HLA HI A PHUAHTUTE TA A NI LO - C. Lalnunchanga Taitea

HLA HI A PHUAHTUTE TA A NI LO

C. Lalnunchanga Taitea

Damhauhva hla zirhonaa paper chhiar tur ka buatsaih a, kan thupui chu Damhauhva hlaa nature leh lunglen a ni a. Damhauhva hi a hla chhiar ringawt pawhin, kan suangtuahna tizing chuai thei khawpa khawtlang lunglen lama hla phuah thiam a ni a.  ‘Zion Tlang Ropui Ber Awih I Mawi Reng E’ tih chang khatna chu:

‘Zion tlang ropui ber awih i mawi reng e,

 Thing te chhawl liai va tin leng kai;

 Phunbung khawtlang mawitu,

 Zarva nau an awihna lung tileng reng che.,’ tih a ni a. Nature hi a intlar thla thap mai si a, kal kân theih niin ka hre lo va. ‘Zion tlang ropui ber awih i mawi reng e,’ a han tih lai tak hi Isua a sawina tur riakah ka ngai tlat a. A thunawnah, ‘Rairah chun chang rawh tah lai hnemah.,’ tihte chu a la rawn hmang ta deuh deuh va. Min tlantu meuh, ‘Rairah chun chang rawh,’ han tih tak mai chu mak ka ti a! Ka buai rilru hle mai a. Mahse, Pu B. Lalthangliana paper hlui ka chhiar a, ani chuan he hla hi khuang a phuahna a ni tih a rawn sawi a. Ka hrethiam ve ta chauh va.

He hla thua ka buai hle lai hian whatsapp group pakhatah hmeichhe pakhatin heti hian thu a rawn post a:

Min lo hrilhfiah sak teh u —

Tuahrem laisuih, chun ro iang a,

Bawm thir hnuai chhung chang tawh hnu;

A i emaw! ka dawn ni a,

Tuan tul lai tak ka hawn nia le?

Laisuih tuahrem khar tin hawngin,

Biahmâng thu tin zai ang hril e;

Hei ang renga than ngur hlan hi

Ka hringnun hian tawng leh ang maw?

He hla hi Zirsangzela Hnamte phuah, ‘Autograph,’ Mizo hla lâr em em thin kha a ni a. Zirsangzela’n he hla a phuah chhan chu thlalak tar khâwmna album, lunglen thu leh an chanchin eng eng emaw thlalak hnuaia an ziahna thin hi a ni a. Thlalak hlui a hmuh vânga a lunglenna leh a thian hluite a ngaih thu a sawina a ni a.

Mi pakhat chuan rang zetin heti hian a rawn hrilhfiahsak a:

Kha lehkha hlu tak, ro thil ang mai a thingrem chhunga ka dah tawh hnu kha;

Engvang nge maw ka'n ngaihtuah chhuah leh a,

Hna tul lai taka ka hawn tak mai le?

Kha lehkha hlui tawh tak mai kha ka keu kual zel a,

Thu tha tinreng chu min hriat chhuahtir a;

Heti ang em em a rohlu min hnutchhiahtu hi,

Dam chhung hian ka tawng leh thei ang em le?

Autograph phuahtu phuah chhan leh a hrilhfiahna hi a inang chiah lo deuh; amaherawhchu, ka rilruah thil pakhat a lo lût a. “Hla hi a phuahtute ta a ni lo,” tih hi.

Pu Rokunga hla, ‘Ka Pianna Zoram Nuam,’ tih hi pâwl chhuak pakhat ngaih dânah chuan, “Tunah doral lian chhûm ang zing mah se,” tih hi kohhranho — Presbyterian, Baptist, Catholic etc... sawinaah an puh hlauh va.

He hla hi Pu Rokunga’n Indopui Pahnihnain Mizoram a chim lai, Japan râl hlauva Mizote an tik dial dial laia a phuah a ni a. 

‘Tûnah doral lian chhum ang zing mah se,

 A la kiang ang hnam tin rumna hi..,’ a tih hian kha tih lai khân mipui an thawnawp hle a ni ang tih min rintir a. Pu Rokunga chuan indo tâwp hun tur thlirin duhthu a sâm a.

‘Doral liam chhumpui zing a kian hun chuan,

 Rual duh kan then takte nen khanin; 

 Hlim leh lawmin kan insuih khawm leh ang,

 Zo ram nuam ka pianna ram ngeiah.,’ a ti a.

Amaherawhchu, pâwl chhuakho chuan doral lian hi kohhranhovah ngai tlatin, anmahni vânga hrehawmna chhumpui kian hun an nghâk a; kohhran chu an la chhe vek ang tih an ring tlat a, chumi hunah chuan Mizoramah ngei hian Mizo zawng zawng insuih khâwm lehin, Synod leh kohhrante chu an la ral vek ang, tih zâwngin an thlêk a danglam daih thung a ni.

Tlâng titi lêng vêl atanga ka hriat mai mai phei chu a ni a. Lalchhungkua, ‘Thuthlung Thar Hla Bu’-a mi, ‘Chhandamtu’n Min Hmangaihna Chu’ tih hi, “Synod an phuahna a ni e,” an ti a.

‘Thihna luiral ka lo kai ta,

 Khawvel miten an hre thiam lo;

 He lei in hi ral mahsela,

 Ka nunna chu Isua a ni.,’ tih hi, “Synod an chhuahsan thu sawina,” an ti teh mauh bawk a. 

‘Khawvel mite’n an hrethiam lo,’ tih hi Synod tih-elna a ni an ti a.

‘Lei taksa ropuina a dang, Van taksa ropuina a dang,’ han tihte pawh hi, “Synod leh Lalchhungkaw sawina a ni mai âwm mang tak e,” tih tur a ni a. Nimahsela, he hla hi Presbyterian leh kohhran dangte pawhin kan hla duh em em, thalai khâwmpui vêlnaa sak hlawh ber zinga mi a ni a. Pathianin mite hla a pêk a, Amah fakna atâna a hman duh phawt chuan a phuahtute lamin, “Ka hla,” tiin an keipui sa hauh hlur thei tawh lo va, Pathian fate hla a nihzia hi a chiang tulh tulhin ka hria.

Laithangpuia hla:

‘Sual sipai ral nen ni tin kan indo thin,

 Thih theihna tûr hmanga min beih chuan

 Ka chau tawh hle a;

 Lal Isua’n a ralthuam min neihtir hnu chuan,

 Ngamnain ka um leh ta a ni.,’ tih pawh hi Presbyterian kohhran sawina a ni, an ti a. Eng pawh ni se, hêng hi khawlai mi titi vêla ka hriat a ni a; chuvangin, “A dik ngei e,” ka ti lo. 

Vân ang maiin hla hi a thu a zau em mai a. Hla phuah thiamte hla phuah hi chu lengzem a ni emaw, Pathian fakna hla a ni emaw, keimahniah inhmeh bel a rem a, ka duh lam hawiin kan duh chen chen a pawh fân theih hi a ropui a ni.