POETIC LICENSE leh LEIKAPUI RUN (Sulhnu her tin nena thaikawi ni lo) - Rohmingthanga Ralte

POETIC LICENSE leh LEIKAPUI RUN

(Sulhnu her tin nena thaikawi ni lo)

 

Mite sawi peih tawh loh hnuah ka sawi ve teh ang. Kha hla maksak deuh kha, a phuah chhuak tura ngaihtuahna an sen pawh a zahawm a lawm le!

 

Thangthar hla phuahtu tharte hi a lehlam zawng chuan a ṭantu ka nih fo a. Mi dangte nen inhnial nana hman pawn an lamah ka ṭang ṭhin. A chhan chu a enga mah hmaa, a nem hniam zawnga kan lo sel vak mai chuan anmahnia theihna awm, a kuhmum mek chu a parchhuah zo loh ka lo hlauhpui ve a. Literature zirtirtu kan nih va hnu hmanah! Popular culture anga pawh luhna pawh ka nei ve ṭhin.

 

Mahse, hetiang a ni chung si hian. Basa ngama, mahni duh dan dan anga kan ṭawng kalpuia, keimahni ngeiin kan sawi fiah leh vak a ngai a nih chuan kan thu leh hla kha, a ngaithlatute thinlung thukah a lut har ngawt ang. Hla thluk nei hian trick pakhat a nei ve a, chu chu a ngaithlatute, a thluk a nalh chuan min hruai bo ṭhin.

 

Tun hnaiah tlangval pakhat thu leh hla chungchangin khel a hlawh nasa hle. Thu leh hla mual fir zawk aṭanga thlir chuan, “Sawi sawi tlak pawh a ni lo e” tiin ka sawi ve tawh a. Chu zawng chu hemi chungchang ka sawina awm chhun a la ni ve.

 

Tichuan, hemi chungchang tho zawhna hi, Professor senior pakhat hnen aṭangin ka dawng leh a. Ka lawm khawp mai, ka hmuh dan leh ngaihdan dik tak sawi chhuahna tur atan a hun leh a hmun duhawm ber pawh niin ka hria a.

 

Ka chhanna tawite ni hmasa chu, ''An chhiar tlem si a, enga mah hmain ril lutuk anga lanchhuah an tum leh si a, a dik ta lo a ni'' tiin. Ka sawi belh lehnaah chuan, “An lar si a, anmahnia mawhphurhna nasa tak a awm a, tin, danglam leh dangdai nihte hi kan tum lutuk ṭhin bawk a” a fuh chiah lo a ni.

 

Kan sawi zau ang. Mizo ṭawngin kal hmang a neia, kan hla thu leh a hman dan pawn kawng hmang fel tak a nei a. Ṭawng thar leh hla thu thar, mipui vantlangte pawm mai theih tura phuah chhuah thar hi a awlai lo hle. Pi Buangi khan, Telephone sawi nan, “Ri tleng dar zam palai” tiin a sawi a. Ama phuah (coin) ngei niin ka hria a, a aia hmang hmasa an awm chuan kan hre sual ni se. Pi Buangi thu chher thar hi, mi dangte tan pawh hmanpui a hrehawm hauh lo mai. “Telephone, ka mobile-in ka rawn bia che a” han tih ngawt ai chuan a hla hnap mai a ni.

 

Hetiang deuh hian a duh chuan, mahnia hman bik tur personal metaphor pawh an siam thei zel ang. Mahse, a awlsam vak lo a ni ang. Mizo zinga personal metaphor nei, sawi tur an tam lem lo, keimah tak phei chuan tunah mai chuan  sawi mai tur ka hre rih lo.

 

Tichuan, han let leh ila, kan tlangvala kha TV lama a interview nate ka lo hmu a. University leh khawii college zirtirtute emaw chuan a ṭha an tih thute a sawi tel a. A ṭha an tihna zawn chu ka hriat ve loh avangin, a hla hrim hrim a ṭha an tihsak chuan, a ni lo zawnga an inbawl a hlauhawm mang e!? A hla phuah dan kalhmang (style), danglam leh dangdai deuha khatiang ngaihtuahna a hmang thei kha a ṭha an tihpui chuan, ka pawmpui viau a. A ṭha a lawm, a ngai pet pet loa tih dante hi a awm tur a ni. Mahse, phuahtu leh ziaktute zalenna (poetiuc license) hi engkima hman a rem bik lo tih hi I hre tlat ang u.

 

Mahse, metaphor ang deuha a hman.

Piallei hnuaia zal thin hi,

 

Riangvai leh dinhmun hniam leh chhia sawi chhuah a tum dan erawh, kan ṭawng mai nilovin, kan khawsak danah pawh a ni lo leh, dawt tih mai tura dikhlel tlat a ni si a. Heng hi Poetic license huam tir chi a ni lo a, a sawi chhuah dan kal hmang dik lo liau liau a ni mai. A sawi lan tum erawh a hla kal hmang enin a hriatthiam theih mai a. Mahse, a tak takah chuan Piallei hnuaia zal ṭhin chu mitthi a ni a. Mitthi chuan hmangaihna thu leh hla a tlangaupui thei tawh lo. Hei hi hringnun nena hmer kawp chuan a dik thei ta lo a ni. Literature hi hringnun darthlalang Shakespeara ten an tih ṭhin kha, a sawifiahna hi vawiin thleng pawn a la dang lam si lo a.

 

“Thliah hnu pangpar chul tawh hnu” a tihte hi chu a mawi khawp mai. Hmeichhe virgin tawh lo hi thliah hnu chu an ni mai lo’m ni? “Vuak rema rang thei lo” a tihte erawh aman eng emaw tak sawi nan pehhel deuhin tehkhinnana hmangin, a ‘Vuak rem’ ran theih hunah a chiang mai ang a, lo sawi fiah phet tum lo mai ila, engkim hi a fiah vek thei bik lo a lawm, he khawvelah hian.

 

 Chutih rualin, a belh “Leikapui run” te erawh metaphor atan a hmang a nih hmel a, he run hi run khawhar leh reh ṭhep a ni ngei ang. A hla kal dan enin, leikapui anga hmun thawveng chu a nih miah dawn lo a, paradox angin a hmang ta daih pawh a ni mahna. Leikapuiin run a nei lo tih lam panga lo lak kual sak erawh a ṭul ber lo ang.

 

“Ka tanga i beiin, i tangnem ka belhin” kan inpawm dun chial han tih ngawt aite chuan, a hmang nalh a, a tihla bawk a. Mipain ṭang kan nei a, a nem tur hnute erawh kan nei ve lo tih hi ṭhenkhat chuan an hre lo a ni awm a, mipain ‘ṭang’ kan nei lo, lo ti mai an han awm ngawtte hi chu a zia lo deuh.

 

Hla ṭha kan tih fo hian, finna thuril (philosophy), hmehbel tehkhinna (metaphor), a tarlan tum (subject) leh a dang avangten hla ṭha nihna a nei ṭhin a. Fet taka tehtute tehna pawh a ni ṭhin.

 

“Thinlai hnur sa a sur e” an tihte hi chuan, hla hi thu tluang anga ziah kim vek sen a nih loh dan leh, thu a awmsa te pawh kim lo deuha hlaa sawi chhuah ṭhin a ni a. Hei hi chu hla phuah dan kal hmang pangngai a ni mai.

 

Sulhnu her tina thai kawi hian,

Kan hlim thei dawn em ni?

            Lehkhathawn hmanga inchhai ve pha lo ṭhangthar ṭiau vut zat an lo awm ve ta a. Hmangaih lehkhathawnah kha chuan inhauhna thu hian hmun a chang ngai meuh ṭhin lo a. Tlin loh thu leh inngaih thute khan hmun thuk ber kha a chang ṭhin si a. Mahni tawn ve te te aṭangin.

 

Mahse, changkanna avang hian lehkhathawna inchhai hun a bo a, sms chhas tak ngial pawh a ṭhing leh tawh a. Whatsapp leh messenger in, a nung chungin kan inhmu reng thei tawh hlawm a. Inbiak pawhnate a awlsam tak em avang hian, hun bichain awmzia nei thei vak pawhin, inngaizawngte inakrah a lang tawh lo a. Zing dar 3 vela Whatsapp lama inhau ta chiam ṭhin pawh inngaizawngte inakarah an awm ṭeuh tawh ang. Ṭhangtharte, inngaihzawn an awlsam dan leh inṭhen an awlsam dante hi I hriatpui ila, he hla tlarte hi chuan a sawi tum a chiang mai. Thaikawi a tih hi an chat-na velah te kan ngai ngawt a.

 

He hlaah hrim hrim hian a phuah chhan leh a phuahtute dinhmun hi a sang dun lo hrim hrim niin a lang a. Hmeichhe thianghlim tawh lo leh mipa rethei, dinhmun chhe tak inkar tarlanna a nih hmel a, a hla thu kalhmangah. Chu chuan he hla kal dan, a thukphum hi hla pangngai kan neih ho aṭang chuan a tidanglam khawp mai. He lam hawia han kalpui hi a ṭha ve hrim hrim e.

 

Duhtawk mai ang, ka ziah tum miah lo, a tla chawpa kan ziah thut chu le! Heti hi a ni ziah, ziah tum sa ka neih apaingin, a pehhelna a lo lang pawimawh zawk ziah mai! Sala 

ZO TUNGCHAW