KHAWHRING SEHA INPUH
C.Lalnunchanga
Khawhring hi kan sawi fo va, khawhring neia inpuh chiang taka kan hriat theih chu hla phuah thiam Rev P.D. Sêna nu kha a ni âwm e. P.D. Sêna hi kum 1901 khân Rungnawla khua, Kawlhawkah a piang a, a pa chu Hangkawia a ni a. P.D. Sêna chu kum thum mi a nihin a pain a thihsan a. A û Vawmkaia nên a nu hovin a pa û fa Piangrova bêlin Khawhaiah an pêm a. Piangrova thenawm hnai lawkah an nufa thum chuan an hmeithai ve rak rak a; mahse, miin Sêna nu hmeithai khawngaihthlâk tak chu, “Khawhring a nei a, mi a seh thin, khaw chhûnga awm ve tlâk a ni lo,” tiin an puh a, lal hnênah an hêk ta a. Hetih lai hian P.D. Sêna chu kum nga mi chauh a la ni a. Lal leh upate chuan a nu chu khua atanga hnawhchhuah tûr an ti a. Kawtchhuahah miin an thlir thuap mai a. P.D. Sêna chuan tap chungin a nu chu zui a tum a, a hnam hruiah a pawt a. Mahse, miin P.D. Sêna chu an hnûk hrang a, artui chhum hminin an thlêm a; tichuan a nu, ramhnuaia vakvâi tûra an hnawhchhuah chu a thlir liam ta a, a dam chhûngin a nu chu a hmu leh tawh lo a ni.
Tun thleng hian Mizoram chhim tawp lamah chuan khawhring hi an la sawi nasa hle a.
Tun hma chuan Aizawl leh a chheh vêlah pawh khawhring seh leh khawhring neia inpuh a tam hle a. Tûn hnua khawhring neia inpuh a reh tâk duakna chhan hi khatih hun laia Bawrhsapin a khap vâng kha a ni mai thei a. Bawrhsap khap ngai hial a nih avângin hmâr lamah pawh hian khawhring neia inpuh chu an ching hle a ni ang tih a rinawm. Mizo tawng pakhat, tu vakin an hriat tawh loh, tawng boral tawh pakhat chu ‘Khawhring thlûk’ tih hi a ni.
Tûn hma chuan, nula an ni bik, khawlaiah pum nâa tlûk an ching a. Khawhring seh niin an hria a. Pum nâ a lo chhuah thut a, an han vial ngalh ngalh hian mihring kawchhûnga a sehtu khawhring kha, “Tu nge i nih a, khawi atanga lo kal nge i nih; eng nge i duh?” tiin a ei duh zâwngte an zâwt nghâl thuai thin a. Khatia mihring kawchhûnga a sehtu an biak kha, ‘Khawhring thlûk,’ an tih chu a ni a.
Vawi khat pawh kum 1949 vêl khân Zawlsei khuaa nula pakhat chu a kawng kal lai a pum a na thut a, a indawm kun ngawih ngawih a. A chhak lawka pitar lo awm ve, Pi Thanzawni chuan, “Tu nge i nih? Eng nge i duh?” tiin a lo thlûk a. An lal Lalsangluaia chuan pitar thusawi chu a lo hria a, “Eng nge kha tin i tih? Tu nge a nih i hre reng alâwm. Ka khua leh tuiah khawhring thlûk ka phal hlei nem,” tiin a lo khap a ni.
Hetiang lam kan hriat i thawm khâwm teh ang u.
ZO TUNGCHAW
Comments
Post a Comment