Ṭhamam
- C.Lalthazuala
Kum 1980 hnu lama Mizo hla, hla phuahtu hrang hrangten an phuah, lengzem hla a ni emaw, hla lenglawng a ni emaw, fakna hla a ni emaw, a eng lam hla pawh ni se, Zo rimawi chanchinah hmasawnna nasa tak a rawn in her chhuak ta a. Chu chu hla thluk siamah leh a remna rimawi hmanraw chi hrang hrang han tuah rem khawm velah a ni lehzual ang.
Mizoramah All India Radio Aizawl Station-a recording studio aia changtlung zawk leh tha zawk mimal recording studio-te a rawn awm chho ta a. Guitarist tha tak tak James B Ralte, Buta, T.Zorampela, Chhuanawma, Rohmingthanga (Raw-a), Pa Dika, Fakhlena, LV Dawnga, Sanglianthanga, leh Hmuaka te an rawn inlar a, 1980 - 1990 inkara Zorimawi chak taka hmasawntira, a zuana zuantir hial a, bung thar keutirtute chu heng mite hi an ni chiang mai.
Zo rimawi hmasawnna a zuana a zuan dawrh dawrh hun lai hi 1980 - 1990 inkar kum 10 chhung hi a ni lehzual a, 1990 hnu lama beat group lar tak tak Albatros, Tribal Power, Dreamhunter te tual lenna tura leikapui lo dawhsaktute chu 1980 bawr chho a guitarist lar tak tak kan sawi tak hote hi an ni tih hi phat tur a awm lo.
He kum 10 chhung hian private recording studio (mi mal enkawl recording studio) te a lo awm ve tanin, All India Radio Aizawl-a, guitar pangngai (Aucostic guitar) a hla han thun tleng tleng thin hun leh kumte chu a lo tawp tan ta a, Zo rimawi chuan he hun chhinchhiah tlak tak atang hian bungthar a rawn keu tan ta a ni.
Kum 1984-ah Aizawl khawpui chhunga mimal recording studio atanga tihchhuah Peter C.Lalrinmawia Audio album 'Laichhuat an chhir' tih chuan Zoram khawvel a rawn nghawr nghing nasa hle a, he audio album tichhuaktu mimal recording studio neitu chu Pu LH Thanga a ni.
Peter C.Lalrinmawia hian audio album a siam hma hian All India Radio Station lamah hla sak lar tam tak lo nei tawhin, he audio album-ah pawh hian radio lama a hla lo sak lar tawhte a telh nual a, chung zinga pakhat chu Pu C.Dinthanga phuah 'Thamam' tih hla mawi zet mai hi a ni.
A phuahtu C.Dinthanga hian Radio lamah a sa lar hmasa ber awm e. C.Dinthanga hla lar tak takte zingah pawh a hun lai na na na chuan radio-a hla thlan hlawh berte zinga mi a tling phak a, 1980 chawhma lam vel hi chuan Zoram dung leh vang hi a fan chhuak tak meuh meuh a, hla tha ta na na na chu tawpin tai nei lo vin a lar chhunzawm chho ta zel a, tun thlengin zai mi lungleng Mizo thalaite hla duh ber zingah a lo tel chho ta zel a, khawvel tawp thleng a daih chhoh tawh ngeiin a rinawm.
'Thamam' tih hla hi Pu.C.Dinthanga hian Thingsulthliah khuaa middle School zirtirtua a han awm laia a phuah a ni a, 31st March 1982 (9:15 pm) a a phuah a ni a, a phuah lai hian heti taka mite'n an tuipui tur leh, Zo rimawi chanchina a lailum luah phak reng tur a phuah chhuak dawn a ni tih chu a in hre lawk bik hauh lo vang le.
'Thamam' han tih hian, Mizo tawngah chuan common noun anga hman theih a ni a. Mipa leh hmeichhe sawina a ni ve ve thei a ni. Chutianga hman tawm theih a ni tih hre lo ten hmeichhe sawina bik emaw an tih thin avangin, mi tam tak chuan he hla hi lengzem hla, hmeichhe phuahna emaw an ti ve chawk thin a ni.
C.Dinthanga hian he hla hi a thianpa H.Lalthazova a phuah chhan a ni a, H.Lalthazova nen hian thian inkawm ngeih em em mai an ni a.
'Zaitin kan vawr lai zan kha, thamam,'
Dawn ve thin che maw..?"
tia han phuah chhuahpui tham hial khawpin zaitin an lo vawr ho nasain perhkhuang tingtang pawh an lo kuah ho nasa ngiang ni tur a ni.
Kum 1982-ah 'Selected Songs of C.Dinthanga' tih audio album chu tih chhuah a ni a, he audio album-ah hian Ruata Zote zaithiam leh hla phuah thiam ni bawk chuan mawi takin a sa nghe nghe a, Joseph Zaihmingthanga'n tun hnaiah rawn thar thawh ve lehin mawi takin a rawn sa ve leh ta bawk a. Amaherawh chu, a hmaa C.Dinthanga leh Peter C.Lalrinmawia ten an lo sak dana ‘beat & bar’ an lo hman pangngai a bawh chhe deuh hlek a, C.Dinthanga hla phuah tho ‘Kar hla thian’ Peter C.Lalrinmawia’n kum rei tak a lo larpui tawh a rawn thar thawh ve leh pawh hi a thu a phuahtu rawn lem lovin ‘Sakhmel tawnni awm si lo’ tih lai tlar tak hi ‘Sakhmel tawn tur awm si lo’ tiin ama tawkin a thlak daih mai a, hetia ama tawka a lo thlak ve mai hi a hla neitu leh a phuahtu C.Dinthanga chuan a hriatpui loh thu leh thil kawnghmang pangngai piah lam thil nia a hriat thu leh fimkhur loh vang thil anih a rin thu a sawi.
Selected songs of C.Dinthanga audio album hi auto recording studio atanga tihchhuah a ni a. Tin, hemi hma hian, velvet blue recording studio, Buangthanga & brothers-te enkawlah hla thenkhat record-in, heng hla, amah C.Dinthanga phuah leh amah ngeiin a sakte chu All India Radio, Aizawlah pek chhoh a lo ni bawk a ni.
‘Thamam’ tih hla hi F.Zothanpuii (L) in All India Radio, Aizawl-ah sa in a hunlai chuan a larpui thawkhat ve hle bawk a, thla khat chhunga hla thlan hlawh ber ber lawrkhawm sawm (10) zingah thla thum chhung zet a tel ve a, hei hi All India Radio countdown programme a ni.
Kum 1982 kum khan C.Dinthanga hi 'Ainawn pick your pop' tihah best pop songs composer award dawn tir a lo ni tawh a. Hla hi 107 vel lai a phuah tawh a, fakna hla lar tak tak, a bik takin Krismas hla lar tak tak thlengin a phuah a, hla lenglawng hla engemaw zat a phuah zingah 'Kar hla thian' tih ngat phei hi chu Zofate hnam anga kan awm chhung hi chuan a reh tawh ngai lo vang.
'Thamam' tih hla thluk leh a thu kalphung hi, tlangram mawi taka cheng, hnam lungleng leh zai ngaina Zo hnahthlak hnam chitinte rilrem zawng tak mai a ni a, Zo khaw thengthaw nuam taka chengte tan, zan thla eng hnuaia luhka lera sak nuam em em thei tur hian a hla thluk kaih nem deuh raih mai hian a hril zual em em a. Chutih rualin rimawi hmanraw bikim nena concrete buiding ropui tak chhunga han 'jam' pui atan a fuh leh zawk hle mai thei bawk. Chu chu hla thu mawi leh thluk fuh bawk si te chanvo tur a ni ve reng reng a ni.
Kum 1984-a tihchhuah Peter C.Lalrinmawia audio album 'Laichhuat an chhir' tiha telhve a nih khan kha audio album kha khatih hunlai kha chuan a hlawhtlingin a lar vet vet bawk a, 'Thamam' tih hla All India Radio Aizawl Station kaltlanga lar tawh em em sa chu a lo lar lehzual ta a, a chhan chu radio station programme-a hla thlan chauh kaltlanga miten an ngaihthlak thin chu Mizoram khawtin maiah put darh a lo ni ta a, duh duh hunah Peter C.Lalrinmawia audio album/Cassette remchanga hmangin sitting room leh leika tlangahte picnic-na leh pass lawmna party mai bakah dawr hmunahte, chu mai bakah zin kawngah thlengin ngaihthlak theiha a lo awm ta chuan mite thinglungah bu a khuar nghet lehzual ta a ni ber mai.
'Laichhuat an chhir' tih audio album hlawhtling tak kha, Zo rimawi chanchina sawi hmaih ngai tawh loh tur guitarist ropui James B Ralte kutchhuak a ni a, 'Thamam' tih hla recording studio-a rimawi hmanruate nen an han rem khawm hun lai turte leh hmanrua (facilities) hrim hrim an neih mekte han ngaihtuah a, han chhut let pui chuan, an hmanraw neih chhun chhunte kha an lo hmang thiam hle mai tih a hriat theih awm e.
Peter C.Lalrinmawia'n lungchim taka 'Thamam' tih hla a sak laia a lo cheimawi lehzual tura, James B Ralte guitar lo khawih ngiau vel ngak ngakte khan beng a fah a, lunglen a kai tho a, a hla thluk kalphung nen a inhmeh teh asin mawle.
Comments
Post a Comment