𝗚𝗥𝗔𝗡𝗩𝗜𝗟𝗟𝗘 𝗛𝗘𝗡𝗥𝗬 𝗟𝗢𝗖𝗛 - 𝗠𝗔𝗡𝗗𝗜𝗡𝗚 𝗣𝗨𝗧𝗔𝗥𝗔 - 𝗖. 𝗟𝗮𝗹𝗻𝘂𝗻𝗰𝗵𝗮𝗻𝗴𝗮

GRANVILLE HENRY LOCH 

Mizoten Manding Putara an tih kha kum 1891 December thlaah Aizawl a lo chhuak a. Police Commandant, Mizorama sipai (AR) enkawl tûra lo chhuak a ni a; engineer a ni bawk. Khatih laia Aizawla sipai leh sawrkar hmun pawimawh chu di in vek a la ni a. Kum 1892 March thlaah thlipuiin sawrkar inte chu a chhêm thlu vek a. Loch chuan sawrkar leh sipai hmun chu tha taka sak țûlin a hria a; mahse, Bawrhsap A.W. Davies-a khân chutianga insenso vak chu țûlin a hre lo thung a. Loch-a chuan ama thuin Khasi lungchher Sohan Roy, Mizoten ‘Sawnrai babu’ an tih chu a chah chhuak a, sipaiho leh hlawhfa a chhawr bawk a, Aizawl hi hill station ni tûrin a ruahman a. Sipaiho bahrik te, damdawi in te, dâk in te, quarter guard leh Sapho chênna tûr bangla te chu a chhuat leh a bangah lung remin, țha takin a sa a.

Kawng a zawng a. Tlang dung zuiin Chanmari leh Kulikawn thlengin lamlian a sial a, Kulikawn atanga Dawrpui veng thlengin lung phêk a phah chhuak dap a. Zana khawnvâr chhitna tûrin ban a phun phei thluah a. Kawr ruam deuh laiah leh ko pang âwih deuhvah chuan lung a rem zêl a. Tin, kan nu leh pate hun lai thlenga lâr tak ‘Lungrem sei,’ an tih fo chu Khatla kâwn chungah a rem zui mai bawk a. Hêng a lung hmante hi Tlawng luia mi a hâl darh a ni a. Lung thiar atan chuan Kuliho te, Khasi leh Mizo tam tak a chhawr a. Kawngpui chei mawi nân kawng sirah thing chi hrang hrang, ram dang atanga chawk luh eucalyptus te, far te, silver oak te a phun a. Aizawl hi khawpui mawi taka din kha a tum a ni a, amah pawhin a chhuang hle a ni ang, “Ka Aizawl,” a ti ngat rêng a ni.

Kawng zawn thiam tak a ni a. Aizawl, Lunglei leh Champhai kawngpui hi ama zawn chhuah a ni an ti a. Tin, Mizote kha tlang ram lo neiha ei zawng vek an ni a. Loch-a chuan leileh dân a zirtir a. Leilet atâna tha deuh hmun zâwl chu hla deuh mah se a zawng chhuak peih zêl a. Ama pawisain Kristian Tlangau chanchinbu chhutna tur khâwl a pe a. Synod Press hi tun hma chuan ‘Loch Printing Press’ tih a ni.

Tin, tûna A.R lammual hi zâwl a ni lo va, mual bâwk tohlâwt a ni a, sipaiho nupui an awm thin a. Sipai, nupui nei tawh te, sipai, nupui la nei lo te, kuliho te, sipai nupui te chu mual sira kawrte tui liakin an khawsa ho va. Hetia mipa leh hmeichhiain inbual nân thlenga tui tlân ho an nih avâng hian hmeichhe chungchangah innghirnghona a chhuak fo va. Loch Sap chuan sipaiho nupui chu Khatlaah a sawn phei vek a. Tûn hma chuan, kan naupan zual lai thleng khan Khatla hi Hmeichhe veng tih a ni thin a. 

Khawpui chuan mual a mamawh tih Loch chuan a hria a, pawisa sanction pawh awm hlei lovin lammual hi a lai leh ta a. Sipai lumum atanga officer thlengin a chhawr a. Mual bâwk lian pui chu a râwt a, a vûng chu a bula kawrtê hnawh nân a hmang nghâl a. Lammual laih nâna sawrkarin pawisa a phal zât chu Rs 1200/- chiah a ni a. Pawisa mamawh dang chu sipai canteen-a hlêp atanga theh chhuah a ni. Sipaiho chu Inrinniah inhlawhin lei a laihtir thin a, Inrinni chu “Lei laih ni,” an ti hial a. An lei laih hlawhin sipaiho chuan tlaiah canteen-a zu an in leh thin a, chutiang chuan pawisa a tivir kual a. Hetih lai hi kum 1894 leh 1900 inkar vêl a ni. 

Loch khân Mizote hi min hmangaih hran lua lo pawh a ni mai thei. Amaherawhchu, mi ropui chuan thil ropui tih a duh a, miin amah an hriat rengna tûr thil a ngaihtuah a, a hnathawh rahah a lungawi thin. Loch-a thing phun tam tak chu kih riral ni tawh mah se, A.R hung chhûngah tûnah tlêm chu a la ding a. Dâk in bâkah, Assam Rifle hmun pawimawh, quater guard te, Bawrhsap pisa pui leh treasury te pawh hmuh theih a la ni. Amah Loch hriat reng nâna Treasury square-a lungphun, ‘A HNATHAWH I HMU DUH CHUAN HAN HAWI VEL TEH,’ tia inziak erawh chu, a thing phun an kih chereu rualin paih bo a ni tawh.