ONLINE MARKET A CHINA HO KA BUM DAN!
(Ma Kind of Trade War! Chhiar mai maiah 😝)
Online marketing, online aṭanga thilchah hi kum 2012 vel aṭangin ka ching ve ṭan a. Aizawl lam rate ngaihtuah tel ran chuan a tlawm ka tih theih bakah, a rau khan min man ve lai a awm a. An applicationa luha en kual en kual chuan a tawpah eng emaw tal chu kan lei leh nge nge ṭhin a. Thawhpuite a rauin an man ve tak tak mai chu ṭum khatah kamis hak 20, pheikhawk bun 10 chah te, salwar, kurta hak za chah te pawh an awm a. 😆
Thil eng emaw luhchilh tawh chuan hre ve pangngai nih ka duh ṭhin a. Ka bitum tawh tlawmsan leh ka duh meuh lo. Tu emaw te tan phei chuan ka chimawm dan tur hi chu aw.. 😆
Tichuan, a tir lamah chuan size dik tawk lo han chah sual te kha a awm ve zeuh zeuh a. Mahse, tun thleng hian heng ho market lakah hian sum ka lo chawi thlawn ngai lo. Thleng (exchange) an phal loh pawh, ka thleng thei zel! Kum 2014 vel kha ni tain ka hria, addidas pheikhawk ka chah a. A lo thlenna dawrah, a funna bawm ka paih nghal mai si (khang lai khan home delivery a la ṭha tawk lo). Ka pheikhawk chah chu bun tawk mah ila, ka duh aiin a chik tlat mai si. Ka lung a dum thei ngang lo a. Thleng dawn lahin original pack anga pack leh a ngai si a. Mahse, thleng letleha, a aia size lian hret kha ka duh tlat a.
Email khan vawi engzat tak inbia ang i maw? A chang leh vau titih tlawn titih ang chi khan tektik kan hmang vel a. A tawp a tawpah chuan a tlawm zawkah an ṭang ta a. Lehkhakhawng bawm ṭeng hneng zet nen thawnkirin, a size lian zawk chu min rawn thawn leh ta a. Myntra customer care lam khan mak min ti ve ngang ngang khawp ang!
Kan ti kan ti a, kan en zau tulh tulh a. Eng emaw neuh neuh kha India aiin abroad lamah a lo la tlawm zawkzia te kan hmu ta zel a.
Tichuan AliExpress lamah bazarnate kan sawn a. China ho tih takah mihring a tama tam ta ngang chuan engkim mai hi a quality ṭha lo zawkin an siam ve vek ti ila, a dik thui viau ang. Thil ṭhenkhat chu original man pangngaite a to fer fer thei si a. A aia ṭha lo deuh lei nan Aliexpress hi a lo ṭha phian si.
Gadget, bike thil leh thawnhnaw eng eng emaw ka chah ka chah ta a. Online marketa an sellers ten an hlauh em em chu feedback chhe deuh pek, customer satisfaction awm lo hi a ni (vaiho hi an phunchiar khawp mai). Inbox lamah te feedback ṭha deuh pe turin min rawn umzui lawng lawng zel!
Tichuan le, COD awm ve ta lo chu prepaid-in ngaihngam vak lovin ka han chah ṭan ta a. Thla chuangte a lo kal a. Kolkatta customah a tang rei ngang ngang ṭhin hle. A tawp a tawpah kan dawng veleh zel mai bawk a.
An terms and conditions-ah kan thil leia kan lung a awi tawk loha, kan lung a dum tawk loh chuan partial refund (a ṭhena zar pawisa inpek kir) a dil theih a inziak ṭhin a. Chu chu a tir lamah hre lo mah ila, a hnu lamah kan hre chho ve ta zel bawk nen. Ka ṭangkaipui ta phian bawk. 😂
China product kan rama kan hmuh phak hote chu a tlawm bakah a quality te a lo chhe deuh bawk nen (USA lama an product te erawh a ṭha an ti em em a). Ṭhenkhat chu a thlalaka kan hmuh ang aia a taka lo duap ta te pawh a awm zel a. Full refund dawnin, ṭhenkhat chu a man aiin, a thawn man to zawkte a lo ni nawk ṭhin nen. Thla fe a kal a ngai nen. Full refund lam kha chu tih mi a ni vak lo.
Sum kan pek khan seller te kutah directin sum kha a lut nghal mai bik lo a. Kha site neitu Jack Maa naute kutah sum kha a awm phawt a. Kan lungawia, bungrua kan dawn hunah chauh sum kha a hralhtute an pe ṭhin a ni.
An kuta sum a thlen hma chu tektik, thluak vawrhvir hun lai chu a ni. Partial refund a theih ka hriat hnu khan, ka hriat hmaa ka thil chah ka lungawina ṭhinah khan ka lung a awi thei ta tlat ṭhin lo a. Pawisa chu ka dil let ṭhen ta ziah a. Ka dil let hlawhtlin hi a tam zawk a ni ang, seller ṭhenkhat ngeng ve tak tak pawh an lo awm ve nual! 😆
Entir nan jeans kekawr hi India pawisain Rs 2000 in lei ta ila. Ka lung a dum tawk loh dan sawiin Rs 1000 man vel bak tur a ni lo hetiang hi! Hetiang chuan feedback ṭha inpek a har ang, eng eng emaw phunchiar takin thu kan thawn ṭeuh zel maiah! A tir lamah chuan an phal mai bik lo a. Rs 200-300 ten nise te an han ti a.
Kei lahin, chutiang ka duh loh bawraw dan chu kan sermon khum leh nek a. A tawp a tawpah chuan keipawn a va tlawm ṭha tak em ka tihna zat ang chuan ka lei leh ta nge nge ṭhin. Pawisa kha an kutah a awm nghal lo kan tih kha. Chutianga kan inremsiam hnu chuan anni lam pawn pawisa chu an dawng ve chauh thin. Feedback lah 3 star aia sang ka pe ngai loa, a ṭhente phei chu pek pawh ka pe ngai chuang hlei law.
Ṭum khat chu man to ve tham tak thil pahnih ka lei a. Rs 10000 man bawr vel a ni tain ka hria. An lo thlen khan duh viau mah ila, ka duhthusam loh dan kha a thuah hnih leh ta tlat pek a. A lema an tarlan nen a inan loh uchuak dan, inbumna a nih theih dante (online scam) kan sermon khum pep pep a. Ni tam tak kha seller nen khan kan inbia a. A tawp a tawpah chuan pakhat manin pahnih kha ka lei leh ta kha a nia.
Hetia China hoin sual an chhuah tak avang leh a hun lai khan ka style ang kha min an hman ve ka hlauh avangin ka sawi duh lem lo a. Dawr pawh an dawr theih loh chhoh takah chuan market lamah kan lo inbitum bumkual vel dante kan thailang ve mai mai a ni e.
Dan pelin ka che loa, an dan zam sa chhungah ka hlawk vena tur ka zawng a. Dawt ngialngan ka hrilh ngai bik bawk lo a. Thluak nei ve ve chu khatia han tih kha a pawina a awm lem bikin ka hre law. Mahse, email vela inbiak peih leh taimak erawh ngai ve ṭauh ṭauh tak a ni.
Chinaah khian ka bum hnu an lo awm ve nual a nih chu. Nge ni anni pawh hian Aizawl sumdawng angin, an zawrhna man chanve a an hralh hnuah pawh an lo la hlep tho chuan kan inbum tawn zuk ni mai fahmiang. Intellectual Property Rights ruk ching ho lakah inthlahrun lutuk bik a ngai lo e.
India site hoa an tarlan man aia tlawma lei theih dan te peih leh kan la sawi ang chu. Taimak erawh a ngai fu!
🤣🤣🤣🤣
Comments
Post a Comment