Mr. Ratan Tata-a Kamchhuak; A Eng Zawnga Thlirna
(A thusawi a fiah leh zual nana thu belh hlek hlek)
“Sum leh pai vir vel dan zirchiangtu mi thiam kan tih te chuan Corona vang hian ram sum leh pai dinhmun chu tlusawpin, mi tam tak chhuanchhamin kan awm thei a ni” an ti a. Mahse, heng mi thiam te thiamna leh thlir dan hi eng anga dik chiah nge kei chuan ka hre lo. Mahse, ka hriatchian thung em em chu “heng mithiam kan tih te hian mihringte hi infuih phur thei leh tumruhna nen huaisen taka hma lam harsatna tuktlawm thei kan ni" tih hi a ṭhen pawh an hre bik lo kha luikam aṭang khan.
Mi thiam te thusawi hi ring bur dawn ta ila, Indopui pahnihna a zawh meuh kha chuan Japan ho chu rethei bakberh tak leh a ram mipui tam zawk chu meialh en mai an ni a. Mahse maw, khawvelin rethei em ema a hriat Japan, kha Japan mite ngei kha, chhuan thum an liam leh meuh chuan an mahni bomb-a tluksawp tirtu US chu khawvel insumdawn tawnna lamah chuan an vel leh thei der tawh chu a nih si kha!
Mi thiam te chu thusawi apiang chu sahuai thingvawn bur dawn ta ila, Israel ram map chu khawvel map-a chuang ve lo turin Arab ram hovin an phiat fai ngei ang. Mahse, a tak tak a thil thleng erawh a letlinga vut tui thlawr bel an sawi ang hlauh lah ni a.
Boruaka thlawhna chet vel dan tur chhutna (Aerodynamics) hmanga chhut chuan khawimu (bumble-bee) hi a taksa phu loa, a thla a tet em avangin thlawk thei tur a ngaih a ni lo. Mahse, a thlawka, pangpar lerah a fu lurh lurh ṭhin lo em ni? A thlawh chhan chu eng dang vang a ni lo, boruaka thlawk thei tur chin science danin a sawi chu hre ve miau hek lo. A thlawk vu vu mai a ni.
Mi thiam te thusawi chu ring zel dawn ta ila, India chu 1983 cricket world cup-ah khan an lang dawn lo hrim hrim. Mahse tu te nge kha cricket world cupa champion kha…? History-a chuang reng tawh turin Kapil Dev-a ho khan a hmasa ber atan India chu a champion a nih si kha!
Tichuan mi thiam kan tihte thu leh hla chu kan la ring cheu dawn em? Wilma Rudolf, American hmeichhia Olympic-a intlansiakna hmanga gold medal pathum la theitu kha maw… a naupan lai ata ramtuileilo, ke kawi kual vek, cherkhawngna hmanga cher ngila, kal thei sawih sawih khan ‘tlan leh kal’ a inang lo tih a hriat avangin gold medal pathum chu olympic vawikhatah a hlawh chhuak vek mai a sin.
Mi thiamte thlirna chu ring zel dawn ta ila, Arunima Sinha khan Himalaya tlangchhipah hnehna hla do a chham lo ang. Ani kha kum 2011-ah rel tlan lai aṭangin rukru hovin an thehthlaa, a ke vei lam chu a khup hnuaiah tan a ni. A ke dinglamh thir phum sak a ni a, chu mai a la ni hleinem a spinal cord ruh chu a la khi teuh zui a sin. Kum 2014 thleng khan tlangsang zual deuh deuh pasarih chhipah India flag a lo phun tawh nia.
Chutin tunlai corona vanga khawvel buai mup mupna pawh hi thil dang teh vak a ni bik hleinem, mihringteah rinna ka nghah zawk a vangin kei chuan chuti teh faluain ka hlauthawng hleinem. India sum leh pai dinhmunte pawh a la vir kual leh ang a, a hma aia ṭha zawk dinhmunah kan la ding thei ngei ang.
Letlingtu - Prof. Cvl
ZO TUNGCHAW
Comments
Post a Comment