Minister (hlui) Pu Rualchhina chanchin Ngaihnawm - Lalmuanpuia Punte

MINISTER (HLUI) PU RUALCHHINA CHANCHIN NGAIHNAWM

(Chawngkhum dan tlang huat loh)

-Lalmuanpuia Punte

 

PU RUALCHHINA HI PA TURU TAK MAI A NIA…

Khatia underground atanga an rawn haw, Interim Govt.-a a’n Minister thut mai kha, Minister Car te a dawng ve a. A Car-a India flag intar a’n hmu kha…. “E he!…. tunge ka motor-ah congress flag tar?...” a’n ti phawt a. 

Kum 1987 election-ah MNF an chak a, ani pawh a Minister leh a, a bial fanna khaw 1-ah (Sairang a ni awm e). Anganwadi Centre an lo dil a, ani chuan, “Eng aa... ni, eng uadi uada aa.., vai tawng elaw?....” te a ti vel. 

Kum 1 leh a chanve an sorkar chauh tihah MLA ṭhenkhatin an phatsan avangin, MNF sorkar a tla ta phut mai si… Minister Bangla aṭanga insawn chhuah a ngai a, in leh lo a la nei si lo. Zarkawt leh Chanmari inrina lai vel, (tuna Zote bakery opposite) ah sawn Zoeng Weekly Press luah lai, a nupui chhungte in chu insawn chhuahna atan an duh a, kar 1 chhunga lo tiruak turin an hriattir a. 

Zoeng Weekly Editor Pu Runbika chuan, “Chuti ringawta in hriattirna hun rei tawk awm si lova in hnawhchhuah ngawt mai te chu, a va fuh lo ve maw le…” a lo ti a. Pu Rualchhina chuan, “Keini pawh min hrilh lawk bik lo, kan sorkar min titla phut mai a ni…” a ti a ni awm e.

 

Tichuan, kum 1998-ah MNF an han sorkar leh ta a, ani pawh Minister a han ni ve leh a, Forest a chang a. Assembly session-ah Pu H.Rammawi, MNF (Ruling MLA tho) chuan zawhna a rawn zawt a (hemi tum hian gallery-ah ka awm a, ka hre ngei). “Lawngtlai District chhimlama Chamdur Project-ah Sai sual a awm a, mi lo ah chhuakin buh leh thlai te a tichhia a, thunun dan awm em?” tih a rawn zawt a. Pu Rualchhina chu a rawn ding a, “…Sai sual hi thunun dan a vang khawp mai, kahhlum a ni mai…” a rawn ti. Opposition MLA Pu Zakhu Hlychho a rawn dingchhuak a, “Pu Speaker, Forest Minister berin kahhlum han rawt ngawt kha a ṭhalo hlein ka hria. Man a, khawi fin dante a awm lo'm ni…” a rawn ti a. Pu Rualchhina a lo ding leh a, “Nia, man a, khawi fin kha a ṭha khawp ang, Pu Zakhu-a khan lo va man ta sela….” a rawn ti mai chu(h)…Assembly session-a member zawng zawng an vai nui hluah hluah mai.

 

Sports Minister a nih laiin vawi 1 chu thingtlang khaw pakhat V.C te’n, “Ka pu, hmana i football min pek kha kan tlangval te’n an indaih lova, a dang min pek belh rawh…” an ti a. Pu Rualchhina chuan, “Football hi indaih tura siam a ni lo hrim hrim a, inchuh tura siam a ni a, in tlangvalte chuan ka pek tawh che u kha lo va inchuh rawh se..” a ti. 

Aizawla veng pakhat pawhin, “Ka pu, kan veng Indoor Stadium bang hi a var a ni a, shuttle cock rawng hi a var a ni bawk si a, hriat hran a har lutuk a, kan hall bang rawng hran hnawihna tur pawisa min pe rawh…” an va ti a. Ani chuan, “Ngawi teh u, in hall bang rawng hrana hnawih vek tur chuan a hautak lutuk, in shuttle cock kha rawng dang hnawih zawk ta mai u la, a hautak lo zawk ang…” a lo ti bawk a ni awm e.

 

Chumi hnuah portfolio tidanglamin Printing & Stationery leh Soil te a chang leh a, Champhai leh Kolasib-ah Govt. Press an dah thar a, Pu Lalrinzuala (Pu Pamama) PC MLA, (Lunglei lam MLA) chuan thinrim eng phiarin zawhna a rawn zat a, “Eng vangin nge Champhai leh Kolasib aia Districit senior zawk Lunglei leh Saihaah pawh dah lova, a aia District tharlam zawk daih, hmanni lawka District ni thar, Kolasib leh Champhaiah te Govt. Press hi dah a nih ringawt…. a changtu Minister (Pu Rualchhian kha Kolasib bial MLA a ni) leh Chief Minister (Pu Zoramthanga kha Champhai MLA a ni) bial a ni vang mai em ni…?” tiin inhnial cho deuh maiin a rawn zawt a. Pu Rualchhian chu lo ding chhuakin zawhna chu a rawn chhang a, “Ni deuh ber e..” a rawn ti.

 

Thla 2 chhung lekin Soil & Water Conservation Department Director vawi 3 ngawt mai an thlak pek a… tu zawhna ber nge ka hre ta lo… “Engatinge Soil & Water Conservation Department Director hi thla 2 chhung leka vawi 3 ngawt thlak kual a nih?” an rawn ti a, Pu Rualchhina chu lo ding chuakin, “Soil & Water Conservation Department Director hi thla 2 chhung leka vawi 3 ngawt thlak kuala nih chhan chu…A ṬULNA VANG A NI…” a rawn ti leh pek. Hemi tum hi chuan an nui nasa viau chungin Opposition ho an lungawi lova, “Zawhna min chhang duh dah” an ti a, Speaker pawhin a khak hial a. Pu Rualchhina chuan, “Dik takin zawhna ka chhang a, ‘Min chhang duh dah’ min ti leh si a, hetiang te chuan min zawt tawh lo mai teh u…” a ti.

 

ZO TUNGCHAW