VAIRENGTE... HMANA KAN KHUA!
Rohmingthanga Ralte
Asst.Professor, GANC
(Mi pawi kan sawi em lo turah ngai ila, ani Pu Roberta kha zawng kan naupan lai na na na chuan a lar ve em! Khulh lam chi kha a duh ve hem hem bawk a.)
In lo lang hi an in a ni. Ṭumkhat tumkau niin zingkara kan hosana kawngzawh chu... ani kha a lo morning hle tawh a ni ang. (khang lai kha khapburna dan hman hma fe a ni a. Zu kha chu Vairengteah ngat phei kha chuan a awlsam dan tur kha).
Kawng zawh kan au phei... ''Hosana Lalpa hminga lo kal chu a éng a thawl e.... ''kan han tirual ṭhap ṭhap'' chu ral aṭangin pawr tawkin... ''a eng a thawl leh a sen hak tir r'u''. 😝
Zu kha a duh ve viau a ni, a thurochhiah pawh. ''Ka thih hunah ka kâ-ah hian pipe in vuah anga, ka thlan pawnah in la chhuak anga, zingtin um khat in rawn leih lut ziah ang''. 😆
Rolunglenga nen khan an inkawm ṭhin a, chanchin an ngah dun hle, naupan thil hriat a ni tawh a, ka hrereng ta hlawm lo. Pu Roberta kha lehkhathiam deuh, English pawh thiam em em mai, awm ṭha duh lo chi a niin an sawi ṭhin.
Khi an in bula peng awm ve ve khi Vairengtea kan veng ve ṭhin lam pan chhohna a ni a. Khi kan veng lam pumpelh kawnga, ding lama khi Niangi ni awm tak pawh a khasi puanbah nen a rawn kal mek khi.
Kan veng piah kha Khasi veng Pu Khemrianga te awmna, a nu pitar sam var, dawithiam leh dawibur nei anga an sawi, kan hlauh em em ṭhin. A in ringawt pawh kan kawh ngam loh leh high sikul tuikhuah panna a ni a, high sikul tuikhuah... mawngkawhur tuihleuh kan thiamna ngei kha a ni. 😝 Tin, Vairengte check gate helna rem tak awmna te a ni bawk. Vairengtea khan awm ta reng ila, a bo lo tawkin Khasi sinteng ṭawng leh Cachari, bengali vai ho biak lumlamna tawk ṭawng chu ka thiam ngeiin ka ring.
Kan vai ṭawng thiam hmasak pawh ''O bhai biri ek khan deuna'' tih a ni. Kan u te'n Aitlang vai thingzai pu ṭhin ho biri min dil tirna a ni a, a sakin kan sa kher ṭhin. 😄
Kawng vei lam lang tawp kawi kopang chung lamah khian kan primary sikul kalna a awm a, Pu Lalliana sikul chhuak ve ngat kha kan nia. Kan form a hring a, a nghawng kha a sen a, sikul dang ho chuan 'Rulnghawngsen' min ti ṭhin. 'A' pawlah khan pakhatna ka ni ve a. Mi dangte hnem nan ''in vaiin pakhatna in ni kan zirtirtute khan an ti a''. Chhungte bulah kan vaia pakhatna kan nih tak thu ka sawi aṭang khan chuti teh vakin pakhatna nih hlutna kha ka hre ta lo a ni ang, zirnaah hian pakhatna nih leh ni pawh ka nei ta mang lo. 😂
Kha Pu Lalliana sikulah khan pa(man) tih em em kha kan nei ṭhin a. Khang hun lai kha kungfu lar tak tak lai, keini ang rual pawn kungfu shoe kan bun ṭah lai kha a ni a. Beeter kan bun ṭum chuan kan banah kan thawlh luta, in kungfu laia kan invenna a ni thung. Mipa bon deuh kha ngaihsan a zual... Lalrinsanga kha nungchang ṭhat bik loh vanga an hrem zauh zauh kha a ni a. An monuin a haua, ''Iṭa bungin a vawm'' tih an han sawi kha chu ..a pa hi kan ti em em reng ringawt mai. (Vairengtea chuan Brick hi Iṭa tiin kan sawi zawk).
Pawl hnih nih laia bangrela ka lawn min pawhthlak vanga ka ban dinglam ka bawh ulh te kha...a lo rei ve ta. 🙂 Kan chhuah san aṭangin kum 30 dawn a liam ve ta reng mai. 😒
A awmzia pawh kan hriat hma khan Zaraia te kha proxyvon khan an lo va inchiu hma tak em! Nghak-Awmṭiala Khasi ho kuhva a ruk avanga an man ṭum te, Hmachhuana of Telkuk Zuheh, baghaa muslim mosque bula a "allah" ve vak vak vanga an ben ṭum te kha a hun lai kha chuan nuih zatthlak thei tak a ni. Lailapur Jamala sualzia an sawi ṭhin te, bagha thleng thleng sava veha kan vah thlen ṭhin te, puri pakhat siki a nih lai hun te kha, a lunglen thlak ve ta viau mai.
A lum tih lohah chuan (awm ṭhang tan chuan chuti teh vak chu a ni bik law) Mizoram khuaah hian khaw nuam ka tih ber pawl a ni. Engkim a awl sam a, Silchar kal mai te kha a awlsamin, nun kha a nuam ve em a sin!
Vairengte ṭhangthar 'Chhimpa leh a dawr' hre lo engzat tak awm tawh ang maw! Ṭhianpa Siama ka hmua, ṭhianpa Lalnuntluanga a lo thih tawh thu te ka hre zuia, an nu kha an nu tih hre lovin, ka dawr nual a(a hnuah Siama'n min hrilh leh a), ka ralna angah kal tir nghal mai teh ang. Sipai hmuna helicopter chhiaa thirhipthei ruk tuma kan thawhchhuah fo dante kha ngaihawm ve tiktek tak a nia... ☺
Comments
Post a Comment