THE GREATEST SHOW ON EARTH - LIVE AID CONCERT - Lalmuanpuia Punte

 

THE GREATEST SHOW ON EARTH - LIVE AID CONCERT

-Lalmuanpuia Punte

BACKGROUND

A hmasa berin he thu kan sawi tur Live Aid concert lo awm na chhan, Ethiopia ram hi a hre ngai lo kan awm palh tak hlauhin han sawi hmasa ila. Hmanlai chuan he ram hian Abyssinia tih hming a pu thin a; Tuipui Sen (Red Sea) leh Arabian Sea bul, Somalia, Djibouti, Eritrea leh Sudan ram te’n an hual vel, tuifinriat ri pha lo (land locked) ram a ni. Hmanlai chuan ram ropui tak, Bible-ah pawh lang tham ve a ni thin a; mahse tunah chuan a ramchhung politics a fuh loh avangin ram rethei tak a lo ni ta a ni. He ram eizawnna bulpui ber leh innghahna chu agriculture a ni a, 1983 kum tawp leh 1984 kum tir lam atangin ruahtui a tla mumal lo tan a; rei tak khawkhengin a zui ta nghal bawk a. Luipui tam tak a kangchat titih a, chuvang chuan thlai thar tur an nei thei lova, tam rapthlak tak a tla ta a ni. Thenawm ramah mi tam tak ei tur nei lovin an tlan lut a, he tampui avang hian mihring nuaih 4 laiin an thih phah hial a ni.

 

Ethiopia ram tampui mitthi hian a thenawm ram pawh a kangkai ve ta zel a. Ethiopia ram sorkar ber lah chuan ramdang tanpuina dil a hnekin Burma ram cyclone tuar ang maiin tampui an tawrh thu hi a zep tlat leh ta nghal a. Mipui riltam, ei tur nei lo mangang thenawm rama ei tur zawnga tlan lut an tam tak em avangin zep hleih theih a ni ta lova, kum 1984 March thla chho vel atang chuan khawvelin a lo hre lo thei ta lova, kum laihawl vel atang chuan ram hrang hrang chanchinbu leh TV-ah te a darh ta chuai chuai mai a. Michael Buerk-a’n Ethiopia rama tam tla leh tampui mitthi chungchang chipchiar taka a report chu BBC-ah an tichhuak a, chuta tang chuan a rapthlak zia khawvel hriatah a darh nasa lehzual ta a ni.

 

TAM TANPUINA HLA

He tampui rapthlak tak, mi nuai tel an thihna leh maktaduai zet mai riltama thi maithei dinhmuna an din thu news report chuan vei ve vak tur pawha ngaih loh, London vela fawr kual ve mai mai tur awm tak, Irish Rock band, Boomtown Rats vocalist Bob Geldof rilru chu music khawvel atangin a la peng ta daih mai a. Ethiopia-ah a kal nghal vang vang a, a hmuna a thil va hmuh chu TV leh chanchinbua news report aiin a lo la rapthlak lehzual a. Bob Geldof-a rilruah thil dang a leng thei ta lo, a haw leh hnu chuan Britain leh Ireland-a zaithiam mi lar dang ko khawmin Ethiopia ram tampui tla rapthlak zia chu sawipuiin a campaign zui ta char char a. Ultravox group-a an vocalist Midge Ure nen Ethiopia rama tam tuarte tanpui nana hman turin ‘Do They Know It’s Christmas’ tih hla an phuah a, zaithiam dang – Culture Club, Duran Duran, Phil Collins, U2, Wham, Paul Young leh midang engemaw zatin Band Aid tih hmingpuin an sa ta a. An han release meuh chuan Britain-a hralh tla ber – best selling a ni nghal a, US $ maktaduai 10 chuang an hmu hial a ni.

 

He hla ‘Do They Know It’s Christmas’ hi USA-ah pawh No. 1 Chart-ah a kai ve nghal dawrh mai a, chu chuan USA lama zaithiamte a rilruah tam tuar te ngaihvenna a siam ve ta nghal a. Tichuan Michael Jackson leh Lionel Ritchie te chuan tam tanpui nan bawk ‘We Are The World’ tih hla phuah ve nghalin zaithiam dang Harry Belafonte, Bob Dylan, Cyndi Lauper, Paul Simon, Bruce Springsteen, Tina Turner, Stevie Wonder, Kenny Logins, Kenny Rogers, Janet Jackson, Joe Perry leh midang engemaw zatte chuan ‘USA for Africa’ tih hmingpuin an sa a, an han release ve leh chiah mai chu(h) ….. US Top Chart-ah a kai ve leh nghal dawrh a, he hla atang hian US $ maktaduai 44 lai an hmu ve leh a ni.

CONCERT

Bob Geldof chuan zaithiam dangte hnenah campaign chhunzawm zelin tam tuar te tanpuina turin Live Aid hmingpua concert neih rawtin a vir kual ta zak zak a, zaithiam dangte pawhin ‘Do They Know It’s Christmas’ leh ‘We Are The World’ hla atanga Ethiopia ram tam tlak nasat thu an lo hriat ve tak deuh avangin phurpuitu pawh a pung ta zel a. Tichuan, awmze nei deuha thil a kalpui theih tak avangin Live Aid concert chu a rawt thlu thei ta a. An rawt tirh atanga chawlhkar 10 chhung lekin an puitlin thei mai a, khawvela show ropui ber – Greatest Show on Earth an tih tak mai, Live Aid concert chu July 13, 1985-ah, khawmualpui (continent) pahnih - London, UK-a puipunna hmingthang, London-a Wembley stadium leh Philadelphia, USA-a John F Kennedy stadium-ah a rualin, programe pakhat hmang ho siin an huaihawt ta a.

 

World Cup football hi event pakhatah chuan khawvel pumpuia entu ngah ber – Greatest Show on Earth an ti thin a, mahse World Cup football hi chu a hun chhung hi a rei thung a, Live Aid concert erawh hi chu World Cup football nena khaikhin chuan darkar 16 chhung lek a nih avangin khawvel pumpuiah TV live telecast-a lo entute kha World Cup football opening atanga final/closing thleng, thla khat vel chhunga entu chu a zat chiah lo a nih pawhin ni khat chhung leka thil thleng (event)-ah chuan entu ngah bera chhal ngam a nih avangin ‘Greatest Show On Earth’ tih a phu hliah hliah an ti. Thenkhat phei chuan ‘The Real Greatest Show On Earth’ an ti deuh kher kher bawk. Saptawnga, "It was one of the largest-scale satellite link-ups and television broadcasts of all time"’ ti a an ziah hian a ropui zia chu sawifiah zaw ber awm e….

 

He concert hi a danglam em em na chu hmun hnih – London (UK) a Wembley stadium leh Philadelphia (USA) a John F Kennedy stadium, continent pahnihah ni khat thil thu a programe pakhat hmang ho a concert an nei kha a ni. Chumai bakah British Lal Fapa, Prince Charles leh a nupui, khawvel hmeichhe lar leh hmeltha, Princess Diana te meuh pawh a hmun, Wembley stadium-ah kalin Royal Salute dawngin concert tan nan Coldstream Guards Band te’n British National Anthem – God Save The Queen an rem a, concert an tan zui nghal ta a ni.

 

Tichuan, Richard Skinner-a chuan concert tanna chu – “It’s twelve noon in London, seven AM in Philadelphia, and around the world it’s time for Live Aid…” ti a puangin zai tur hmasa ber Status Quo a ko nghal a, ‘Rockin’ All Over The World’ tih hla sain concert chu an tan ta a, ‘Caroline’ leh ‘Don’t Waste My Time’ tih hla an sa zui bawk. He Live Aid concert hi a zai hmasaber Status Quo Group tan hian pawimawhna tak a nei a, hemi tum a an zai hi an group original member ho a kima mipui hmaa an zaiho hnuhnung ber a ni ta a ni.

 

CONTINENT PAHNIHA CONCERT RUAL, PROGRAME INTAWM

Sawi tawh angin he Live Aid concert hi a danglam em emna chu continent pahnihah a rualin (ni thuhmunah) programe pakhat hmang hova concert an huaihawt hi a ni. Wembley-ah chuan an local time-a chhun dar 12-ah an tan a, JFK stadium-ah chuan an local time a zing dar 8:51 ah an tan ve thung, chutihlai chuan Wembley (London) lamah chuan chawhnu dar 1:51 a lo ni tawh. Hetia concert an tan rual lohna chhan chu Wembley (London)-a concert an tan khan JFK stadium (Philadelphia)-ah chuan zing dar 7 chauh ala nih avangin a la hma lutuk a, concert tanna chi a la ni lo; zing dar 8:51 a tan pawh hi la hma ver vawr tak chu a ni. JFK stadium, Philadelphia lamah chuan Joan Baez-i’n, “This is your Woodstock, and it’s long overdue…” tih thuin concert a hawng a, amahin Amazing Grace tih hla a sa nghal bawk.

He Live Aid concert a danglam bikna dang leh chu, ram hrang hrangah TV-a Live telecast-a tihchhuah a ni kha a ni. Khatih hunlai khan concert TV-a live telecast chu thil vang a ni, a hmasa ber a ni hial maithei bawk. Satellite 13 atangin TV a pek chhuah nghal a ni a, khawvel ram 150-a cheng mipui tluklehdingawn 1.9 velin an lo thlir ni a chhut a ni, khatihlai khan khawvel pumah hian independent ram 180 vel awrh chauh a la awm. Show pakhat, satellite hmanga TV pek chhuah nghal programe lian berte zingah chhiar a ni.

 

Sawi tawh angin London-ah chhun lai taka an tan khan Philadelphia lamah an la tan ve lo a, London lam kha an zai char char a. Tichuan Philadelphia lama an han tan ve atang chiah khan alawm he Live Aid concert ropuina a rawn lan tak chiahna chu!! Philadelphia-a concert an tan chiah khan London lam kha an lo chawl a, stage sir tawn tawna TV big screen an dah atangin Philadelphia lama zai kha an lo en ve thung a. Tichuan Philadelphia lam an zai zawhin London lam an zai ve leh a, Philadelphia lamin TV big screen bawkin London lam zai an lo en ve leh thung a. Programe pakhat hmangin a inchhawkin an zai a, a zai lo lam zelin TV big screen-in an lo in en tawn a, London lam chu an local time-a zan dar 10-ah a huhova ‘Do They Know It’s Christmas’ tih hla sain an tawp a. Philadelphia lamah erawh chuan tlai dar 5 chauh a la nih avangin an la chhunzawm ta zel a, an local time-a zan dar 11:05, London lama July ni 14 zing dar 4:05-ah a huho bawka ‘We Are The World’ tih hla sain concert an ti tawp fel ve bawk a. London-a an tan atanga Philadelphia-a an tawp thleng hi darkar 16 lai a ni. Khatih hunlaia an TV big Screen kha chu a picture quality pawh a la chhe khawp mai, mahse a aia tha beisei tur la awm chuang hek lo, an hlimpui hle tho a ni.

 

THU LAI TLA

He concert hi a puitham bawk a, a hautakin mi leh sa an chikim bawk a, sawi neuh neuh tur thu lai tla, ngaihnawm deuh deuh a tam khawp mai. Thil pakhat, an tih hlawhtlin theih tak loh, han ti hlawhtling thei ta se thil turu deuh mai tur chu David Bowie leh Mig Jagger te hi continent pahnih inkar hla tak, David Bowie London, Europe ami leh Mig Jagger Philadelphia, North America ami te satellite TV live telecast programe hmanga zai dun (intercontinental duet) an tum kha a ni. Amaherawhchu, sawi tawh angin khatih hunlai khawvel thiamna khan a la tlin loh deuh avangin an puitlin thei ta lo a ni.

 

Phil Collins erawh chu London-ah concert tantir lama a zai zawh veleh Concorde thlawhnaa thlawk thla nghal vang vangin Phildelphia-a concert tawp lamah an zuk tel leh hman a, mi pakhat ni khata continent pahnih inkar hla taka concert pahnih a zai hmasa ber record a siam phah ta a ni; a hnuhnung ber pawh a la ni reng hial maithei bawk. Philadelphia-ah hian Eric Clapton zai leh Led Zeppelin, an drummer thih avanga an band darh ta; mipui hmaa an zai ho lehna hmasa ber atan drum a zuk vuak sak a ni. JFK stadium-a mipui hmaa a zuk inlan hian Phil Collins hian an zai hmain mipui hnenah, “I was in England this afternoon. Funny old world…” a ti deuh kher, pui a ti ve hle ni tur a ni.

 

Hemi tuma Phil Collins London atanga Philadelphia pana Concorde flight-a a chuanna ah hian zaithiam leh actress lar deuh mai Cher nen an inhmu a, an titi dun a. Phil Collins chuan Live Aid concert London-a a zai zawh hnua Philadelphia-a zai leh tura kal anih thu a sawi a, Cher chuan Live Aid concert chungchang engmah a hriat loh thu a sawi vel a. Mahse an han thleng a, Philadelphia concert kharna hlapui ‘We Are The World’ saknaah a tel ve leh ta tho si; an in bawl ve khawp mai.

The Who Wembley stadium-a an zai lai, My Generation tih hla an sak lai takin satellite link a buai thut a, mahse a buai rei lo. “..why don’t you all fade……” tih zawh chiaha thumal (word) khat lek a lam laiin satellite link a tawp thut a, mahse a tha leh nghal mai a. JFK stadium lama lo en mek tute lam pawh an hot bawk a, engmah a buai tih pawh an hre hman lem lo. JFK stadium lama Simple Minds ho zai chhung zawngin satellite link a buai avangin Wembley lamin an en thei lo bawk. Wembley-a Paul McCartney-in ‘Let It Be’ tih hla a sak laiin, a tir lamah rei lote microphone a kal that loh avangin an buai thelh bawk.

 

JFK stadium-a Bob Dylan a zai laiin a guitar hrui a chat a, Ronnie Wood-in a guitar perh lai a pe a, a ni guitar perh tur nei lovin a awm phah thung a. Guitar dang an rawn pek hmain The Who guitarist Pete Townsend guitar perh thin dan angin boruakah a kut a vai kual vak vak a, guitar an rawn pek hnuah a perh pangngai leh ta mai bawk a.

 

JFK stadium-a Mick Jagger leh Tina Turner te’n “It’s Only Rock ‘n’ Roll” tih hla an sak dun (duet) tawpah Mick Jagger-a’n Tina Turner pawnfen a pawhthlak sak a, Tina Turner stage hnunglamah a tlanlut nghal. Hei hi tihpalh thil anga an sawi laiin a video atanga a lan dan chuan tihpalh thil ni lovin tihluih, tihluih satliah pawh ni lovin; a tihmuhnawm tura duan lawk (pre planned) a ang zawk.

 

Live Aid concert-ah hian group inthen darh tawh Crosby, Stills, Nash & Young te an rawn zaiho leh a, Black Sabbath ho pawh original member-te Ozzy Osbourne ho ngei main an rawn zai leh bawk a. An drummer John Bonham thih avanga reh ta vang vang, Led Zeppelin ho pawh Phil Collins leh Chic group ami Tony Thompson te pahnih drums vuak sakin an rawn zai bawk. Hemi tuma Led Zeppelin zai hi an band hming, Led Zeppelin ti a puan an ni lova, mahse VH1 channel-in kum 1995-a Live Aid kum 10 champha puala Live Aid concert an tihchhuahah Led Zeppelin tiin a puang thung.

 

Hemi tuma Led Zeppelin zai hi an che chhe angreng khawp mai. Robert Plant-a aw tial chhe lutuk leh mi pahnih drum vuaka zai rehearsal neih hman si loh avang (Phil Collins kha London atangin a zuk thlawk thla vang vang a, tlaiah drums a zuk vuak sak tawr mai kha a nia) te, stage monitor a function that bawk si loh avang tein an zai chhe lutuk a; anmahni ngei pawhin khami tuma an zai kha chu “Sub standard” an ti thlawt reng a ni. Chuvangin an theih chin chinah Live Aid video leh audio atangin an zai chu an block zui ta vek a, tun hnuah hian Live Aid Video-ah Led Zeppelin zai hmuh tur a awm lo.

 

Concert kar lak minute 20 zelah Africa tam tanpuina pe tura sawmna an puang reng a, organizer Bob Geldof pawh thahnem a ngaiin a tang bawk a, a lo tang ulh hman nghe nghe a ni. Concert tan atanga darkar 7 velah chuan an sum khawnchhuah tawh zat a’n zawt a, pound maktaduai 1.2 chauh a lo la ni tih a’n hria chu, a hnual rawih mai a. BBC commentary tihna room-ah tlan lut nghalin interview a va nei nghal a, a thahnemngai lutuk chu tawngkam mawi lo tak tak a va chhakchhuak hial a ni. BBC presenter David Hepworth-a, interview neitu chuan an sum hmuhte an pekna tur address hrang hrangte sawi a’n tum lai chuan lo pawtchatin, “Khatiang address phiangsen ni lovin a zat zawk kha sawi ta che - Fuck the address, let’s get the numbers! (a let zo em aw?)” a lo ti tuarh a, a ngaithlatute lam hawiin, “Give us your fucking money! (hei phei hi chu ka let thiam tawh lo)” a’n ti zui nghal zat bawk a. Bob Geldof chuan hetiang tawngkam bawlhhlawh (fuck/fucking) hi a hman loh thu a sawi ve thung a. Mahse Private Eye magazine chuan chiang takin hemi thu hi an ziak a, Geldof-a tawngkam chu “fock” tih leh “focking” ti anga hriat theih a nih thu an ziak. Mahse, khatia Bob Geldof han tal hiar kha a tangkai khawp mai thung. Khatia tawngkam bawlhhlawh tak pawh pawisa lova, a thahnemngai a’n rik pawp pawp hnu kha chuan tam tanpuina pawisa thawh chu second 1 zelah pound 300 in a pung nghal zawt mai nia! Saptawng chuan, “After the outburst, giving increased to £300 per second” tiin an ziak.

 

Hetia Bob Geldof a’n sa hluai a, interview a va nei zo; stage lama a va kir leh lai hian Queen ho an lo zai mek a, Queen ho an chet that tak em avangin a phur leh ta hluai a; Queen ho chet dan chu “Ropui chungchuang – Absolutely amazing!” ti hialin a sawi a ni. Hemi tuma Queen ho zai zet hi chu an che thain an che pui hle reng a, fak an hlawh hle. Minute 20 chhung lek hun an neihah hla 6 – Bohemian Rhapsody, Radio Gaga, Hammer to Fall, Crazy Little Thing Called Love, We Will Rock You leh We Are The Champion tih hla te an sa hman a. An zai kar lakah Freddie Mercury-in mipui a command thiam bawk a, ama style pangngai ngei maiin mipui a aurual tir dual dual bakah an hla sak zawng zawngah an lo zawm dual dual a, hla thu thenkhat phei chu a ngawih san a, mipuiin an lo sak sak thup thup bawk. An Band kima hla 6 an sak hnu, mi dang an zai leh deuh fe hnuah Freddie Mercury leh Brian May te pahnih chauh rawn lang lehin hollow guitar nen chauh “Is This The World We Created” tih hla an sa leh bawk. Hemi tuma Freddie leh Brian May chauh lo lan leh chhan hi tu emaw zai tura ruat sa, zai leh thei lo thut kar awl tur hnawhkhah nan, a hmaa an zai that em avangin an hnawn ta mai a nih hmel, in puahchahna awm miah lovin an hla zinga han sak mai awl berte zing ami, hollow guitar nen an rawn sa a ni, an zai tur pawh an in signal leh zauh thin. Hemi tum hian Queen ho hi an che tha bawk aniang music writer-ho chuan, “Greatest performance ever” an ti tawp mai a ni. BBC pawhin “Show of the Century” ah an thlang hial bawk.

 

WEMBLEY-A ZAI TE, AN ZAI HMASAK DAN INDAWTIN

1.      Status Quo, 2.The Style Council, 3. Boomtown Rats, 4. Adam Ant, 5. Ultravox, 6. Sapandau Ballet, 7. Elvis Costello, 8. Nick Kershaw, 9. Sade, 10. Sting, 11. Phil Collins, 12. Branford Marshall, 13. Howrd Jones, 14. Bryan Ferry & David Gilmour, 15. Paul Young, 16. U2. 17, Dire Straits 18. Queen,. 18. David Bowie & Thomas Dolby, 19. The Who, 20. Elton John, 21. Freddie Mercury & Brian May, 22. Paul McCartney, 23. Band Aid.

 

JFK STADIUM LAMA ZAITE, AN ZAI DAN INDAWTIN.

1.      Benard Watson, 2. Joan Baez, 3. The Hooters, 4. Four Tops, 5. Billy Ocean, 6. Black Sabbath, 7. Run-D.M.C, 8. Rick Sprongfield, 9. REO Speedwagon, 10. Crossby, Stills & Nash. 11. Judas Priest. 12. Bryan Adams, 13. The Beach Boys, 14. George Thorogood and the Destroyers, 15. Simple Minds, 16. The Pretenders, 17. Santana & Pat Metheny, 18. Ashford & Simpson, 20. Madonna, 21. Tom Paetty & The Heartbreakers, 22. Kenny Logins, 23. The Cars, 24. Neil Young, 25. The Power Station, 26. Thompson Twins, 27. Eric Clapton & Phil Collins, 28. Phil Collins & Led Zeppelin, 29. Crossby, Stills, Nash & Young, 30. Duran Duran, 31. Patti LaBelle, 32. Hall & Oats, 33. Mick Jagger, 34. Hall & Oats, 35. Eddie Kendricks, 36. David Ruffin, 37. Tina Turner & Mick Jagger, 38. Bob Dylan, 39. Keith Richards, 40. Ronnie Woods, 41. USA for Africa.

 

 

ZAITHIAM TELLO LANGSAR ZUALTE.

1.Bruce Springsteen, 2. Michael Jackson, 3. Prince, 4. Billy Joel, 5. Boy George, 6. Kris Kristofferson, 7. Tears for Fears, 8. Stevie Wonders, 9. Huey Lewis & the News, 10. Paul Simons, 11. Rod Steward, 12. Cliff Richards, 13. Cat Stevens, 14. Yoko Ono, 15. Cyndi Lauper, 16. Deep Purple, 17. Eurythmics, 18. Frank Zappa, 19. George Harrison, 20. Van Halen, 21. Foreigners, 22. Lionel Richie, 23. The Police, 24. Thin Lizzy, 25. Donna Summer, 26. Rush, 27, AC/DC leh mi lar engemawzat an tel lo.

 

Bruce Springsteen hi khatihlai kha a lar vanglai, concert entu pawh vawikhata mi nuai 3 tehmeuh mai hmu a record a siam avanga Rock music-a ‘The Boss’ an tih tak mai inlak vung lai kha a ni a. Bob Geldof-a’n Live Aid concert-a zai ve tura a sawm pawhin khati taka ropui tur anih a ring lova, Bob Geldof-a sawmna pawh a lo hnar a; a hnuah a tel loh avanga inchhir thu a sawi leh hnuhnawh a ni.

 

TLANGKAWMNA

A sei tawh em a, a tlang kawm tawh mai ila a tha awm e. He Live Aid concert hi sawi tawh angin Ethiopia tam tanpuina tur anih avangin khawvel ngaihven a hlawh hle a, concert mai mai satellite link meuha TV-a live telecast hi a vang khawp mai. Mahse, he concert hi chu a organizer-in an thiam em vang pawh aniang a, khawvel mit a fu thup a ni ber mai. He concert ticket man leh concert laia zai kar laka donation pe tura an compaign vanga donation tlingkhawm zawng zawng nen US $ 127 million an hmuchhuak a ni. He concert atana mimal pawisa thawh tam ber chu Dubai Lalchhungkaw zinga pakhat, Rashid Bin Saeed Al Maktoum a ni a, British pound maktaduai khat a thawh a ni. Hei mai bakah concert avanga Africa tam tanpuina pek duh an pung chur chur mai a, a ram leh sorkar zawng pawhin he concert hian khawvel sorkar hrang hrang a beng harh takmeuh a, ram/sorkar hrang hrangin tam tanpuina an pek zui phah ruih ruih bawk.

 

He Live Aid concert leh a nghawng hi a ropui em avangin a tir te atanga a bul tumtu ber, Bob Geldof chu British khua leh tui (citizen) ni lo mahse, ram ni tla seng lova roreltu, British (Kumpinu) Lalnu Queen Elizabeth II meuh pawhin ‘Pasaltha chawimawina Nopui – Knighthood’ a hlan phah hial nghe nghe a ni. Bob Geldof hi Ireland Republic citizen a ni.

 

ZO TUNGCHAW