MIZO HMEICHHE MATRIC PASS HMASA BER

MIZO HMEICHHE MATRIC PASSED HMASA BER - VARHLUNCHHUNGI

A hming hi Pi Nutei tiin an hre lar thin a ni. 4. Dec. 1909 ah Upa Rosema Varte leh Lalrinovi Sailo te inkarah a lo piang a. Naupang hlim thei( Jolly) tak a ni. Zosap te school din Mizo hmeichhe MLA hmasa ber Saptawni te lo thawh tawhna P. C Girls school ah pawl ruk thleng a zir.Aizawlah class seven zirna an la hawng lova. A pa hi lehkha zirna lam ngaisangtu a ni. Kum 1923 ah kum 14 mi a nih kumah Pi Nutei hian pawl riat zir turin Hringchar( Silchar) a pan a. Welsh mission Girls school Silchar ah admission a tifel a a zir ve ta a ni. Harsatna chi hrang hrang tuarin hnam dang zingah kum 4  a zir. Hemi chhung hian saptawng leh Bengali tawng a thiam nal hman hle. Bengali tawng mai nilo a ziak pawh a thiam nghe nghe. Kei, Bengali tawng ka thiam chhun chu " Kita khawbawr"( I dam em?), BALA( Dam e) tih chiah ka thiam!!!.Kum 1927 ah matriculation examination chu second div ah a passed ta a. Mizo hmeichhe matric pass kan neih hmasak ber a lo nita a ni. Mizo matric hmasa ber chu Raldoleta niin 1910 ah Shillong atangin a pass ve thung. 1930 ah Tirkoh Muka( Lallianthanga) nen an innei a, fanu pahnih leh fapa paruk an nei. 

P.C Girls school ah kum 18 chhung a thawk a, zirtirtu hna ah a tui em em em. A fa pangana a lo pian takah chuan pasal fanau kilkawi tih a hriat avang leh rilru puitling takin 1944- ah zirtirtu hna a bansan a. July. 1971( ka pian thla) ah kum 62 mi niin chatuan ram a pan ta a ni. A monu nu fel tak Pi Varparhi pawh Kan khua Serchhip High school ah a lo thawk tawh bawk. Serchhip hmeichhe B.sc kan neih hmasak ber Lalhmachhuani te pawh a student thin a ni. Ka pa te, Serchhip J. M High school Headmaster thin Lalzuiliana te pawh a zirlai naupang thin a ni. Ka pa te pawh Pi Vari hian a ho hman.

--Tedika Lz Chawngthu