C
Lalnunchanga Taitea fantasy novel Kâwlkil Piah Lamtluang hi MAL Book of
the Year 2015-ah thlang lo sela chu, a thlang lotute ka khingin, ka
khâwngin, ka khei nasa khawp ang.
Kei chuan a mimal tak chuan
Fantasy hi a film emaw, a thawnthu emaw zawngin ka tuipui ngai teh chiam
lo va. Kan enin, ka chhiar peih thathum thin lo. Ka hmu hniam lo va, ka
dahsang ngai hranpa lo bawk.
Tuna Mizo novelist zinga ka la dah
chungnun ber Taitea kutchhuak hi ka han khurbînpui ta tak tak thung a.
Ka chhiar zawh hma chu châng dang ka kân thei lo a ni ber. Fantasy meuh
pawh mi ngainattir a, mi ngaihzawntir thei khawpin Taitea hi a themthiam
zu nia. Mahni duhthu ngeia ka awih lohna mi dah botir thei khawpin mi a
hmin thei. Chhiartute mi chelh beh tlat dan a thiam a; phêk tinin a
tibing mup mup ang che.
Taitea nena kan inhmelhriat hmaa a
lehkhabu pakhat “Ka Mi Huaisen leh Ka Pasalthate” tih ka chhiar zawh
hlim khan, “Lehkhabu ka chhiar zawh a, a ziaktu hmuh a, titipui ka châk
tlemte zingah C.Lalnunchanga hi a tel ve nghal,” tiin ka lo sawi tawh a.
A lehkhabu dang “Pasalthate Ni Hnuhnung” ka thlirna-ah pawh,
“Ka thlirna tukverh atanga he lehkhabu bûk tirit zualtu ni a ka hmuh chu
a Mizo tawng hausa em em mai hi a ni. Ka tan phei chuan tawngkam hmêl
khual tak tak, Mizote’na kan nei lo emaw ka lo tih thlâk rîk rawk, kan
lo neih thlip thlep si thumal tha tak tak a kuh tul mai. Tunlai
Zofate’na inbiakpawh nana Mizo tawng pawh ni tawh lo, internet `chat
room’ leh phone veivak-a SMS (short message service) `tawng dazât’
leklam bera kan neih tâk mêk lai hian he lehkhabu hi kan pipute nunphung
hriat nan leh Mizo tawng zir nan hrim hrim pawh, Zotawng chhiar thiam
tawh êk êk phawt chuan chhiar vek sela ka ti.
“College lama
zirlaibu-ah te pawh suan luh hial tlâk niin ka hria. Tute’n emaw an
theihna changchawia an mi duhsak zawngte lehkhabu ziah, rem leh rem lova
zirlaibu-a an hnawh ve leh ngawt thinte ai chuan he lehkhabu-ah hian
zir tur a tamin, a hnam pum tana thu rotling a inphûm hnem zawk em em si
a,” ka lo ti tawh nghe nghe a.
A “Ruamrai Thuruk” phei hi chu sawi lo law law zawk teh ang, sawi zawh a awm thei dawn si lo.
A “Lunglenna Thawveng” bu ka tuihnihnaah pawh: “Rin lâwk ang ngeiin
chhiar a nuamin a ngaihnawm lehpek khawp mai. Amah a ziaktupa hi han
kawma a thusawi han ngaihthlak hi chuan a buh ve tehlul nen a thuziak hi
chu a dak leh thlarh thin. Nuih hawk hawkna tur te, hlauva kurh rûk
zawih zawihna tur te, lunglênga van ruai ruaina tur te, lungchhiaa
inhnit faih faihna tur te; chu’ng zawng zawng chu he lehkhabuah hian a
awm a; chu’ng aia tam pawh chu a la awm a ni,” ka lo ti tawh bawk a ni
Comments
Post a Comment