nuam ka lo tiin, boruakte hi a tizangkhai ṭhin a. Dik tak chuan kha mi seminar-a kan chai, thu leh hla neitu kha, Pastor hmingthang em em a nih avangin, seminar boruak pawh kha a mukin, a zangkhai fahran lo ang reng hle.

 

A ni 2 ni-a, Revd-a'n Mafaa a hmuh vawi 4-na a sawi dan chu, ''Mipui hmaa Mafaa ka hmuh vawi lina chiang tak chu nikum November 1–2-a Pachhûnga University College (Mizo Department) & Rev. Zairema Memorial Society (ZMS)-in ‘RECONNECTING Rev. Dr. ZAIREMA : AN IN-DEPTH STUDY OF HIS THEOLOGICAL AND PROSE WRITINGS’ a buatsaih ṭum khân a ni hnihnaah a lo lang ve hlawl a. Chumi ṭum chuan hmêl phak deuh luai hian Rev. Zairema a hmuh dàn a ziah chu a rawn chhiar ve a; mahse mi pakhatin minute 15 bák hun hman a rem loh avàngin kaih tàwitîr a ni leh ta a. . .''

 

Revd-a thuchheh duh dan ṭhenkhat hian Mafaa kha a haw viau lo a nih paw'n, Mafaa kha a ngaina em em lo tih a hriat ngawih ngawih a. (A article kalhmang thu bul lam aṭangin)

 

''A rawn lang ve hlawl'' han tihte hi sawm chawp lutuk, lo kal ve ringawt angin a ngaih theih a. National seminar chin meuhah chuan stage chan pawh a har a. Mi tam takin, thuziak an thehluh avangin, hun bi cha dik fel tak, a hma fe aṭangin a huaihawttu te'n an duan lawk fel thlap a ngai ṭhin a. Insawm chawp lutuk chu khawi lama riangvaiah. Lang ve hlawl maw... Kha seminar-ah khan PUC Principal kha hna ṭul a ngah em avangin a tel ṭha hman loa. Mahse, Mafaa'n a chhiar hunah, a naute chu ''Amah koh turin a chah hial a sin''.

 

A hmel a hmuh dan a sawi, ''Hmél phak deuh luai'' a han tih duh dan hi! A thu hman hi 'A duhawm (positive) lam ni lovin, a mawi lo (negative) lam a kawk' tih a hriat ngawih ngawih. Mafaa nunram khawràm lam a luhchilhna aṭang zelin a dinhmun sawh ngheh a tum nasa tih hi a lang eltiang a. A hmel phak deuh luai chhan chu, a buan ṭhin a buan nasat vang niin a ring tih hi a lang reng mai. A hmel lo hmu ve lotute tan chuan pawm mai a awl khawp ang. (Mafaa'n a buan ṭhin sawi mawi kan tum loa. Hemi ni a, thil dik zawk sawi kan tum mai a ni. Zu chungchang hrim hrim sawina vel hi, a mi mal takin a hne ber ka ni ang. Ti khawpa, a hnam pumin kan buaipui hi a thang tlawm thlak zahthlak)

 

Kan thingpui in naa, kan titi ho naah khan Mafaa chuan, ''October thla khan dam ni, nàwm deuh ni hmel ka hmu lo'' tiin, a zunthlum leh a nerve ṭha lovin a tihbuai nasatzia a sawi a (Ka pa leh ka naute nerve ṭha lo nei an ni a. Na an ti thei hle). A natna vang hian pheikhawk pum a bun theih lohna pawh a rei fu tawh reng a, amah paw'n a sawi fo. Chapal nen hian khawikipah a chhuak mai ṭhin. Mafaa kha inchei fel at ṭhin a ni lo tih chu kan hretlang awm e. A natna tawrh avanga hmel lan dan danglam aiin a buan ṭhin avanga hmel lan dan danglam zawk niin puh thluk a tum ngar ngar tih a chiang hle. Heng lai vel hian a buan hneh loh a tih nen khan an inbuan lo ang! Whatsapp groupa kan awm hona ''ZOfriends'' lamah a reh vang vang loh avangin. A hmel chu a lo phak luai a nih paw'n, nuam sam lo na na na, engtin nge a hmel a fel thluam ang aw?

 

Tin, Mafaa hun hman chungchangah a hma lama a sawi, duh duha tal mai mai ni-awm ang hrima a sawi chu a nemngheh leh nan, '' . . . minute 15 bak mi pakhatin hun hman a rem loh avangin, kaih tawi tir leh a ni a'' an ti leh kher duh te hian, a theih dan kawng kawnga han naua, han hnuaichhiah char char hi a chak zek zek tih a lang reng mai. Mahse, Organizer lam aṭang chuan ''Mafaa kha hun hmang ṭha pawl a ni ang'' tih a ni si. Kha seminar-ah hrim hrim khan paper chhiartu an tamin, sawiho-na hun pawh a awm mang loa. ''Hunin min daih lo tlang hle'' tih chu organizer lamte sawi dan pawh a ni.

 

Seminarah hian ka tel ve nual tawh a, hun hi kan nei tlem thei hle a. Kar khat dawn (a aia tam teh pawh a ni ang) kan thupui chai, thumal 3000-6000 vel hi duhthalin minute 15-ah hi chuan a chinfel hman meuh loh ṭhin. Paper te sem a nih loh a, kan zuan kahlen nasat lutuk lahin, a ngaithlatute tan hriatthiam loh tam tak a awm thei si a. Hun min pek hi ṭhenkhat chuan kan hmang pel fo reng. Chumi veng tur chuan moderator pawh awmin, an hun la neih zatte an lo hrilh/sawi ṭhin reng a ni. Kei ve tehlul, a tawp bera hun hmang paw'n, he mi ni-a hun min pek chu minute 2 velin ka pel (ka hun hman pelh vawikhatna). Han insel nan em chuan a ho the the em mai. 

 

Han let leh lawk ila. Thingpui kan in zawh chuan Mafaa chu a nawmsam loh êm avangin chawhnu lam pawh chu awm ve ta lovin a haw ta a. Bike mawng sanga (R15 V3), Tlangnuam thleng han thlah kha a nawm ka ring loa, hun ka lo nei ve nen. PUC Sir Ramthara, kan bulah scooty nen a rawn ding remchang hlauh a, Taxi stand thleng inthiat chhoh ve luklak turin kan dil a. Kan inṭhen ta a nih kha. (Kha mi ni kha Mafaa ka hmuh tawpna ber leh thla kan lak ho hnuhnun ber ṭum a lo ni ta reng mai)

 

Revd-a thu leh hla hi uluk taka chhiar chuan, Mafaa nunram khawram lam aṭang han luhchhuah vel hi nuam a ti zek zek tih a lang a. Thu inchuh nei an nih lai siin.

 

Mi'n an nun leh hriselna kawngah eng ang harsatna nge an neih tih lam chu hmuh kanin, an inbeihna chhung aṭang chuan pawn lama a hmanraw hmuh ang ang chuan, a bitum tlu tawh hnu chu, dimdawina reng awm loa rap hrualin, a rem lai laiah, zak kau pap papin a chapona talhtum chuan a hlap duh ta si a. Kan hmel inhmuh dan aṭang ringawta puanthuitu ang maia, lo inteh kual ve vak vak hi a dik mawh reng a sin.

 

Taka, Talkshow-a ''nghâl'' zet min hnialtu a tih vang khan em ni ang, an zawh hnua Mafaa'n chibai a tumin, Revd-a hian zuk chibai duh miah lo i a! (Thinrimna chu a lo inup rei ngar ngar e)

 

#Pic- Kha mi nia kan lak ho, kan lak ho tawpna ber ni ta bawk chu.

 

 

 

ZO TUNGCHAW