Zodinpuii book review

ZODINPUII

‘Zodinpuii’ thawnthu (Novel) hi Lalchhantluanga ziak, phek 283 a chhah kum 2011-a chhuah a ni.  He thawnthu hi Joel Remsanga ( Joe/Remsanga) , Lucy Zodinpuii (Lucy) leh Catherine Zodinpuii (Catherine) te pathum inhmangaihna khawvel tar lanna a ni ber a, vanduaina leh dinhmun in a zir loh avanga tum lawk leh beisei loh dana hmangaihna lo pian dan te, intiamkamna avanga hmangaihna tih tluantlinga a awm dan tarlanna a ni bawk. Tin, mahni ram hmangaihna (Patriotism) thiam taka tar lan dan kan hmu bawk.

Thawnthu tlangpui :

Joel Remsanga leh Lucy Zodinpuii (a ziaktu koh danin Joe/Remsanga, Lucy leh Catherine kan tih tawh ang) Lucy-i leh Joe-a te chu inngaizawng an nih mai piah lamah nupa hiala insiam tum leh inhual tawh an ni. Joel-a leh Lucy-i te hi anti-AIDS campaign-a inchhar an ni a, chutih lai chuan pawl sawmpakhat leh pawl kaw zirlai an ni a; A thawnthu bula lamah chuan Lucy-i’n Joel-a Shillong atanga Aizawla a zin tur a thlah dan a rawn lang a. Chu a zinna tur bus-ah chuan hmeichhe tleirawl tan tir chu vanneihthlak nge vanduaithlakin kan ti dawn, a thut pui hlauh mai a. Chu tleirawl chu Shillonga lehkha zir, a nu damlohna avanga Aizawla haw tur a ni a. Amah enkawltu a hostel gurdian chuan Joe-a chu lo ngaihven deuh turin a chah nghe nghe a.

Khaw la thim hma deuh chuan an chuanna bus chu an tum ram pan tur chuan a lir chhuak ta ruau ruau a. Joe-a thutpui tleirawlte chu a ruk takin a lungngaiin, a thla a phang a ni tih a hmel atang chuan a lang thei. Thu dun ta nafam chu an inkawmin an inbe lum lam lo thei ta lo a, an zinkawng a lo thui bawk nen. Joe-a chuan muthilh san an tumnaa a muhil thei bik lo a, tleirawlte lah chu a lo tap leh feih feih thin a. An han en chuan a mittui a lo tla ngiai a, an titi lum lam pui chho ta, an hmingte an inzawha,an han inhrilh chuan chu tleirawl chu Catherine Zodinpuii a nih thu leh a Mizo hming chu Joel-a nupui hual hming nen a lo in ang leh nghal a. Joel-a chuan a hming chu nalh a tih thu te a hrilh a. Tin, amah chu Joel Remsanga a nih thu leh Remsang tia koh a duhthu te chu Catherine-i chu a hrilh a.

           

            An hming an han inhrilh hnu chuan Joe-a chuan Catherine-i chu engvanga haw nge tih te, engnga tinge a tah nachhan tih te chu a han zawt a. Catherine-i chuan a chanchin leh a vanduai dan te chu a hrilh ta vek a. A pa chu MCS officer a nih thu leh zu a in nasat em avangin kum li (4) kal taa boral tawh thu a hrilh a. A nu chu High School headmistress a nih thu leh nu nunnem tawp khawk a nih thu te, a nu damlohna vanga haw a nih thu leh a nu chu damin nge thiin a hmuh ang tih te chu Joe-a chu a hrilh fai ta kel a. Chung a thil tawn te chu hmeichhe lungno tan chuan lungngaia a tah pui loh thei pawh a lo ni lo tih chu Joe-a chuan a hrethiam ta a.

An tlan zel hnu chuan hmun pakhatah chuan lei (Bridge) a auh deuh avangin rei fe chu an han ding leh ren rawn a, Engineer te an lo kal hnu chuan chu lei chu a lo hlauhawm lo a ni tih an hre hnuhnawh leh a.  Kolasib an thlen chuan passenger te chu chaw ei turin an chhuka, mahse Catherine-i chu a hmanhmawh tawh em avangin, an chuanna bus chu taxi hire-in an tlansan ta vang vang a. Aizawl an han thlen chuan Catherine-i nu awmna civil hospital private ward chu an pan ding nghala, harsatna awm lo in an lut nghal a. Catherine-i nu damlo eng emaw chen chu Joe-a chuan a awmpui ve tak zel hnu pawh chuan , an inkawmngaih chho ta hle a. Cathetherine-i nu leh chhungkhat te pawh chuan rin takah an nei a. Catherine-i nu chu that lam a pan chhoh theih loh avangin a hniam zel a, a boral ta nghe nghe a. A boral hmain Catherine-i nu chuan Joe-a hnenah chuan “Ka awm loh pawhin Catherine-i hi lo ngaihsak zel rawh aw” tiin Joe-a chu thuchahin, thutiam turin a ngen a. Joe-a pawh chuan a thih hma loh chu a fanu chu lo enkawl sak turin a tiam ve ta a.

Catherine-i nu an boral takah chuan Catherine-i chu nu leh pa neilo fahrah chan a lo chang ta a. A chungchang pawh chu chhungkaw inrawnkhawm a rel fel sak a ngai a. A duh chuan Champhaia a ni-te emaw a putea te emaw bulah chuan a awm thei a. Mahse a nu leh pa ro, an in leh lo han chhuah sana, chhungte bula han awm ngawt chu tha an tih pui chiah lo a. Naupang chhia a ni tawh lo bawk a, sum leh paiah harsatna a awm bawk loh a vangin an mahni in a awm tur chuan thu an pawt chat ta a. A zirna pawh chu Shillong lama chhun zawm tur leh Joe-a pawh chuan farnu ang a a en tur thu te chu a hrilh bawk a. 

Chhiat tawhna lama a buai em avang chuan Joe-a pawh chuan a nupui hual Lucy-i chu biak pawh a be ngai lo a. Tum khat chu Lucy-i chuan rawn biain an inkar thu te chu a tawp ta emaw tiin, a lungchhiata zia  a rawn hrilh a. Joe-a chuan ngaihdam dil chungin a thil tawn te chu a hrilh fai ta vek a. Chutiang em em a, hmeichhe pakhat a hmelhriat ngai pawh ni lo Joe-an a buaipui chu thikna nen a enin, a la buaipui zui zel dawn leh dawn loh te chu a zawt a. Mahse Joel-a chuan tha takin , a nunna ai pawha a hmangaih zawk thu te chu hrilhin , an inkar inhriatthiam lohna awm thei tur te chu an sawi felin, zantin inbe turin an inthlah ta a.

Joe-a leh Catherine-i chu mi thenkhat an mahni hrechiang lo chuan inngaizawng emaw tiin, an rinthu leh ngaihdan te chu an lo seprawtui ve mek a. Catherine-i chu a nu leh pa in ro, sum leh pai an thih san chu a that hnem tham deuh avangin, a bialpa nia an hriat Joe-a chuan chen puiin, a chen zawh pui hnuah a then leh mai te chu an lo ring ve mek a. Chungte chu Joe-an, an hriat chuan thinrim viau mah se a sawi chhuak duh lem lo; Catherine-i nu hnena a thu tiam chu hlen a tum em avangin mi lo sawi dan mai mai chu eng atan mah a ngai duh lo lui tlat a. Shillong lamah zirna chhunzawm turin an chhuk thla leh dun ta a.

Shillong-a a haw leh hnu chuan Lucy-i chuan Catherine-i chu tlawhchhuah a rawt a. An va tlawhchhuah hnu chuan a ruk tak chuan Lucy-i chuan Catherine a thik viau mai a. Joe-an Catherine-i hming an sawi deuh te chuan a Lucy-i chu a vin deuh hlar tawh mai a. Catherine-i pawh chuan Joe-a a tih buai zia hriain Aizawl lamah a hawn san leh ta a. Catherine-i haw hnu rei lote-ah chuan Lucy-i chu nat lawk pawh awm lovin a dam lo vak mai a. A dam loh atanga ni rei lote-ah chuan malaria avangin a boral zui ta mai a. Lucy-i khan a boral hma khan Catherine-in Joe-a a hmangaih dan leh a ngainat dan kha a hmu ru kiau a, a thih dawnah pawh mi chanhai leh khawngaih thlak tak Catherine-i chuan dinhmun tha leh duhawm rawn chang chho tura a duh thu leh hlimna nasa tak rawn hmu se, amah a hmangaih tlukin Joe-a chuan rawn hmangaih ve se tiin a duhsakzia Joe-a chu a hrilh nghe nghe a ni.

A nupui hual leh a hmangaih ber Lucy-in a boral san takah chuan Joe-a chuan mu leh mal pawh nei lovin a va ruai mai a. A tawrh em a vangin, a ei in a mu deuh tawp mai a. Lucy-i dam laia an sulhnu te chu a chhui kir theih tawk a ni tawh mai si a. A hriselna atan pawh chuan a tawrh phah em em a, a duh dan phei chuan thih ve nghal hial a duh a ni. A nu leh pa chuan a hlimna tur leh a hawiharh deuh na tur chu an ngaihtuah nasa a. Mahse engmah chuan a ti hlim zo der si lo.

Joe-a chu zirna lamah B.A a zawh hnu chuan M.A (Economics) chu Culcutta-ah a zo leh a, a bak han zir chhunzawm leh chu a tum ta lem lo a. Chutia zirna lama a hahchawlh lai denchhen chuan a pa chuan a lusun te chu a hawiharh theih deuh nan Aizawla zin turin thu a rawn a. Kum thum lai a hmuh tawh lo Aizawl lamah chuan a zin chho ta a.  Aizawla chawlhkar thum vel a cham hnu chuan a patea’n Champhai lama zin turin a sawm a, a la kal ngailohna khua a nih a vangin a phur kher mai.

Champhai a han thleng chho chu  tualchhung chanchinbu-ah Catherine Zodinpuii chanchin chu a hmu nawlh mai a. Ruihlo a ngaih thu leh YMA hruaitute’n na taka an zilh thu, a chhungte pawh warning pek an nih thu leh hmeichhia leh nghalin damdawi an ngai chu, hnam pum tan pawh thil zahthlak a nih thu te chu an lo ziak kua mai a. A hmelhriat thin Catherine-i kha a nih ringin mak a ti lutuk chu a thingpui in lai, no chu a thlauh tawp nghe nghe a. Catherine-i nite an awm thu leh zawn chhuah ngei a ngaih thu chu a rilru-ah a rawn lang nghal a. Reilo te-ah chuan a zawng chhuak chawpchilh ta mai a. Rei tak inhmu tawh lo an ni a. An chanchin a chhia a tha chu an inhrilh tawn a. Catherine-i  chuan damdawi chu a khawhar leh mal lutuka a inhriat vang a ti ta mai a nih thu te chu a hrilh a.

Remsanga chuan Champhaia a awm chhungin a thei tawpin Catherine-i chu a enkawla, damdawi a ngaihna atang chuan thei tawpin a nghei theih nan a pui a. A len khaw thawn puiin, a hawiharh pui thin bawk a. Champhaia a awm reng theih dawn loh avangin Remsanga chuan Catherine-i ni pasal chu, an hnena Catherine-i awm turin a dil ta tawp a. An bula a awm loh chuan Catherine-i chuan damdawi chu a tih chhunzawm zel a rin thu leh a nun pawhin a daih rei a rin loh thu te hrilh a. Tin, Catherine-i nu thi tur bula a thutiam kha hlen thei dawnin a in hre lo a. Catherine-i ni leh pasal pawh chuan a rem ti bawk a.  Amah Catherine-i pawh chu a thil ruahman dan chu a hrilh vek a, Catherine-i chuan a dinhmun a hrechianga, Remsanga te chhungkaw bula awm chu chak viau mahse a inthlahrungin a tih buai mai mai a hlauh thu a hrilh a. Remsanga chuan a nu thi mai tur bula, a thutiam a hlen theih nan a awm ngei a ngaih thu hrilhin, Catherine-i chu an bula cheng ve turin thu an ti tlu ta a. Zanah chuan Remsanga chuan a pa Shillonga awm chu zuk biain a thil tum, Catherine-i hruai haw a tum dan leh thil chin tha lo a lo chin te chu a hrilh fai vek a, a thutiam a hlen ngei nan hruai haw a, nun thara nun tir leh a bat dan te chu a hrilh a. A pa chuan a rem ti mai dawn lo a lan hnuah, a tawpah chuan a fapa thu ang chuan ni rawh se tiin thu an in thlah ta a.

Shillong-a an haw thlak hnu chuan hmuh theih khawpin Catherine-i nun chu a danglam chak a. Remsanga nu nen phei chuan nufa ang mai an ni a. Remsanga nu phei chuan a Mizo hmingin ‘Dinpuii’ a tih loh leh ‘Dinte’ ti hlirin a koh a, a fanu ang tak tak, a hrin ang chiahin a en a ni. Khawilo an chhuahnaah an inzuia, thil tih tur leh tih dan tur an inhrilh in an inzirtir zel a. A fapa Remsanga chu an makpa chhung khung emaw tih zawk tur a mawi a ni nghe nghe.

Chhung leh khat pawh nilo, nula tlangval ni ta chu an in zui an in zui takah chuan an innela, an innelna chuan inngaihzawnna a hring a. Catherine-i leh Remsanga te inkarah chuan hmangaihna lo piangin, an induh zui ta em em a. Mahse, midangte hmuhah mawi lo leh sawisep kai erawh chuan an nung ngai lo thung. Chutia hmun khat in khata an cheng dun reng avang chuan an in ngaiin an inthla hlel zual em em a. In zin bo san lek te phei chu thih hrehih an hreh emaw tih tur a ni.

Hun eng emaw chen an inzui hnuah chuan Remsanga leh Catherine-i te chu nupaa insiam zai an rel ta a. Remsanga duh angin zingkarah ropui lem lo, ho lam takin an in kutsuih ta a. An mangan, khawharna leh lunngaihna thin te chu paih bo in, nun thar chu chhungkaw thar hmangin an din ta a ni; Remsanga ngaihzawng boral ta kha Lucy Zodinpuii a ni a, nupuia a neih tak chu Catherine Zodinpuii a ni ve thung. A hmeichhe hmangaih em em te Mizo hming chawi hian he lehkhabu hian ‘Zodinpuii’ tih hming a lo put phah a tih theih awm e.

‘Zodinpuii’ thawnthu hi thawnthu ngaihnawm tak a ni a. A tawpah he thawnthu hi a chhiartu thenkhat chan loh khanah a chhuah a rinawm ? A thawnthu tlangpui bakah chik leh zualin a thawnthu ziah dan kalhmang (Technique of novel) kan bih chiang zui zel ang.

Thawnthu ruhrel/ruangam (Plot) :

In sa tur chuan in ruhrel din phawt a tul a, a rurel a that loh chuan in tha tak a ni thei lo. Chuti angin thawnthu ngaihnawm leh tha ni tur chuan a thawnthu ruhrel hi a pawimawh hmasa ber. Thawnthu ziaktute hian thawnthu ruhrel an din phawt hnuah, a tul angin hmanraw hrang hrang an vawm lut thin a ni. Greek mi fing Aristotle a phei kha chuan plot hi a dah pawimawh hmasa ber a, ‘ thawnthu nunna ber a ni ’ a ti hial a ni. ‘Zodinpuii’ thawnthu ziaktu pawh hian thawnthu ruhrel hi din sa in, a tir atanga a tawpna tur hmu lawk sa in, chumi mil tur chuan a changtute pawh hi a rem a ni.

Mizo thawnthu danga kan hmuh tam lem loh tak kan hmu a, a thawnthu kal zel dan tur hi a thawnthu bulah a rawn lang a ni. Chu chu Remsanga leh Catherine-i te Shillong atanga Aizawl an zin kawnga an ti ti atang leh Catherine-i nu dam lohna leh thih na chuan thawnthu kal zel dan tur thui takin a hril a ni. Tin, Remsanga nupui hual Lucy-i thihna leh Catherine-in damdawi a lo ngaihna atang a, nunthar a lo nei leh tura Remsangan an chhanchhuah leh dan te kha he thawnthu khai dingtu tha tak a ni.   

            He thawnthu ruhrel/ruangam (plot) hi loose plot (plot dul) a ni. A chhan chu he thawnthu-a a changtute pathum Joel Remsanga, Lucy Zodinpuii leh Catherine Zodinpuii te hi he thawnthu ruhrel ai hian an lansarh zawk vang a ni.

A thawnthu ruhrel/ruangam phenah hian thawnthu peng (sub plot) pakhat kan hmu a. Chu thawnthu chu hmeichhe pakhat vanduai dan thawnthu a niin, Catherine-i dinhmun ang deuh a ding, Catherine-i aia vanduai zawk chanchin Remsanga’n Catherine-i a hrilh a ni. A thawnthu chhiartu te rilru hrehawm taka an awm reng loh nan, Catherine-i vanduai zia ringawt ngaihtuah lo a, midangte pawn vanduaina an lo tawh nasat theih dan hmangin, chhiartute ngaihtuahna kal ding lutuk tur chu thawnthu dangah min pen kual puiin, mi dangte vanduaina tawh hmangin Catherine-i dinhmun kan hriatthiam theih nan min pen kual pui a tih theih awm e. Tin, a thawnthu ruangam pangngai atanga peng hla lovin, a thawnthu ruangam nghengin a kal bawk a ni.

Thawnthua a changtute (Characterization):

            ‘Zodinpuii’ thawnthu-ah hian changtu langsar tak kan hmuh te chu Joel Remsanga, Lucy Zodinpuii leh Catherine Zodinpuii te an ni a. An pawimawh dan a in ang lo theuh na-in an pawimawh vek a, chutih rual erawh chuan Catherine-i hi a thawnthu khai dingtu a tih theih ber awm e.

            A changtupa Joel Remsanga mi zia a thil tawn leh thil hmuh ang zel a insiam rem thei mi a ni a. Harsatna hrang hrang, thihna a tawrh hnu pawhin, engemaw chen chu tuar ve em em mahse manganna leh a tawrhna a vang chuan a hnung tawlh lo a, in siam remin hmalam a pan hram hram thin. Remsanga mizia hi thawnthua mize chi hnih kan hmuh thin a pakhat ‘round character’ kan tih ang hi a ni. Lucy-i thihna vanga a tawrh dan leh Catherine-i sual kawng a zawhna atanga a chhanchuah leh dan atang hian a mizia a insiamrem theih dan chu kan hmu a ni.

            Remsanga nupui hual Lucy-i kha thawnthu-ah hian kan hmu tam vak hman lo nain, hmeichhe mi ze pangngai, ngaihzawng te laka thikthu chhe ve tak a nih rualin, mi dangte hriatthiamna ngah tak a ni awm e. Catherine-i chanchin a hriat chian hma leh a hriat chian hnua Catherine-i chunga a rilru put dan lo inthlak danglam dan atangin kan hmu a. Thihna khuma a mut hnu a, a thih dawn hnaih a, a thusawi hnuhnung pawh ‘Catherine-i aia hmeichhe khawngaihthlak kha ka la hre ngai lo va, mahse hlimna chhiar sen loh a la tawng ve dawn a ni. Joe, he khawvela Catherine-in hlimna a chan ve theih nan Pathianin hmanruaah a hmang dawn che a ni’ tiin Remsanga kha a hrilh nghe nghe a ni.

            A thawnthu khaidingtu ber Catherine-i vanduaina leh khawharna te a tawh nasat a vangin a nun hi a danglam em em mai a. Mi nun tluang tha pangngai tak tur, fanu mal leh nghal kha duh leh tum em em vang pawh nilo, a nu leh pa ten an boral san hma a vangin an nun chu a nilo lamah a her a tih theih awm e. A ruk takin Remsanga kha a ngainaa, a ngaizawng bawk a, mahse nupui hual a  nei tih a hriat takah khan a lakah a inthla hrun phah nasa em em a. A innghahna tur ber, a ta tur a ni dawn lo tih a hriat hnu phei kha chuan a nun kha a hrehawm zual hle niin a lang; Vanneihthlak nge vanduaithlak takin kan ti dawn, Remsanga nupui hual Lucy-i a thih takah khan beiseina tharte nei leh in a damdawi a ngaihna sal atangin a tal chhuak leh thei te khan, Remsanga kha a nunah a pawimawh hle tih kan hmu awm e.

            He thawnthu ruhrel hi thawnthu ziah hma a tanga din lawk sa a nih avangin, thawnthu mil tur leh thawnthu ti ngaihnawm turin, a ziaktu hian a changtute mizia pawh hi a kuai herin a changtupa hi a changtunu te avangin a mizia pawh hi a kuai fan kual vel a tih theih awm e.

A Thawnthu laimu (Theme) :

            Kan thawnthu neih ho ah hian a tlangpuiin hmangaihna hian hmun pawimawh ber a luah fo thin. Zodinpuii thawnthu laimu ber pawh hi ‘Hmangaihna’ a ni. Nula leh tlangval inhmangaihna (romantic love) thawnthu a ni a. A changtute pathum kara hmangaihna-in bu a khuar dan kan hmu a, Remsanga leh Lucy-i chu an inhmangaihna avangin nupa, pumkhata insiam tum tawh an ni. Mahse vanduai thlak tak maiin Lucy-i chuan a thih san leh ta si a.

            Catherine-i nen chuan atir lamah thian angin, innel takin an inkawm a, mahse an dinhmun in a zir loh avangin, a tawpah chuan nula leh tlangval hmangaihnain an inhmangaiha, nupaah an insiam ta a ni. Catherine-i nu thi tur bulah Remsanga chuan Catherine-i chu ‘Ka pi eng mi pawh ni ila, eng hna pawh thawkin eng dinhmunah pawh ding ila, eng harsatna pawh tawk ila, thihnain ka chungah ro a rel a nih loh chuan i fanu hi ka thlahthlam miah lo vang (41)’ tiin a intiam a. Chu a intiamna chuan a tawpah hmangaihna khurah a hruai lut ta a ni. Remsanga’n Catherine-i a hmangaihna hi hmangaihna hmasa ber (first love) ni lo mahse, hmangaihna dik tak tho a ni.

            Tin, nu leh pa te leh fa te inkara inhmangaihna kan hmu bawk a. A changtute an nu leh paten an hmangaihin an duat hle. Remsanga’n a nu leh pa te hnena a thil ngen te chu a nu leh pa ten an hnial sak ngai lo. Catherine-i damdawi ngawlvei a nih hnua, an bul a awm tura a pa a dil paw’n ‘Aw le Joe, a tha e, i tet te atangin ka thu i hnial ngai lo va, ka duh zawngin i awm thin . Kei pawhin i thu ka awih ve ang, i duh ang chuan ni rawh se. (218)’ tia a chhan dan atangin, Remsanga an hmangaih zia chu kan hmu bawk.

            Catherine-i pawh fanu mal, a nu leh pa sawrkar hnathawk, sum leh paia buai lemlo te inkar a mi a ni a. Keh thei dawm a an dawm, duat tin renga an duat, a duh leh mamawh engkim an lei sak zel thin, fa dang hmangaih tur nei chuang loh an nih avangin a nu leh pa te chuan hmangaih theih tawpin an hmangaih a ni.

            Lucy-i pawh kha, a nu leh paten an hmangaihin, amah pawh nungchang tha leh fel tak a ni bawk.

Thawnthu innghahna (Settings):

            ‘Zodinpuii’ thawnthu innghahna hi Shillong khawpui mai bakah Aizawl, Champhai leh Culcutta te an ni. Remsanga te hi tun hma lam atanga Shillong hmuna lo inbengbel a nih avang hian thawnthu innghahna pui berah Shillong hi a hmang a tih theih awm e. Mizo thuawnthu dang ang lo takin thawnthu innghahna hi a letling chiah a tih theih awm e. Kan thawnthu neih tam zawkah hian

thawnthu innghah nan ber Mizoram chhung khawi khua emaw kan hmang thin a, chuta tangin Mizoram pawnah thawnthu kan kal kual tir thin a ni. He thawnthu erawh hi chuan Mizoram pawn atang Mizoram chhungah a thawnthu hi a kal kual thung a ni.

           

            Shillong hi Remsanga te awmna khua a nih avang hian, he thawnthu hi Shillong hmunah a innghat tam ber a, a dawtah chuan Aizawl a ni. Champhai hi Catherine-i ni te khua leh Remsanga’n Catherine-i an han zawn chhuah leh na khua a ni. A thawnthu pawh fan nan leh thawnthu innghahna tih zauh nan Culcutta hi chu a rawn tarlang ve zawk niin a lang. A graduate hnua, master degree lak nan Culcutta a zuk zir zawm thu hi tlem a tarlang ve bawk a ni. (167-180)

Tawngkam hman dan (Dialogue system) :

           

            He thawnthu-a tawngkam hman dan leh a changtute hi in awm lo/tu-lo em em an awm lo a tih theih awm e. A changtute kum ngaihtuaha tawnglerh (Slang) an hmang lo lutuk leh an inbiaknaa, fiamthu ang chi a tlem lutuk erawh hi chuan he thawnthu duh aiin a tih ngaihnawm loh deuh em aw ? Thawnthu pawh nise, mihring nun tarlanna a ni a, tute pawh kan nitin hun hmanah hian fiamthu duh lo ber leh inhmuamup rengte pawh hian, han uan ve zauh chang hi kan nei vek a. Fiamthu thawh ngai lo kan nih paw’n nileng, kumtluana han inhmuamup peih reng kan awm kher awm lo e.

           

            Unau zingah pawh a naupang ber chu an thla a tliak duh an ti thin a. Unau-ah pawh a upa lam ai chuan a naupang lam chu an puitling mawh deuh thin; A changtute kum ngaihtuahin an tawngkam hman hi a fel khek khawk hle mai. Lucy-i kha kum 17 a nihin a thi a, a kum en aiin a puitlingin, a tawngkam hman pawh han naupang chhia em em a awm lo. Catherine-i pawh kum 18 vel niin, a tawng hman danah a naupang chhiatna hmuh tur a awm lem lo hle. Remsanga a upa ber a, kum 19 vel a ni a, an zingah pawh a puitling fal hle. Chutih laiin Remsanga nau Sangte-a erawh chu a kum mil velin tawngkam a hmang thung. Kan tunlai Mizo khawtlang nun han enin Mizo te hi kum 20 hnuai lamah chuan han puitling leh fel khek khawk hi kan tlem hle. Mahse, a tlangpuiin a changtute hi unau zinga a upa lam vek an nih avang hian an tawngkam hman velah pawh an lo puitling deuh a nih paw’n , thil theih loh leh awm lo lutuk chu a ni bik lo e.

Tlangkawmna :

           

            “Zodinpuii” thawnthu ruhrel/ruangam (Plot) te, thawnthua changtu (Character) te, thawnthu laimu (Theme) te, thawnthu innghahna (Settings) te leh thawnthua a changtute tawngkam hman dan (Dialogue system) te a tlangpui kan sawi ta nual a. Chutih rualin he thawnthu hming (Title) hi sawi hmaih theih bik a ni awm lo e. Thawnthu hming “Zodinpuii” tih hi thawnthua changtunu te hming a ni a. Remsanga nupui hual thi ta chu Lucy Zodinpuii a ni a, a hnua Remsanga’n nupuia tan a neih tak chu Catherine Zodinpuii a ni thung. An Mizo hming put a lo in ang ve ve a, chumi a vang chuan he thawnthu hmingah hian “Zodinpuii” tih hming hi a hmang ta niin a lang. thawnthu bu hminga hmeichhe hming hman hi thil thar ni lo vin, kan thawnthu ziaktu thenkhat te pawh hian an lo hmang fo tawh a  ni .

           

            Thawnthu hi mihring nun tarlanna tha ber a ni a. He thawnthu phenah pawh hian a ziaktu hlimthla hi chiang takin kan hmu thei a ni. “Chhingpuii” thawnthua Kaptluanga phena Kaphleia chiang taka kan hmuh theih ang khan he thawnthuah pawh hian Remsanga hmangin a ziaktu duh dan ang chi, mi zia, ngainat leh thil thlir dan thui tak kan hmu thei a ni. Remsanga kha kohhrana a kul a taiin a inhmang lem lo a, tun lai thalai thenkhat angin inkhawm pawh a taima bik lem lo a ni.  Kristianna a hmuh dan pawh a tarlang chiang kelkawlh hle.

“ Kristian dan hi chi hrang hrang a awm a; mi thenkhat chu hmui chauhvin an kristian a, Bible thu leh Pathian thute chu a lova uchuakin an hria a; an nitin eizawnna leh mite nena an chen honaah Kristianna reng an tilang leh ngai si lo. ”

            “ Mi thenkhat chuan chuan inkhawm hi Kristianna emaw an lo ti ve leh a..................”

           

            “ Mi dang leh chu chetziain an Kristian a................................” (104)

“ Van ram kawngkhar-ah vawi eng zat nge i inkhawm emaw zai pawlah i bass thum emaw min lo tih ka ring lo va. KTP-ah eng chanvo nge i chelh ? min lo tih pawh ka rin chuan loh avangin inkhawm zin dup ngaihna pawh ka hre lo va, mahse nupui kan hmu zo lote a nih chuan KTP-ah chuan kan la in pe ve ang chu !” (105)

            Thihna chungchang a thlir dan pawh kan hmu a. A nupui hual Lucy-i a thih hnuah Remsanga hmangin thihna chungchanga hmuh dan a sawi a, “Ka hriat phak chinah kan chhungkuate hnai vai mi tumah thi an la awm lo a, chuvangin thihna hi a awmzia reng reng ka hre lo. Tuanah erawh chuan thihna hi a awmzia ka hre ta. Thihna chu engkim tawpna a ni si a” (130)

            Tin, christian philosophy tha tak Remsanga sawi atang kan hmuh hi uluk taka ngaihtuah chuan a dik zia pawh kan hre awm e. “ Thih hnua mi ropui tak nih chu a har awm teh e, mahse leia Isua hre siloa ‘extraordinary man’ nih ai chuan van rama ‘ordinary man’ nih ka duh zawk tho. Lei mi ropui Isua ring duh lo, chatuan nunna chang lo tur nih ai chuan leia ‘ordinary man’ nih a, van ramah pawh ‘ordinary man’ tho nih ka pawi ti chuang lo”

            Nupaa insiam hmaa hmeichhiat mipatna laka fihlim hi a duhthusam leh kan kristianna nen pawh a thil inrem a nih zia hi a changchawi thiam hle. A nupui hual boral ta Lucy-i nen khan nupaa insiam hmaa hmeichhiat mipatna hmang lo turin an intiam a. A nupui hual a boral hnua a ngaihzawng ni leh ta Catherine-i nen pawh khan pumkhat an nih hma chuan mipatna hmeichhiatna lakah an fihlim dun leh bawk a ni.

            Zodinpui thawnthu-ah hian finna-thuril (Philosophy) tam tak a inphum ru a, nula tlangval inhmangaihna thawnthu a nih rualin, thianghlim taka nupui pasal inneih pawh hi a thawnthu tarlan tum a tih theih awm e. Tin, mi chanhai leh dinhmun chhe zawk te, ruihlo avanga vantlangin kan endawng leh kan hnual suat te hi rilru tha leh hmangaihna dik tak nen kan enkawl theih chuan tute pawh hi nun kawng dik zawk kan zawh tir leh thei a ni tih te pawh he thawnthu-ah hian kan hmu chiang hle a ni.

 





ZO TUNGCHAWhttps://www.blogger.com/blogger.g?blogID=6175591222009717287#editor/target=post;postID=2961988630905376518;onPublishedMenu=allposts;onClosedMenu=allposts;postNum=2;src=postname